એક તરફ વિપક્ષી ગઠબંધન હેઠળ પંજાબમાં આપ અને કોંગ્રેસ વચ્ચે બેઠક
વહેંચણીને લઈને વિવાદ ચાલી રહ્યો હતો તેવામાં બળતામાં ઘી હોમાયું
નેશનલ ન્યૂઝ
વિપક્ષોનો એક સાંધે અને તેર તૂટે તેવો ઘાટ સર્જાયો છે. પંજાબમાં અગાઉથી જ આપ અને કોંગ્રેસ વચ્ચે બેઠક વહેંચણીને લઈને વિવાદ ચાલી રહ્યો છે. તેવામાં કોંગી ધારાસભ્યની ડ્રગ્સ કેસમાં ધરપકડ થતા બળતામાં ઘી હોમાયું છે.
પંજાબ પોલીસે ગુરુવારે કોંગ્રેસના ધારાસભ્ય સુખપાલ સિંહ ખૈરાની 2015ના ડ્રગ કેસમાં ધરપકડ કરી હતી. પોલીસ અધિક્ષક મનજીત સિંહના નેતૃત્વમાં પંજાબ પોલીસની એક ટીમે સવારે 6 વાગ્યે ચંદીગઢમાં સુખપાલ સિંહ ખૈરાના ઘરે દરોડો પાડ્યો હતો. ધારાસભ્યના પુત્રએ ફેસબુક પર ’લાઇવ’ કર્યું અને બતાવ્યું કે પંજાબ પોલીસની એક ટીમ તેની ધરપકડ કરવા સુખપાલ સિંહ ખૈરાના ઘરે પહોંચી છે.
પોલીસે સુખપાલ સિંહ ખૈરાને જણાવ્યું કે તેની નાર્કોટિક ડ્રગ્સ એન્ડ સાયકોટ્રોપિક સબસ્ટન્સ એક્ટ કેસમાં ધરપકડ કરવામાં આવી છે. એપ્રિલ 2023માં પોલીસ નાયબ મહાનિરીક્ષક સ્વપન શર્માના નેતૃત્વમાં એક વિશેષ તપાસ ટીમની રચના કરવામાં આવી હતી અને 2015ના કેસની તપાસના આધારે સુખપાલ સિંહ ખૈરાની ધરપકડ કરવામાં આવી છે. ભગવંત માન સરકારની ટીકા કરતા કોંગ્રેસના ધારાસભ્યએ દાવો કર્યો હતો કે તેમને નકલી કેસમાં રાખવામાં આવ્યા છે અને રાજ્યમાં જંગલ રાજ ચાલી રહ્યું છે.
ખૈરા સામેનો NDPS કેસ સરહદ પાર હેરોઈનની દાણચોરીની રિંગ સાથે જોડાયેલો છે. જેના પરિણામે આઠ લોકોની ધરપકડ કરવામાં આવી હતી અને 2 કિલો હેરોઈન, બે પાકિસ્તાની સિમ કાર્ડ, એક પાકિસ્તાની મોબાઈલ ફોન, 24 સોનાના બિસ્કિટ અને બે નાના હથિયારો જપ્ત કરવામાં આવ્યા હતા. ખૈરા સામેના પ્રાથમિક આરોપોમાં આંતરરાષ્ટ્રીય દાણચોરી ટોળકીને ટેકો આપવાનો, તેમને આશ્રય આપવાનો અને ડ્રગ્સની હેરાફેરી કરનારાઓ પાસેથી નાણાકીય લાભ મેળવવાનો સમાવેશ થાય છે.એવો દાવો કરવામાં આવે છે કે પ્રાપ્ત ભંડોળનો ઉપયોગ મિલકત ખરીદવા માટે કરવામાં આવ્યો હતો. ચાર્જશીટ મુજબ, 2014 અને 2020 ની વચ્ચે, ખૈરાએ કથિત રીતે પોતાની અને તેના પરિવારના સભ્યો પર 6.5 કરોડ રૂપિયા ખર્ચ્યા છે, જે તેની જાહેર કરેલી આવક કરતા વધારે છે. ઉલ્લેખનીય છે કે આ ધરપકડથી કોંગ્રેસ અને આપ સામસામા આવી ગયા છે.
