પાંચ રાજ્યો પૈકી આજે છત્તીસગઢ અને મિઝોરમમાં વિધાનસભા ચૂંટણી માટેની મતદાન પ્રક્રિયા શરુ થઈ ગઈ છે. છત્તીસગઢમાં બે તબક્કામાં મતદાન પ્રક્રિયા યોજાવાની છે જેમાં આજે પ્રથમ તબક્કા માટે મતદાન શરુ થઈ ગયું છે. 9 વાગ્યા સુધીમાં અહીં 9.93 ટકા મતદાન થયું છે જ્યારે મીઝોરમમાં પણ મતદાન પ્રક્રિયા સવારથી શરૂ છે. અહીં 9 વાગ્યા સુધીમાં 17.18 ટકા મતદાન થયું છે. ચૂંટણીનું પરિણામ 3 ડીસેમ્બરે જાહેર થશે. આ સિવાય રાજસ્થાન અને તેલંગાણામાં પણ આજ મહિનામાં મતદાન થવાનું છે તે સિવાય છત્તીસગઢના બીજા તબક્કા માટે પણ મતદાન કાર્યક્રમ યોજાશે. છત્તીસગઢમાં વિધાનસભાની 90માંથી 20 બેઠકો પર મતદાન થઈ રહ્યું છે.
છત્તીસગઢમાં 20 વિધાનસભા બેઠક ઉપર તથા મીઝોરમમાં 40 બેઠકો ઉપર જંગ: મતદાન મથકો ઉપર કડક સુરક્ષા વ્યવસ્થા
આ બેઠકો પર પૂર્વ મુખ્યમંત્રી રમણ સિંહ સહિત ભાજપ અને કોંગ્રેસના ઘણા દિગ્ગજ નેતાઓની વિશ્વસનીયતા દાવ પર છે. છેલ્લી વિધાનસભા ચૂંટણી નવેમ્બર 2018માં યોજાઈ હતી. જેમાં કોંગ્રેસનો વિજય થયો હતો અને ભૂપેશ બઘેલ રાજ્યના મુખ્યમંત્રી બન્યા હતા.છત્તીસગઢ વિધાનસભા ચૂંટણીના પ્રથમ તબક્કામાં 10 બેઠકો પર મતદાન સવારે 7 વાગ્યાથી બપોરે 3 વાગ્યા સુધી ચાલશે. બાકીની 10 બેઠકો પર સવારે 8 વાગ્યાથી સાંજે 5 વાગ્યા સુધી મતદાન થશે. પ્રથમ તબક્કામાં 20 બેઠકો પર 19,93,937 પુરુષ મતદારો, 20,84,675 મહિલા મતદારો અને 69 ત્રીજા લિંગના મતદારો તેમના મતાધિકારનો ઉપયોગ કરી શકશે. પ્રથમ તબક્કામાં કુલ 40,78,681 મતદારો છે.
મિઝોરમમાં 40 સીટો પર મતદાન યોજાઈ રહ્યું છે. રાજ્યમાં છેલ્લી વિધાનસભા ચૂંટણી નવેમ્બર 2018માં યોજાઈ હતી, જેમાં મિઝો નેશનલ ફ્રન્ટે જીત મેળવી હતી અને રાજ્યમાં સરકાર બનાવી હતી. ત્યારબાદ જોરમથાંગા મુખ્યમંત્રી બન્યા. રાજ્યમાં આજે મતદાન શરુ છે તે પહેલા વરિષ્ઠ નાગરિકો, દિવ્યાંગો અને સરકારી અધિકારીઓએ મતદાન કર્યું. સરકારી અધિકારીઓ પોસ્ટલ બેલેટ દ્વારા મતદાન કર્યું, તો વિકલાંગ લોકો અને વૃદ્ધને ઘરે બેસીને મતદાન કરવાની સુવિધા આપવામાં આવી છે. 5,306 વૃદ્ધ નાગરિકો, વિકલાંગ વ્યક્તિઓ અને સરકારી અધિકારીઓએ તેમના મતાધિકારનો ઉપયોગ કર્યો.
અધિકારીઓએ જણાવ્યું હતું કે મિઝોરમમાં 40 સભ્યોની વિધાનસભા ચૂંટણી માટે આજે સવારે 7 વાગ્યે કડક સુરક્ષા વ્યવસ્થા વચ્ચે મતદાન શરૂ થયું હતું. સાંજે 4 વાગ્યા સુધી મતદાન ચાલુ રહેશે. 4.39 લાખ મહિલાઓ સહિત 8.57 લાખથી વધુ મતદારો 174 ઉમેદવારોના ચૂંટણી ભાવિનો નિર્ણય કરવા માટે તેમના મતાધિકારનો ઉપયોગ કરી રહ્યા છે. સત્તાધારી મિઝો નેશનલ ફ્રન્ટ, મુખ્ય વિપક્ષ ઝોરામ પીપલ્સ મૂવમેન્ટ અને કોંગ્રેસે તમામ બેઠકો પર ઉમેદવારો ઉભા રાખ્યા છે. ભાજપ 23 બેઠકો પર ચૂંટણી લડી રહી છે, જ્યારે આમ આદમી પાર્ટીએ ચાર વિધાનસભા મતવિસ્તારો પર તેના ઉમેદવારો ઉભા રાખ્યા છે. આ સિવાય 27 અપક્ષ ઉમેદવારો પણ છે.
છત્તીસગઢમાં મતદાન સમયે આઈઇડી બ્લાસ્ટ, એક જવાન ઘાયલ
છત્તીસગઢમાં આજે પ્રથમ તબક્કા માટે મતદાન થઈ રહ્યું છે. આ દરમિયાન સુકમામાં આઈઇડી બ્લાસ્ટ થયો છે. આ પહેલા સોમવારે નક્સલવાદીઓએ કાંકેરમાં આઈઇડી બ્લાસ્ટ કર્યો હતો. પ્રાપ્ત માહિતી અનુસાર, સુકમાના એસપી કિરણ ચવ્હાણે જણાવ્યું કે, નક્સલવાદીઓએ સુકમાના ટોંડામાર્કા વિસ્તારમાં આઈઇડીબ્લાસ્ટ કર્યો છે. આ વિસ્ફોટમાં સીઆરપીએફ કોબ્રા બટાલિયનનો એક જવાન ઘાયલ થયો હતો. સૈનિક ચૂંટણી ફરજ પર તૈનાત હતો.
