હરાજીના સાતમાં રાઉન્ડનું સંરક્ષણ પ્રધાન રાજનાથ સિંહના હસ્તે ઉદ્ઘાટન
કેન્દ્રએ કોલસાના બ્લોકના કોમર્શિયલ માઇનિંગ માટે હરાજીના સાતમા રાઉન્ડની શરૂઆત કરી છે. આ અંતર્ગત 106 ખાણો વેચાણ માટે મૂકવામાં આવી છે. સાતમા રાઉન્ડમાં વેચાણ માટે મૂકવામાં આવેલા આ બ્લોક્સમાંથી 61ની આંશિક શોધખોળ કરવામાં આવી છે અને 45ની સંપૂર્ણ શોધખોળ કરવામાં આવી છે. 95 નોન-કોકિંગ કોલસાની ખાણો, 10 લિગ્નાઈટ ખાણો અને એક કોકિંગ કોલ માઈનની હરાજીના નવીનતમ રાઉન્ડમાં ઓફર કરવામાં આવી રહી છે.
હરાજીના આ રાઉન્ડનું ઉદ્ઘાટન કરતાં સંરક્ષણ પ્રધાન રાજનાથ સિંહે કહ્યું કે કોલસાને કાળું સોનું માનવામાં આવે છે જે દેશની અર્થવ્યવસ્થાને મજબૂત બનાવવામાં મહત્વની ભૂમિકા ભજવે છે. છેલ્લા કેટલાક વર્ષોમાં ઉર્જા વપરાશ વધ્યો છે અને તે વધતો રહેશે. આ જરૂરિયાતને પૂર્ણ કરવા માટે આપણે આજથી જ પ્રયત્નો શરૂ કરવા પડશે.
કોલસા મંત્રીએ કહ્યું- ખાણોમાંથી ઉત્પાદન શરૂ કરનારી કંપનીઓને પ્રોત્સાહન મળશે.આ અવસર પર રાજનાથ સિંહ સાથે હાજર રહેલા કેન્દ્રીય કોલસા અને ખાણ મંત્રી પ્રહલાદ જોશીએ કહ્યું કે સરકાર તે કંપનીઓને પ્રોત્સાહિત કરશે જે ટૂંક સમયમાં ખાણોમાંથી ઉત્પાદન શરૂ કરશે. તેમણે એમ પણ કહ્યું કે કોલસો આગામી 40-50 વર્ષ સુધી ઉપયોગમાં રહેશે.કોલસા મંત્રાલયના જણાવ્યા અનુસાર, ખાણોની વિગતો, હરાજીની શરતો અને સમયરેખા એમએસટીસી હરાજી પ્લેટફોર્મ પર મળી શકે છે. આવકના હિસ્સાની ટકાવારીના આધારે હરાજી બે તબક્કાની પારદર્શક પ્રક્રિયા દ્વારા ઓનલાઈન હાથ ધરવામાં આવશે.જોશીએ એમ પણ કહ્યું કે છઠ્ઠા હપ્તા દરમિયાન હરાજી કરાયેલ 29 કોલસાની ખાણો માટે કરાર પર હસ્તાક્ષર સમારોહ પણ યોજાયો હતો. મંત્રીએ કહ્યું, અત્યાર સુધીમાં 6 તબક્કામાં, 87 બ્લોક્સની સફળતાપૂર્વક હરાજી કરવામાં આવી છે.
