સ્થળાંતરીત મતદારો મતાધિકારથી વંચિત રહેતા હોવાથી મતદાનની ટકાવારી ઓછી રહેવાની સમસ્યા: હવે રિમોટ વોટિંગ શરૂ કરવાના પ્રયાસો તેજ
લોકશાહીમાં એક મતની પણ કિંમત હોય છે. પણ ભારતમાં સ્થળાંતરીત મતદારો અનેક સંજોગોવસાત મતદાનથી વંચિત રહેતા હોય, આ પ્રશ્ન ઘેરો બન્યો છે. પણ હવે ટેકનોલોજીનો યુગ હોય, આયોજનબદ્ધ રીતે સરકાર સ્થળાંતરીત મતદારો મતદાન કરી શકે તેવો તખ્તો તૈયાર કરવાનો પ્રયાસ કરી રહી છે. 2024 સુધીમાં આ પ્રયાસો સફળ રહે છે કે કેમ તે જોવું રહ્યું.
સ્થળાંતરીત મતદારો માટે ચૂંટણી પંચ ટૂંક સમયમાં મોટો નિર્ણય લઈ શકે છે. તાજેતરમાં ચૂંટણી પંચે કહ્યું કે આગામી દિવસોમાં એક સમિતિની રચના કરવામાં આવશે. તે સ્થળાંતરિત મતદારોના મુદ્દા પર ચર્ચા કરશે. રિમોટ વોટિંગ કરી શકાય કે નહીં તેની પણ નક્કી કરવામાં આવશે. જો રિમોટ વોટિંગને મંજૂરી આપવામાં આવે તો તે મતદાનની ટકાવારીમાં વધારો થઈ શકે છે. કારણ કે આની સાથે તે લોકો પણ પોતાનો મત આપી શકશે, જેઓ ઘરથી દૂર હોવાને કારણે મતદાન પ્રક્રિયામાં ભાગ લઈ શકતા નથી.
ચૂંટણી પંચની બેઠકમાં શહેરી વિસ્તારોમાં મતદાન ઓછું કેમ થાય છે તે અંગે પણ ચિંતા વ્યક્ત કરવામાં આવી હતી. તેનું કારણ પણ તપાસવામાં આવશે. સાથોસાથ એ પણ જાણવા મળશે કે એવા કયા સરકારી કર્મચારીઓ છે જે મતદાનના દિવસે રજાનો લાભ તો લે છે પરંતુ મતદાન નથી કરતા. તે જાણવા માટે નોડલ ઓફિસર પણ તૈનાત કરવામાં આવી શકે છે. ઉલ્લેખનીય કે કેન્દ્ર અને રાજ્ય સરકારોના વિભાગોમાં મતદાનના દિવસે રજા આપવામાં આવે છે, જેથી તેઓ મતદાન કરવા જઈ શકે. પરંતુ ઘણા એવા કર્મચારીઓ છે જે રજા લઈ લે છે પરંતુ મતદાન કરવા જતા નથી.
શહેરી વિસ્તારોમાં મતદાન કેવી રીતે વધારવું તે અંગે જાગૃતિ અભિયાન ચલાવવાનું પણ આયોજન કરવામાં આવશે. ચૂંટણી પંચ દ્વારા મંગળવારે મળેલી બેઠકમાં એવી ચિંતા પણ વ્યક્ત કરવામાં આવી હતી કે ઘણા શહેરી સ્થળોએ 2 કિમીની રેન્જમાં મતદાન મથકો ઉભા કરવામાં આવ્યા હતા, તેમ છતાં મતદાનની ટકાવારી ઓછી રહી હતી.
રિમોટ વોટિંગ માટે પાયલોટ પ્રોજેક્ટ અમલમાં મુકવાની તૈયારી
ઓછું મતદાન કેમ થાય છે તેની ચર્ચા કરતી વખતે એ વાત પણ સામે આવી હતી કે મતદારો જ્યાં નોંધાયેલા હોય ત્યાંથી એટલે કે જ્યાં તેમનું મતદાર કાર્ડ બનેલું હોય ત્યાંથી, ભણતર, નોકરી કે અન્ય કોઈ કારણસર ફરે છે. આવી સ્થિતિમાં, તેમના માટે તેમના મત આપવા માટે પાછા આવવું મુશ્કેલ બની જાય છે.જેના કારણે ચૂંટણી પંચે રિમોટ વોટિંગનો અમલ કરવાનું વિચાર્યું છે. તેને પાયલોટ પ્રોજેક્ટ તરીકે શરૂ કરવાની તૈયારીઓ થઈ શકે છે. ચૂંટણી પંચ આ અંગે મતદારો અને રાજકીય પક્ષો સાથે પણ વાત કરશે.
અનેક લોકો મતદાન કરવા ઉત્સુક, પણ વતનથી દૂર હોવાના કારણે મતાધિકારનો ઉપયોગ કરી શકતા નથી
અનેક લોકો મતદાન કરવા ભારે ઉત્સુક હોય છે. પણ તેઓ વતનથી દુર હોવાના કારણે પોતાના મતાધિકારનો ઉપયોગ કરી શકતા નથી. આવા લોકોમાં અન્ય રાજ્ય, અન્ય જિલ્લા કે અન્ય દેશમાં વસતા લોકોનો પણ સમાવેશ થાય છે. સરકાર હવે આવા લોકોને મતાધિકાર મળે તે માટે રિમોટ વોટિંગની સવલત ઉભી કરવા પ્રયાસ કરી રહી છે. જો આ પ્રયાસ સફળ રહેશે તો મતદાનની ટકાવારી ઊંચી જશે તેવું માનવામાં આવી રહ્યું છે.
