- હું નવા થોરાળાનો ડોન ગૌરવ….
- નશામાં ધૂત આવારા તત્વને ખાખીનો સહેજ પણ ખોફ ન હોય તેમ પોલીસ ચોકીમાં ધસી જઈ કબાટ અને ખુરશીમાં માથા પછાડ્યા
- પીસીઆર ઇન્ચાર્જનો કાઠલો પકડી ધમકી આપનાર ગૌરવ ખીમસુરીયા વિરુદ્ધ ફરજમાં રૂકાવટ સહિતની કલમો હેઠળ ગુનો નોંધી ધરપકડ
હું નવા થોરાળાનો ડોન ગૌરવ… કહી ગુંદાવાડી પોલીસ ચોકીમાં ધસી જઈ મહિલા પોલીસકર્મીને છરી ઝીંકી દેવાની બુટલેગરે ધમકી આપ્યાનો બનાવ સામે આવતા ખળભળાટ મચી જવા પામી છે. પોલીસ ચોકીમાં ધમાલ મચાવી, આજે બધાનું પૂરું કરી નાખવું છે, બધી પોલીસ મારા ખિસ્સામાં છે કહી પોતાનું માથું ખુરશી અને કબાટમાં પછાડનાર બુટલેગરે પીસીઆર ઇન્ચાર્જનો પણ કાઠલો પકડી લીધો હતો. મામલામાં એ ડિવિઝન પોલીસે ફરજમાં રુકાવટ સહીતની કલમો હેઠળ ગુનો નોંધી ગૌરવ ખીમસુરીયાની ધરપકડ કરી છે.
મામલામાં ભક્તિનગર પોલીસ મથકની ગુંદાવાડી પોલીસ ચોકીમાં ફરજ બજાવતાં હેડ કોન્સ્ટેબલ તોરલબેન જોષીએ નોંધાવેલ ફરિયાદમાં આરોપી તરીકે ગૌરવ ખીમસૂરીયા (રહે. નવા થોરાળા) નું નામ આપતાં એ.ડિવિઝન પોલીસમાં નોંધાવેલી ફરિયાદમાં જણાવ્યું હતું કે, તેઓ ભકતીનગર પોલીસ સ્ટેશનની ગુંદાવાડી પોલીસ ચોકીમાં હેડ કોન્સ્ટેબલ તરીકે સાતેક મહીનાથી ફરજ બજાવે છે. ગઈકાલે સાંજના પાંચેક વાગ્યાની આસપાસ તેઓ ગુંદાવાડી પોલીસ ચોકીએ ફરજ ઉપર હાજર હતાં ત્યારે એક શખ્સ ચોકીની અંદર ઉશ્કેરાટમાં ગાળા ગાળી કરતો આવેલ અને કહેલ કે, હું નવા થોરાળાનો ડોન છું, મારૂ નામ ગૌરવ છે અને બધી પોલીસ મારા હાથમાં છે, મને હજી ઓળખતા નથી, બાકીની પોલીસ ક્યા છે, હું આજે બધાનુ પૂરુ કરી નાખવાનો છું, કહી અભદ્ર ભાષામાં ગાળાગાળી કરવા લાગેલ હતો. જેથી તેને ચોકીની બહાર જતા રહેવાનુ કહેતા કહેલ કે, આજ તો ચોકીની બહાર નીકળો છરીના ઘોદા મારી પતાવી દેવાનો છું.
