- ચૂંટણી અધિકારીએ નિયમોથી ઉપરવટ જઈને આઠ મત અમાન્ય જાહેર કરતા મામલો સુપ્રીમ સુધી પહોંચ્યો, કોર્ટે ચૂંટણી કાર્યવાહી ઉપર સ્ટે મૂકી દીધો
National News
ચંદીગઢના મેયર ચૂંટણી વિવાદ પર સુપ્રીમ કોર્ટે આકરી ટિપ્પણી કરી છે. ચંદીગઢ મેયરની ચૂંટણીમાં રિટર્નિંગ ઓફિસરની કાર્યવાહી પર સિજેઆઈ ડીવાય ચંદ્રચુડે કહ્યું કે આ લોકશાહીની મજાક છે. જે બન્યું તેનાથી અમે ચોંકી ગયા છીએ. અમે લોકશાહીની આ રીતે હત્યા થવા દઈશું નહીં.
સુપ્રીમ કોર્ટે સોમવારે ચંદીગઢ મેયરની ચૂંટણી માટે પંજાબ અને હરિયાણા હાઈકોર્ટના રજિસ્ટ્રાર જનરલ દ્વારા બેલેટ પેપર, વિડિયોગ્રાફી અને અન્ય સામગ્રી સહિતની ચૂંટણી પ્રક્રિયાના સંપૂર્ણ રેકોર્ડની માંગણી કરી હતી. આ સિવાય સુપ્રીમ કોર્ટે ચંદીગઢ મ્યુનિસિપલ બોડીની 7 ફેબ્રુઆરીએ યોજાનારી પ્રથમ બેઠકને અનિશ્ચિત સમય માટે સ્થગિત કરવાનો આદેશ પણ આપ્યો છે.
આપ-કોંગ્રેસ ગઠબંધનના આઠ મત રદ કરવાની રિટર્નિંગ ઓફિસરની પ્રક્રિયાની સુપ્રીમ કોર્ટ દ્વારા આકરી ટીકા કરવામાં આવી હતી. ડીવાય ચંદ્રચુડની આગેવાની હેઠળની બેન્ચે કહ્યું કે એવું લાગે છે કે રિટર્નિંગ ઓફિસર એ મતો સાથે ચેડા કર્યા છે અને તેની સામે કાર્યવાહી કરવાની જરૂર છે.
સિજેઆઈએ કહ્યું કે તમારા આરઓને કહો કે સુપ્રીમ કોર્ટ તેમના પર નજર રાખી રહી છે. અમે લોકશાહીની આ રીતે હત્યા થવા દઈશું નહીં. આ દેશમાં એકમાત્ર મહાન સ્થિર શક્તિ લોકશાહીની પવિત્રતા છે. અગાઉ આપએ મતદાનને “ગેરબંધારણીય અને ગેરકાયદેસર” અને “દેશદ્રોહ”નું કૃત્ય ગણાવ્યું હતું. દિલ્હીના મુખ્યમંત્રી અને આપ કન્વીનર અરવિંદ કેજરીવાલે ભાજપ પર ચૂંટણી ચોરી કરવાનો આરોપ લગાવ્યો હતો.
ઉલ્લેખનીય છે કે સોમવારે, સુપ્રીમ કોર્ટ પંજાબ અને હરિયાણા હાઈકોર્ટના આદેશને પડકારતી આપ કાઉન્સિલર કુલદીપ સિંહ દ્વારા દાખલ કરવામાં આવેલી અરજી પર સુનાવણી કરી રહી હતી. કારણ કે હાઈકોર્ટે ચંદીગઢમાં નવા મેયરની ચૂંટણીની માંગણી કરનાર પક્ષને કોઈપણ વચગાળાની રાહત આપવાનો ઈન્કાર કરી દીધો હતો. હકીકતમાં, 20 કાઉન્સિલર હોવા છતાં, આપ-કોંગ્રેસ ગઠબંધન ચૂંટણી હારી ગયું હતું. પ્રેસિડિંગ ઓથોરિટી અનિલ મસીહ, નામાંકિત કાઉન્સિલર કે જેમની પાસે મતદાનનો અધિકાર ન હતો, તેણે 36માંથી આઠ મત અમાન્ય જાહેર કર્યા. ભાજપના ઉમેદવાર મનોજ સોનકરને 16 મત મળ્યા, જ્યારે 20 કાઉન્સિલર હોવા છતાં, આપ-કોંગ્રેસ ગઠબંધનના ઉમેદવાર કુલદીપ સિંહને 12 મત મળ્યા.
