અનેક વૈશ્વિક કારણોસર હજુ સોના અને ચાંદીમાં ઉછાળો યથાવત રહે તેવુ અનુમાન
આ વર્ષે 2023માં સોનાનો ભાવ 60000 રૂપિયાને પાર થવાની ધારણા છે. કેટલાક લોકો આ અંગે અનુમાન લગાવી રહ્યા છે. કોમેક્સ માર્કેટમાં સોનાના ફ્યુચર ઔંસ દીઠ 1852 ડોલર અને સોનાની હાજર કિંમત 1847 ડોલર પ્રતિ ઔંસ છે. બજારના નિષ્ણાતોનું માનીએ તો સોનાના ભાવ હાલમાં બે વર્ષની ટોચે છે. જ્યારે ચાંદીની કિંમત પણ 70 હજાર રૂપિયાથી ઉપર છે.
સોનાના ભાવમાં ઉછાળા પાછળ અનેક કારણો છે. ભારતમાં ડોલર સામે રૂપિયામાં ઘટાડો અટકવાનું નામ નથી લઈ રહ્યો. ડૉલરની સામે રૂપિયો ફરી 81 રૂપિયાથી 83 રૂપિયા પર પહોંચી ગયો છે. જેની અસર સોનાના ભાવ પર પડી રહી છે.સોનાના ભાવમાં વધારો થવા પાછળનું એક કારણ ફેડ પોલિસી રેટ છે. યુએસ ફેડ રિઝર્વનું કહેવું છે કે ગયા વર્ષ 2022ની સરખામણીમાં વર્ષ 2023માં પોલિસી રેટમાં વધારો ઘટ્યો છે. આ કારણે આંતરરાષ્ટ્રીય બજારમાં સોનાની કિંમતને ઘણો ટેકો મળ્યો છે.
ડોલર ઇન્ડેક્સમાં પણ આ જ ઘટાડો જોવા મળી રહ્યો છે, જે ગયા વર્ષના અંતિમ દિવસોમાં 105થી આગળ ચાલી રહ્યો હતો. તે હવે 104 પર ટ્રેડ કરી રહ્યો છે.રશિયા અને યુક્રેન વચ્ચે ચાલી રહેલું યુદ્ધ શમવાના કે ઘટવાના કોઈ ચિહ્નો દેખાતા નથી. જેના કારણે રોકાણકારો સુરક્ષિત સ્થાન તરફ વળ્યા છે. ઉચ્ચ માંગને કારણે સોનાના ભાવમાં વધારો જોવા મળી રહ્યો છે.
વિશ્વભરની સેન્ટ્રલ બેંકો તરફથી સોનાની માંગમાં વધારો થયો છે અને ઘણી ખરીદી થઈ છે. જેના કારણે સોનાના ભાવમાં વધારો થયો છે.ભારતમાં ફેબ્રુઆરી મહિનામાં લગ્નની સિઝન શરૂ થશે. જેના કારણે બજારમાં સોનાની માંગ વધી રહી છે. ભારતમાં સ્થાનિક માંગમાં વધારાને કારણે સોનાના ભાવમાં વધારો જોવા મળી રહ્યો છે.
ભલે ચીનમાં કોવિડનો કહેર ફરી શરૂ થયો હોય, પરંતુ ચીનમાં નવા વર્ષના તહેવારોની સિઝન શરૂ થઈ ગઈ છે. જેના કારણે સોનાની માંગ વધવા લાગી છે.આ જ ચીન વિશ્વમાં સોનાનો સૌથી મોટો આયાતકાર દેશ છે અને અર્થવ્યવસ્થા ખુલ્યા બાદ તેની માંગ વધુ વધવા લાગી છે.
