- રાજ્યમાં કાલથી ત્રણ દિવસ ઠંડીનું જોર ક્રમશ: વધશે: હવામાં ભેજનું પ્રમાણ 72 ટકા જયારે 10 કિમી પ્રતિ કલાકે પવન ફૂંકાયો
હવામાન વિભાગે આગામી સાત દિવસ ગુજરાતનું વાતાવરણ કેવું રહેશે. તેમજ આગામી દિવસોમાં ઠંડી વધશે કે ઘટશે તે અંગેની આગાહી કરી છે. ગુજરાતમાં આગામી સમયમાં વાતાવરણ સુકું રહેશે. રાજ્યમાં બે દિવસ વાતાવરણ યથાવત્ રહે તેવી આગાહી કરવામાં આવી છે.જ્યારે બે દિવસ બાદ તાપમાનમાં ઘટાડો નોંધાશે. રાજ્યમાં મોટાભાગના વિસ્તારોમાં હાલ લઘુત્તમ તાપમાન સામાન્ય કરતાં બેથી ત્રણ ડિગ્રી વધુ છે. બે દિવસ બાદ તાપમાન ઘટ્યા બાદ ચાર દિવસ બાદ ફરીથી બે ડિગ્રી તાપમાન વધવાનું અનુમાન છે. હવામાન વિભાગની આગાહી અનુસાર આગામી 24 કલાક પછી ઠંડીની અસર વધુ જોવા મળશે. 20થી 23 તારીખમાં ઠંડી વધુ જોવા મળશે . ગુજરાતના મહેસાણા, પાલનપુર, રાજકોટ, પાલનપુર, ગાંધીનગર, હિંમતનગર, પંચમહાલ સહિતના વિસ્તારોમાં ઠંડીનો અનુભવ થશે. ડિસેમ્બરની શરૂઆતથી જ ઠંડીનો ચમકારો અનુભવી શકાય છે. 6થી 7 ડિસેમ્બરના ઠંડા પવન ફૂંકાશે અને 22 ડિસેમ્બરના ઉત્તરીય પર્વતીય પ્રદેશોમાં ભારે હિમવર્ષા થવાની શક્યતા છે. 28 ડિસેમ્બરના લઘુત્તમ તાપમાન ઘટશે. જો વાદળાં આવશે તો તાપમાન વધી જશે. 8થી 10 ડિગ્રી તાપમાન થશે. હવામાન વિભાગની આગાહી અનુસાર આજે અમદાવાદ, આણંદ, અરવલ્લી, બોટાદ, જુનાગઢ, ખેડા, મોરબી, તાપી સહિતના જિલ્લાઓમાં 18 ડિગ્રી ન્યૂનતમ તાપમાન રહે તેવી શક્યતા છે. જ્યારે બનાસકાંઠા, છોટાઉદેપુર, ડાંગ, ગાંધીનગર, કચ્છ, સાબરકાંઠા સહિતના જિલ્લાઓમાં 17 ડિગ્રી ન્યૂનતમ તાપમાન રહે તેવી શક્યતા છે. તેમજ દેવભૂમિ દ્વારકા, જામનગર, નવસારી, વલસાડ સહિતના જિલ્લાઓમાં 20 ડિગ્રી ન્યૂનતમ તાપમાન રહે તેવી સંભાવના છે. ઉલ્લેખનીય છે કે સૌરાષ્ટ્ર-કચ્છમાં સૌથી વધુ અમરેલી-પોરબંદર ખાતે તેમજ ગુજરાતમાં સૌથી વધુ ગાંધીનગર ખાતે ઠંડી નોંધાઇ હતી. દરમ્યાન હવામાન વિભાગે હવે આવતા સપ્તાહથી ક્રમશ: સવારનું તાપમાન ઘટવા સાથે ઠંડી વધવાનાં નિર્દેશો આપ્યા છે.
