- ગેરકાયદેસર કબજો કરી ખડકી દેવાયેલી 12 જેટલી દુકાનો તોડી પડાઈ
- માળીયા (મિ)માં ફારુક હબીબ જામ નામના હિસ્ટ્રી ચીટરની ગેરકાયદેસર મિલકત તોડી પડાઈ
મોરબીમાં સત્તત બીજા દિવસે ગુનેગારોની ગેરકાયદેસર મિલકત પર પોલીસનું બુલડોઝર એકશન યથવત છે. એસપી રાહુલ ત્રિપાઠીના આદેશને પગલે રીઢા ગુનેગારોની ગેરકાયદેસર મિલકત તોડી પાડવાની કામગીરી શરૂ કરાઈ છે. માળીયા મિયાણામાં ફારુક હબીબ જામ નામના હિસ્ટ્રી ચીટરની ગેરકાયદેસર મિલકત તોડી પાડવાની કામગીરી હાથ ધરાઈ છે. ફારુક હબીબ જામ વિરુદ્ધ અનેક ગંભીર ગુનાઓ નોંધાયેલા છે. જેની ગેરકાયદેસર કબજો કરી બનાવાયેલ 12 જેટલી દુકાનો તોડી પડવામાં આવી છે. જેને લઇ ગુનેગારોમાં ફફડાટ જોવા મળી રહ્યો છે.
ગુજરાતના મોરબી(Morbi)જિલ્લામાં માળિયા તાલુકાના ખીરઈ ગામે દારૂની રેડ કરવા ગયેલી પોલીસ પર હુમલો કરનારા બુટલેગરના ભાઈના મકાન પર બુલડોઝર ફેરવી દેવામાં આવ્યું છે. જેમાં ઘટનાની વિગત મુજબ બાતમીના આધારે દારૂની રેડ કરવા ગયેલી પોલીસની ટીમ પર 4 માર્ચના રોજ બુટલેગરના ભાઈ સહિત 10 લોકોએ હુમલો કર્યો હતો. જેમાં 6 પોલીસ જવાનને નાની મોટી ઇજા પહોંચી હતી.
જેની બાદ પોલીસે આ હુમલામાં સંડોવાયેલા મહિલાઓ સહિત 10 આરોપીઓ વિરુદ્ધ ગુનો નોંધી નવ આરોપીને ઝડપી લીધા હતા. જેમાં કુખ્યાત બુટલેગર ઇકબાલ ઉર્ફે ઇકો હાજી મોવર અને તેના પરિવારના સભ્યોની ધરપકડ કરી હતી બુટલેગરના ભાઈ રફીક હાજીએ સરકારી જમીન પર કબજો કરી મકાન બનાવી નાખ્યું હતું. જે મામલે તંત્ર દ્વારા અગાઉ નોટીસ પાઠવવામાં આવી હતી અને આજે રેવન્યુ વિભાગ તેમજ પોલીસ વિભાગ તોડી પાડ્યું હતું. પોલીસના ચુસ્ત બંદોબસ્ત વચ્ચે સરકારી ખરાબામાં ખડકી દીધેલ મકાન તોડી પાડવામાં આવ્યું હતું અને દબાણ દુર કરાયું હતું.
ઉલ્લેખનીય છે કે, માળિયા તાલુકાના ખીરઈ ગામે પોલીસ ટીમ દારૂની રેડ કરવા ગઈ હતી ત્યારે બુટલેગરને ઝડપી લેતા ધરપકડથી બચવા બુટલેગર અને પરિવારના સભ્યોએ હુમલો કર્યો હતો. તેની બાદ પોલીસે કોમ્બિંગ દરમિયાન દારૂ સહિતનો મુદામાલ અને હથિયારો જપ્ત કર્યા હતા અને આ મકાન સરકારી જમીન પર બનેલું હોવાની માહિતી મળી હતી. જેથી નોટીસ આપી આજે જમીન દોસ્ત કરવામાં આવ્યું હતું.
આજે માળીયાના મામલતદાર એચ.સી. પરમાર સહિતની રેવન્યુ વિભાગની ટીમ દ્વારા ડીવાયએસપી સમીર સારડા સહિતના પોલીસ અધિકારીઓની ટીમને સાથે રાખીને ચુસ્ત પોલીસ બંદોબસ્ત વચ્ચે સરકારી ખરાબાની જગ્યામાં ખડકી દેવામાં આવેલા પાકા મકાન ઉપર જેસીબી અને હીટાચી મશીન ફેરવી દઈને દબાણને તોડી પાડવામાં આવ્યું છે અને સરકારી જમીનને ખુલ્લી કરાવવામાં આવી છે.
અહેવાલ: ઋષિ મહેતા
