- 2017-18 થી 2020-21 માટે નોટીસ ઇસ્યુ, 2021-22 થી 2024-25 સુધીની આવકના પુનર્મૂલ્યાંકનની રાહ, રકમ હજુ પણ વધવાના એંધાણ
કોંગ્રેસ પાર્ટીને ગુરુવારે દિલ્હી હાઈકોર્ટમાંથી સૌથી પહેલો ઝટકો લાગ્યો હતો. જે બાદ આવકવેરા વિભાગે બીજો ઝટકો આપ્યો છે. આવકવેરા વિભાગે કોંગ્રેસ પાર્ટીને લગભગ 1700 કરોડ રૂપિયાની નોટિસ આપી છે. આ સાથે જ લોકસભા ચૂંટણી પહેલા દેશની સૌથી જૂની પાર્ટીની આર્થિક ચિંતા વધી ગઈ છે. આવકવેરા વિભાગની નવી માંગ 2017-18 થી 2020-21 માટે છે. જેમાં દંડ અને વ્યાજ બંનેનો સમાવેશ થાય છે.
આ રકમ હજુ વધવાની શક્યતા છે. આવકવેરા વિભાગ 2021-22 થી 2024-25 સુધીની આવકના પુનર્મૂલ્યાંકનની રાહ જોઈ રહ્યું છે. તેની કટ ઓફ ડેટ રવિવાર સુધીમાં પૂર્ણ થશે. કોંગ્રેસના વકીલ અને રાજ્યસભાના સાંસદ વિવેક ટંખાએ કહ્યું કે પક્ષ કાનૂની પડકારને આગળ ધપાવશે. તેમણે આવકવેરા વિભાગની આ કાર્યવાહીને અલોકતાંત્રિક અને અયોગ્ય ગણાવી હતી.
રાજ્યસભાના સાંસદ અને કોંગ્રેસના વકીલ વિવેક ટંખાએ આરોપ લગાવ્યો હતો કે ગુરુવારે પક્ષને ચાવીરૂપ દસ્તાવેજો વિના લગભગ 1,700 કરોડ રૂપિયાની નવી નોટિસ મોકલવામાં આવી હતી. તેમણે કહ્યું કે દેશની મુખ્ય વિપક્ષી પાર્ટીનું આર્થિક રીતે ગળું દબાવવામાં આવી રહ્યું છે અને તે પણ લોકસભા ચૂંટણી દરમિયાન.
દિલ્હી હાઈકોર્ટે ગુરુવારે કોંગ્રેસની અરજીઓને ફગાવી દીધી હતી જેમાં કર સત્તાવાળાઓ દ્વારા ચાર વર્ષના સમયગાળા માટે તેની સામે કરવેરા પુન: આકારણીની કાર્યવાહી શરૂ કરવામાં આવી હતી. જસ્ટિસ યશવંત વર્મા અને જસ્ટિસ પુરૂષેન્દ્ર કુમાર કૌરવની ડિવિઝન બેન્ચે જણાવ્યું હતું કે અન્ય એક વર્ષ માટે પુનર્મૂલ્યાંકનની રજૂઆતમાં દખલ કરવાનો ઇનકાર કરતા તેના અગાઉના ચુકાદા અનુસાર અરજીઓ ફગાવી દેવામાં આવે છે. હાલની બાબત વર્ષ 2017 થી 2021 સુધીની આકારણી સાથે સંબંધિત છે.
ગયા અઠવાડિયે ફગાવી દેવામાં આવેલી અન્ય અરજીમાં, કોંગ્રેસ પાર્ટીએ 2014-15 થી 2016-17ના મૂલ્યાંકન વર્ષ સંબંધિત પુનર્મૂલ્યાંકનની કાર્યવાહીની શરૂઆતને પડકારી હતી. 22 માર્ચે, હાઈકોર્ટે તે દલીલોને ફગાવી દીધી હતી અને કહ્યું હતું કે ટેક્સ ઓથોરિટીએ પ્રાથમિક દૃષ્ટિએ પૂરતા અને નક્કર પુરાવા એકત્રિત કર્યા છે, જેના માટે વધુ તપાસની જરૂર છે.
અરજીમાં, કોંગ્રેસે દલીલ કરી હતી કે આવકવેરા કાયદાની કલમ 153સી (કોઈ અન્ય વ્યક્તિની આવકનું મૂલ્યાંકન) હેઠળની કાર્યવાહી એપ્રિલ, 2019માં ચાર વ્યક્તિઓ પર કરવામાં આવેલી અને ચોક્કસ સમય મર્યાદાથી વધુની તપાસ પર આધારિત હતી.
