રાજકોટમાં કટારિયા ચોકડીએ બનશે આઈકોનિક બ્રિજ

• સૌરાષ્ટ્રના પાટનગર રાજકોટમાં ચાર નવા ફલાય ઓવર બ્રિજ બનાવવા માટે રાજય સરકાર દ્વારા 185 કરોડ ફાળવાયા

સૌરાષ્ટ્રના પાટનગર સમા રાજકોટના પશ્ર્ચિમ વિસ્તારના પ્રવેશદ્વાર સમા કાલાવડ રોડ પર કટારિયા ચોકડી ખાતે આઈકોનીક બ્રિજ બનાવવામાં આવશે જેમા નીચે અંડર બ્રિજ અને ઉપર ફલાય ઓવર બ્રિજ બનાવવામાં આવશે શહેરમાં ચાર બ્રિજ નિર્માણ માટે રાજય સરકાર દ્વારા  185 કરોડ રૂપીયાની ફાળવણી  કરવામાં આવી છે. કોર્પોરેશન દ્વારા વર્ષ  2024-25ના બજેટમાં કટારિયા ચોકડી ખાતે બ્રિજ બનાવવાની જાહેરાત કરી હતી. આ ઉપરાંત સ્માર્ટ સિટીને જોડાતા રૈયા ગામ પર  ડીપી રોડ પર વોંકળા પર બ્રિજ બનાવવામાં આવશે.

મુખ્યમંત્રી ભૂપેન્દ્ર પટેલે રાજ્યના મહાનગરો-નગરોના લોકોના જનજીવનની સુવિધા સુખાકારીમાં વૃદ્ધિ માટે મહત્વપૂર્ણ નિર્ણય લઇને રાજકોટ મહાનગરમાં ચાર ફ્લાય ઓવર માટે રૂ.185 કરોડ સહિત સૌરાષ્ટ્ર વિસ્તાર માટે કુલ રૂ.247.92 કરોડના વિકાસ કામોની સૈદ્ધાંતિક મંજૂરી આપી છે.

મુખ્યમંત્રી શહેરી વિકાસ યોજનાના ફ્લાય ઓવર બ્રિજ ઘટક અંતર્ગત મુખ્યમંત્રીએ રાજકોટ મહાનગરમાં ચાર ફ્લાય ઓવર નિર્માણની મહાનગરપાલિકાની દરખાસ્તને સૈદ્ધાંતિક મંજૂરી આપી છે.

તદઅનુસાર, કુલ રૂ. 185.79 કરોડના અંદાજિત ખર્ચે રાજકોટમાં કટારીયા ચોકડી પર અંડરબ્રિજ અને ફ્લાય ઓવર બ્રિજના ફેઝ-2 નું કામ, રૈયા ગામથી સ્માર્ટ સિટીના ડી.પી. રોડ પર વોકળા બ્રિજ નિર્માણ, 150 ફૂટ રીંગ રોડ પર કટારીયા ચોકડીથી સ્માર્ટ સિટી જતા રોડ પર ત્રણ બ્રિજના વાઈડનીંગ કામ તેમજ ખોખળ દળ નદી ઉપર કોઠારીયા તથા લાપાસરીને જોડતા માર્ગ પર હાઇ લેવલ બ્રિજ બનાવવાના કામોનો સમાવેશ થાય છે.

મુખ્યમંત્રીએ રાજકોટ મહાનગરપાલિકાના ફ્લાય ઓવરના કામો સહિત સૌરાષ્ટ્રના ભાવનગર, શિહોર, ગોંડલ અને માળિયા-મિયાણા માટે પણ સ્વર્ણિમ જયંતિ મુખ્યમંત્રી શહેરી વિકાસ યોજનામાંથી વિકાસ કામો માટે રકમ ફાળવવા સૈદ્ધાંતિક અનુમોદન આપ્યું છે.

