- બ્રિજ નજીક ટ્રક ચાલકે બે બાઈકને અડફેટે લેતા સર્જાયો હતો અકસ્માત
- ટ્રકની અડફેટે આવતા એક બાઈક ચાલકનું ઘટના સ્થળે મો*ત નિપજ્યું
- પોલીસ દ્વારા અકસ્માત સર્જનાર ટ્રક ડ્રાઈવરની ધરપકડ કરવામાં આવી
સુરતના કાપોદ્રા વિસ્તારમાં બ્રિજ નજીક ટ્રકે બે બાઈકને અડફેટે લેતા અકસ્માત સર્જાયો હતો. જેમાં એક બાઈક ચાલક યુવકનું ઘટના સ્થળે મોત નિપજ્યું હતું. જ્યારે એક યુવકને ગંભીર ઈજાઓ થતાં સારવાર અર્થે હોસ્પિટલ ખસેડવામાં આવ્યો હતો. અકસ્માત બાદ ટ્રક ચાલક ઘટના સ્થળેથી ફરાર થઈ ગયો હતો. ઘટનાની જાણ થતાં જ પોલીસ પણ ઘટના સ્થળે પહોંચી હતી. પોલીસ દ્વારા ટ્રક ડ્રાઈવરની ધરપકડ કરવામાં આવી છે. અકસ્માતની ઘટનાને કારણે ટ્રાફિકજામના દ્રશ્યો સર્જાયા હતા.
પ્રાપ્ત વિગતો પ્રમાણે સુરતના કાપોદ્રા વિસ્તારમાં બાઈક સવાર યુવકને ટ્રક ચાલકે અડફેટે લેતાં તેનું ઘટના સ્થળે મોત નિપજ્યું હતું. અન્ય એક યુવકને ઈજા થતાં તેને સારવાર અર્થે હોસ્પિટલ ખસેડવામાં આવ્યો હતો. આ અકસ્માત થતાં માર્ગ પર ટ્રાફિક જામની સ્થિતિ સર્જાઈ હતી. ઘટનાની જાણ થતાં જ પોલીસ ઘટના સ્થળે પહોંચી ગઈ હતી અને ટ્રાફિકને પૂર્વવત કર્યો હતો. ઈજાગ્રસ્ત યુવકના પગે ફ્રેક્ચર થતા તેને હોસ્પિટલમાં સારવાર માટે ખસેડાયો હતો.
પુણાગામ વિસ્તારમાં આવેલી શંકર નગર સોસાયટીમાં 44 વર્ષીય માલવિયા ભુપતભાઈ લાલજીભાઈ બાઈક પર કાપોદ્રા વિસ્તારમાંથી પસાર થઈ રહ્યા હતા. આ દરમિયાન પૂરપાટ ઝડપે દોડી રહેલા આઇસર ટ્રકના ચાલકે તેમની બાઇકને પહેલા અડફેટે લીધી અને ત્યારબાદ અન્ય એક બાઈકને પણ અડફેટે લીધી હતી. જેથી, ભુપતભાઈનું ઘટનાસ્થળે જ મોત નિપજ્યું હતું જ્યારે ભીમસિંહ પટેલ સહિત બે લોકોને ગંભીર ઈજા પહોંચતા હોસ્પિટલ ખસેડવામાં આવ્યા છે.
આ સાથે પિક અવર્સ દરમિયાન અકસ્માતાના પગલે ટ્રાફિકજામ સર્જાઈ ગયો હતો. આ ઘટના અંગેની જાણ થતા કાપોદ્રા પોલીસનો કાફલો ઘટનાસ્થળે દોડી ગયો હતો. ટ્રકના ચાલકને કાપોદ્રા પોલીસ દ્વારા અટકાયત કરી પોલીસ સ્ટેશન લઈ જવામાં આવ્યો હતો જ્યારે અકસ્માતમાં મોતને ભેંટનારના મૃતદેહને પોસ્ટમોર્ટમ અર્થે સ્મીમેર હોસ્પિટલ ખસેડવામાં આવ્યો છે.
અહેવાલ: ભાવેશ ઉપાધ્યાય
