કટોકટીના નિંદા પ્રસ્તાવના ઠરાવને મુખ્યમંત્રી ભુપેન્દ્ર પટેલે આવકાર્યો

• યુવા પેઢીને લોકશાહીના આ કાળા અઘ્યાયની જાણ થાય તે માટે નિંદા ઠરાવ ખુબ જરૂરી હતો: મુખ્યમંત્રી

18મી લોકસભામાં વડાપ્રધાન  નરેન્દ્રભાઈ મોદીના નેતૃત્વમાં એક ઠરાવ પસાર કરીને 1975માં દેશભરમાં કટોકટી લાદવાના નિર્ણયની સખત નિંદા કરવામાં આવી છે. મુખ્યમંત્રી ભૂપેન્દ્ર પટેલે લોકસભામાં પસાર થયેલા આ પ્રસ્તાવને આવકારવા સાથે પોતાની પ્રતિક્રિયા આપી હતી અને આ પ્રસ્તાવ માટે વડાપ્રધાનના નેતૃત્વની સરકારને અભિનંદન પાઠવ્યા હતા.

મુખ્યમંત્રીએ કહ્યું કે,  જેમણે કટોકટીનો સખત વિરોધ કર્યો, અભૂતપૂર્વ લડત આપી અને ભારતના લોકતંત્રની સુરક્ષાની જવાબદારી નિભાવી તે તમામ લોકોના નિશ્ચયની પ્રશંસા કરું છું  અને તેમના પ્રત્યે આદર વ્યક્ત કરું છું.

મુખ્યમંત્રીએ 1975 થી 1977 સુધીના કાળને અંધકારમય સમયગાળો ગણાવતા જણાવ્યું કે, આ સમયગાળો આપણને બંધારણના સિદ્ધાંતો, સંઘીય માળખું અને ન્યાયિક સ્વતંત્રતાના મહત્વની યાદ અપાવે છે. આ સમયગાળો તત્કાલીન લોકો પર કેવી રીતે હુમલો કરવામાં આવ્યો હતો અને શા માટે તેઓને સુરક્ષિત રાખવાની જરૂર છે તેની પણ યાદ તાજી કરવાનો સમય છે.

મુખ્યમંત્રીએ કહ્યું કે, તત્કાલીન કોંગ્રેસ સરકારનો એકમાત્ર ઉદ્દેશ્ય તમામ સત્તાઓ એક વ્યક્તિ પાસે લાવવાનો, ન્યાયતંત્રને અંકુશમાં લેવાનો અને બંધારણના મૂળભૂત સિદ્ધાંતોને નષ્ટ કરવાનો હતો. કટોકટી લાદીને નાગરિકોના અધિકારો દબાવવામાં આવ્યા હતા અને લોકશાહીના સિદ્ધાંતો પર કુઠારાઘાત કરવામાં આવ્યો હતો.

એટલું જ નહીં, તત્કાલીન વડાપ્રધાન ઈન્દિરા ગાંધીએ સમર્પિત અમલદારશાહી અને સમર્પિત ન્યાયતંત્રની વાત કરી હતી, જે તેમના લોકશાહી વિરોધી વલણનું ઉદાહરણ છે. કટોકટી તેની સાથે ભયંકર અસામાજિક અને સરમુખત્યારશાહી નીતિઓ લઈને આવી જેણે ગરીબો, દલિતો અને વંચિતોનું જીવન બરબાદ કરી નાખ્યું હતું તેમ તેમણે ઉમેર્યું હતું.

મુખ્યમંત્રીએ કટોકટી દરમિયાન, તત્કાલીન કોંગ્રેસ સરકાર દ્વારા બળજબરીથી લાદવામાં આવેલા કેટલાંક તુઘલખી અને મનસ્વી નિર્ણયોનો લોકોને ભોગ બનવું પડ્યું હતું તેને દેશનું દુર્ભાગ્ય ગણાવતા કહ્યું હતું કે, લોકસભા સદનમાં આ તમામ લોકો પ્રત્યે સંવેદના વ્યક્ત કરી છે તેને પણ હું આવકારું છું.

મુખ્યમંત્રીએ કહ્યું કે, વડાપ્રધાન નરેન્દ્રભાઈ મોદીના નેતૃત્વમાં લોકસભામાં પસાર કરાયેલો આ ઠરાવ ઇમરજન્સીના 50મા વર્ષમાં પ્રવેશ કરતી વખતે, આ 18મી લોકસભા બાબા સાહેબ આંબેડકર દ્વારા નિર્મિત બંધારણની જાળવણી, સંરક્ષણ અને જાળવણી માટેની તેની પ્રતિબદ્ધતાનો પુનરોચ્ચાર કરતો ઠરાવ છે.1975માં તત્કાલીન કેબિનેટે સરમુખત્યારશાહી અને ગેરબંધારણીય નિર્ણયને બહાલી આપતાં ઈમરજન્સીને પોસ્ટ ફેક્ટો બહાલી આપી હતી. તેથી, આપણી સંસદીય પ્રણાલી અને અસંખ્ય બલિદાન પછી પ્રાપ્ત થયેલી આ બીજી આઝાદી પ્રત્યેની આપણી પ્રતિબદ્ધતાનો પુનરોચ્ચાર કરવા માટે, યુવા પેઢીને લોકશાહીના આ કાળા અધ્યાય વિશે જાણ થાય તે માટે જે ઠરાવ પસાર કરાયો તે ખૂબ જરૂરી છે એમ પણ મુખ્યમંત્રીએ ઉમેર્યું હતું. ઇમરજન્સીએ ભારતના ઘણા નાગરિકોના જીવનને બરબાદ કરી નાખ્યું હતું, ઘણા લોકો મૃત્યુ પામ્યા હતા તે સૌ કર્તવ્યનિષ્ઠ અને દેશપ્રેમી નાગરિકોની યાદમાં લોકસભામાં બે મિનિટનું મૌન પાળીને તેમને સાચી સ્મરણાંજલિ આપી છે એમ મુખ્યમંત્રીએ જણાવ્યું હતું.