આ સંદર્ભમાં મુખ્યમંત્રી સમક્ષ શહેરી વિકાસ વિભાગની રજૂ થયેલી વિવિધ દરખાસ્તોમાંથી ભાવનગર વિસ્તાર વિકાસ સત્તામંડળના નવ ગામો પૈકીની સૂચિત નગર યોજના 31 અને વરતેજ ગામતળના વિસ્તારની ભૂગર્ભ ગટર યોજના માટે તેમણે 45.69 કરોડ રૂપિયા ફાળવવા અનુમતિ આપી છે.

એટલું જ નહીં, નગરોમાં આગવી ઓળખના કામો પણ સ્વર્ણિમ જયંતિ મુખ્યમંત્રી શહેરી વિકાસ યોજનામાં મંજૂર કરવામાં આવ્યા છે.

મુખ્યમંત્રી ભૂપેન્દ્ર પટેલે શિહોર નગરપાલિકામાં આવા આગવી ઓળખના કામ તરીકે ટાઉનહોલ બનાવવાના હેતુસર રૂ. 8 કરોડ 31 લાખ 50 હજારના કામોની સિદ્ધાંતિક મંજૂરી આપી છે. તેમણે ગોંડલ નગરપાલિકાને સ્પોર્ટ્સ કોમ્પલેક્ષ નિર્માણ માટે રૂ. 6 કરોડ 92 લાખ 84 હજારના કામો મંજૂર કર્યા છે.

‘ડ’ વર્ગની નગરપાલિકા માળિયા-મિયાણાને આઉટ ગ્રોથ વિસ્તારમાં સી.સી. રોડ બનાવવાના ચાર કામ માટે બે કરોડ રૂપિયાના કામોની અનુમતિ પણ મુખ્યમંત્રીએ આપી છે.

અત્રે ઉલ્લેખનીય છે કે, ગુજરાતની સ્થાપનાના 50 વર્ષ પૂર્ણ થવા અવસરે તત્કાલીન મુખ્યમંત્રી અને હાલના વડાપ્રધાન નરેન્દ્રભાઈ મોદીએ શહેરોની માળખાકીય સુવિધાઓને પરિપૂર્ણ કરવાના હેતુસર સ્વર્ણિમ જયંતિ મુખ્યમંત્રી શહેરી વિકાસ યોજના અમલી બનાવેલી છે.

વર્ષ 2009-10 થી 2023-24 સુધીમાં રૂ. 55 હજાર કરોડની બજેટ જોગવાઈઓ આ યોજના અન્વયે કરવામાં આવી છે. આ બજેટ ફાળવણી અન્વયે સ્વર્ણિમ જયંતિ મુખ્યમંત્રી શહેરી વિકાસ યોજનામાં ખાનગી સોસાયટી જન ભાગીદારી યોજના, આગવી ઓળખના કામો, મુખ્યમંત્રી શહેરી સડક યોજના, આઉટગ્રોથ એરિયા ડેવલપમેન્ટ કામો, મુખ્યમંત્રી શહેરી બસ પરિવહન સેવા, રેલવે ઓવરબ્રિજ-અંડરબ્રિજ નિર્માણ સહિતના જન સુખાકારીના કામો રાજ્યના નગરો-મહાનગરોમાં હાથ ધરવામાં આવે છે.

ગોંડલમાં સ્પોટર્સ કોમ્પ્લેક્ષ બનાવવા માટે રૂ. 6.92 કરોડનો ખર્ચ મંજૂર

ગોંડલમાં સ્પોટર્સ કોમ્પ્લેક્ષ બનાવવા માયે રાજય સરકાર દ્વારા રૂ. 6.92 કરોડનો ખર્ચ મંજૂર કરવામાં આવ્યો છે. રાજયમાં રમત ગમતના વિકાસને રાજય સરકાર દ્વારા સતત પ્રોત્સાહન આપવામાં આવી રહ્યું છે. રમતવીરોને યોગ્ય પ્લેટફોર્મ મળી રહે તેવું  સુદ્દઢ આયોજન ગોઠવાય રહ્યું છે. જે અંતર્ગત ગોડલ નગરપાલીકાને સ્પોટર્સ કોમ્પલેક્ષ બનાવવા માટે માતબર રકમની ફાળવણી કરવામાં આવી છે.