બાદમાં આ શખ્સ વધુ ઉશ્કેરાઈ જઈ ચોકીની અંદર રહેલા લોખંડના કબાટ અને ખુરશી સાથે જોર જોરથી માથા તેમજ પોતાના શરીર વડે આગળના અને પાછળના ભાગેથી ભટકાડી કહેવા લાગેલ કે, હું હમણા બધાને ફીટ કરાવી દઉ છું અને બધાને છરીના ઘોદા મારી દઉં છું. બાદમાં પોતાને બટકા ભરવા લાગેલ તેમજ પોતાના માથાના વાળ ખેંચવા લાગેલ અને દીવાલો સાથે માથુ તથા પીઠનો ભાગ પછાડવા લાગેલ હતો. જેથી ફરિયાદીએ ચોકી ઇન્ચાર્જ પીએસઆઇ એ.જે.લાઠીયાને તેમજ પોલીસ કંટ્રોલ રૂમમા ફોન કરી પોલીસની ગાડી બોલાવેલ હતી. દરમ્યાન પીએસઆઇ પી.એસ.ગોહીલ, એ.જે.લાઠીયા ચોકીએ દોડી આવી ગયેલ અને આરોપીને ગાળાગાળી તેમજ ગેરવર્તન ન કરવા સમજાવેલ તેમ છતા તે ફરીથી ઉભો થઇ પોતાનુ માથુ કબાટ સાથે ભટકાડી ખુરશીઓને પાટા મારી ઘા કરી દીધેલ હતી.દરમ્યાન પીસીઆર ઇન્ચાર્જ કોન્સ્ટેબલ વજુભાઇ ડાભી ચોકીની અંદર આવેલ અને તેઓને પોલીસવાનમાં બેસી જવાનુ સમજાવેલ ત્યારે આરોપીએ સરકારી ગાડીના ઇન્ચાર્જને પણ સામે થઇ ગયેલ અને યુનીફોર્મનો કોલર પકડી ગાળાગાળી કરવા લાગેલ હતો. બાદમાં આરોપીને એ.ડીવીઝન પોલીસ સ્ટેશન ખાતે લાવવવામાં આવેલ હતો.વધુમાં બનાવ અંગે તપાસ કરતાં પીએસઆઇ ડી. વાય. મહંતે જણાવ્યું હતું કે, આરોપી તેની પુત્રીને લઈ સારવાર કરાવવા માટે પદ્મકુંવરબા હોસ્પિટલમાં આવ્યો હતો અને ત્યારે તે નશાની હાલતમાં હોસ્પિટલની બહાર નીકળતો હતો.ત્યારે એક બાઈક ચાલક સાથે સામાન્ય અથડામણ થઈ હતી. જે બાદ તેને દેકારો કરતાં પોલીસ સ્ટાફ ત્યાં દોડી જતાં ઉશ્કેરાટમાં આવી પોલીસની ફરજમાં રૂકાવટ કરી ધમકી આપી હતી. બનાવ અંગેની ફરીયાદ પરથી એ.ડિવિઝન પોલીસે ગુનો નોંધી આરોપીની ધરપકડ કરી હતી. આરોપી થોરાળા વિસ્તારમાં દારૂનો ધંધો કરતો હોવાનું પણ સામે આવ્યું છે.
પદ્મકુંવરબા હોસ્પિટલની બહાર બાઈક અથડાતા પોલીસ ચોકી માથે લીધી
આરોપી પદ્મકુંવરબા હોસ્પિટલની બહાર નિકળતાં બાઈક સાથે અથડાયો અને ધમાલ પોલીસ ચોકીમાં પહોંચી રાજકોટની ગુંદાવાડી પોલીસ ચોકીમાં નશામાં ધુન બુટલેગરે મચાવેલી ધમાલ અને પોલીસ સ્ટાફને આપેલ ધમકીના બનાવમાં મુખ્ય કારણ સામે આવ્યું હતું.જેમાં આરોપી તેની પુત્રીની સારવાર કરાવવા પહ્મકુંવરબા હોસ્પિટલે આવ્યો હતો અને સાંજના સમયે નાસ્તો કરવા હોસ્પિટલ બહાર નિકળ્યો ત્યારે નશાની હાલતમાં બાઈક સાથે અથડાયો હતો.જે મામલે તેને જાહેરમાં દેકારો કરતાં પોલીસ પહોંચી હતી અને તમે આરોપીને પકડતા નથી તેમ કહી પોલીસ ચોકીમાં ધમાલ કરી હતી.
અટકાયત થતાં પત્નીને ઝેરી દવા ગટગટાવી પોલીસનું નામ લખાવી દેવા કહ્યું
પોલીસ ચોકીમાં ધમાલ મચાવનાર શખ્સને પી.સી.આર.માં બેસાડવામાં આવ્યો ત્યારે ત્યા તેની પત્નીને જોર જોરથી બુમ પાડીને બોલાવેલ અને કહેલ કે, જા તું દવા પી જા અને આ બધી પોલીસના નામ લખાવી દેજે જેથી બધાને ફિટ કરાવી દઉં. બુટલેગરની આ ધમાલથી કાયદો અને વ્યવસ્થાની સ્થિતિ પર સવાલ ઉભા થયાં છે.
