હરિયાણામાં કોંગ્રેસને સુભાષચંદ્રની ખોટ પડશે, સામે રાજસ્થાનમાં પણ ડેમેજનો સામનો કરવો પડશે
અગાઉ હરિયાણામાં કોંગ્રેસના સમર્થનથી રાજ્યસભાના સાંસદના રહી ચૂકેલા ઝીના ફાઉન્ડર ચેરમેન સુભાષ ચંદ્રએ આ વખતે રાજસ્થાનના રાજ્યસભાના સાંસદ તરીકે ઉમેદવારી નોંધાવી છે. પણ આ વખતે તેઓને ભાજપે સમર્થન આપ્યું છે. ભાજપે આવું કરીને એક કાંકરે અનેક પક્ષી માર્યા છે. કારણકે હવે હરિયાણામાં પણ કોંગ્રેસને તેની ખોટ પડશે અને રાજસ્થાનમાં તેઓ કોંગ્રેસની વીરુદ્ધ હશે.
રાજસ્થાનમાં રાજ્યસભાની 4 બેઠકો માટે યોજાઈ રહેલી ચૂંટણીમાં 5 ઉમેદવારોએ ઉમેદવારી નોંધાવી છે. ત્રણ ઉમેદવારો કોંગ્રેસના અને એક ઉમેદવાર ભાજપના છે. તે જ સમયે, પાંચમા ઉમેદવાર, સુભાષ ચંદ્રાએ ભાજપ સમર્થિત અપક્ષ તરીકે ઉમેદવારી નોંધાવી હતી. બીજેપી ઉમેદવાર ઘનશ્યામ તિવારીની તરફેણમાં 41 વોટ આવ્યા બાદ પાર્ટી પાસે 30 વોટ બાકી છે. સુભાષ ચંદ્રાને જીતાડવા માટે ભાજપે 11 મતોની વ્યવસ્થા કરવી પડશે.
રાજ્યમાં 13 અપક્ષ ધારાસભ્યો છે. તેમજ આરએલપી પાસે 3, બીટીપી પાસે 2 અને સીપીઆઈ(એમ) પાસે 2 ધારાસભ્યો છે. ભાજપ આ ધારાસભ્યોને તોડવાની કોશિશ કરી રહી છે. રાજસ્થાન વિધાનસભામાં કોંગ્રેસના 108 સભ્યો છે. લોકદળના એકમાત્ર ધારાસભ્ય પહેલાથી જ સરકારમાં છે, તેથી કોંગ્રેસને તેમના વોટની ચિંતા નથી. રાજ્યસભાની ત્રણ બેઠકો મેળવવા માટે કોંગ્રેસે બીટીપી, સીપીઆઈ (એમ) અને અપક્ષ ધારાસભ્યો પર પણ ધ્યાન કેન્દ્રિત કરવું પડશે. રાજ્યસભાની ચૂંટણી માટે 10 જૂને મતદાન થવાનું છે.
સુભાષ ચંદ્રાએ ભાજપ સમર્થિત અપક્ષ ઉમેદવાર તરીકે ઉમેદવારી નોંધાવ્યા બાદ રાજસ્થાન વિધાનસભાની બહાર મીડિયા સાથે વાતચીત કરી હતી. તેમણે કહ્યું કે તેમણે અપક્ષ ધારાસભ્યોને પૂછ્યા બાદ જ ઉમેદવારી નોંધાવી છે. આ સિવાય અન્ય ઘણા ધારાસભ્યો તેમના સંપર્કમાં છે. તેને પોતાની જીતનો વિશ્વાસ દેખાતો હતો. સુભાષ ચંદ્રાએ જણાવ્યું કે તે રાજસ્થાનના ફતેહપુરના રહેવાસી છે. અહીંની માટી સાથે તેમનો લાંબો સંબંધ છે. તેઓ રાજસ્થાન થઈને રાજ્યસભામાં જઈને રાજ્યના વિકાસમાં યોગદાન આપવા ઈચ્છે છે.
સુભાષ ચંદ્રાએ ઉમેદવારી પત્ર ભર્યા બાદ કોંગ્રેસમાં ખળભળાટ મચી ગયો છે. કોંગ્રેસના નેતાઓએ ભાજપ પર આકરા પ્રહારો કર્યા છે. કેબિનેટ મંત્રી અને કોંગ્રેસના પ્રદેશ પ્રવક્તા પ્રતાપ સિંહ ખાચરિયાવાસે કહ્યું કે ભાજપ હોર્સ ટ્રેડિંગનો પ્રયાસ કરી રહી છે પરંતુ અહીં તેમને તેનો સામનો કરવો પડશે. છેલ્લી રાજ્યસભાની ચૂંટણીમાં પણ ભાજપે વધારાના ઉમેદવાર તરીકે ઓમકાર સિંહ લખાવતનું નામાંકન ભર્યું હતું. પરંતુ તેને હારનો સામનો કરવો પડ્યો હતો. આ વખતે પણ ભાજપને હારનો સામનો કરવો પડશે.
