અમેરિકાના ટેક્સાસમાં એક 18 વર્ષના યુવકે સ્કૂલમાં ગોળીબાર કર્યો હતો. જેમાં 21 લોકોએ જીવ ગુમાવ્યા હતા. મૃતકોમાં 19 બાળકો અને બે શિક્ષકોનો સમાવેશ થાય છે. જવાબી કાર્યવાહીમાં પોલીસે હુમલાખોરને ઠાર માર્યો હતો. સ્કૂલમાં ફાયરિંગ કરતા પહેલા હુમલાખોરે તેની દાદીને પણ ગોળી મારી દીધી હતી, તેમની હાલત હજુ પણ નાજુક છે. અમેરિકામાં આ પ્રકારનો હુમલો પહેલીવાર નથી થયો.
એક અહેવાલ મુજબ છેલ્લા પાંચ વર્ષમાં શાળાઓમાં ગોળીબારની 100થી વધુ ઘટનાઓ નોંધાઈ છે. જો સાર્વજનિક સ્થળો પર શૂટિંગની વાત કરીએ તો આ વર્ષે અમેરિકામાં આવી 200 થી વધુ ઘટનાઓ બની છે. હવે પ્રશ્ન એ થાય કે આટલા સમૃદ્ધ દેશમાં આવી ઘટનાઓ કેમ બને છે? આ પાછળનું કારણ શું છે?
યુએસમાં દર 100 નાગરિકો માટે 120.5 શસ્ત્રો છે. આ જ કારણ છે કે હવે અહીં આવી ઘટનાઓ સામાન્ય બની ગઈ છે. અમેરિકામાં બંદૂક રાખવાનો કાનૂની આધાર બંધારણના બીજા સુધારામાં સમાયેલ છે. ધ ગન કંટ્રોલ એક્ટ 1968 (જીસીએ) મુજબ, રાઈફલ અથવા કોઈપણ નાના હથિયાર ખરીદવા માટે વ્યક્તિની ઉંમર ઓછામાં ઓછી 18 વર્ષની હોવી જોઈએ. હેન્ડગન જેવા અન્ય હથિયારો ખરીદવા માટે વ્યક્તિની ઉંમર 21 વર્ષની હોવી જોઈએ. અહેવાલો અનુસાર, 330 મિલિયનની વસ્તીવાળા અમેરિકામાં સામાન્ય નાગરિકો પાસે 39 કરોડ હથિયાર છે.
નાગરિકો પાસે હથિયાર રાખવાની બાબતમાં ભારત 120મા ક્રમે છે. અહીં દર 100 લોકો માટે માત્ર 5.30 લોકો પાસે બંદૂક અથવા કોઈપણ આધુનિક હથિયાર છે. એકંદર આંકડાઓ પર નજર કરીએ તો 140 કરોડની વસ્તીમાં 7.11 કરોડ શસ્ત્રો છે.
તે જ સમયે, પાડોશી દેશ પાકિસ્તાન આ મામલે વિશ્વનો 22મો દેશ છે. અહીં 22 કરોડની વસ્તી પાસે ચાર કરોડ 39 લાખથી વધુ હથિયારો છે. સરળ શબ્દોમાં કહીએ તો પાકિસ્તાનના 100 નાગરિકોમાંથી 22.30 લોકો પાસે બંદૂકો છે.અફઘાનિસ્તાન આ મામલે 63મા ક્રમે છે. અહીં દર 100 નાગરિકોમાંથી 12.5 લોકો પાસે બંદૂક છે. એકંદર આંકડાઓ પર નજર કરીએ તો ચાર કરોડની વસ્તીમાં 40 લાખથી વધુ હથિયારો છે.
144 કરોડની વસ્તી ધરાવતા ચીનમાં દર 100 નાગરિકો પાછળ 3.60 બંદૂકો છે. અહીં સામાન્ય લોકો પાસે કુલ 4.97 કરોડ હથિયારો છે. શ્રીલંકા 169માં, મ્યાનમાર 179માં, નેપાળ 184માં, ભૂટાન 196માં અને બાંગ્લાદેશ 212માં ક્રમે છે.
સીડીસીના રિપોર્ટ અનુસાર, 2019માં યુ.એસ.માં કુલ 38 હજાર 355 લોકો ગોળી વાગવાથી મૃત્યુ પામ્યા હતા. તેમાંથી 23 હજાર 941 લોકોએ આત્મહત્યા કરી હતી, જ્યારે 14 હજાર 414 લોકોની ગોળી મારીને હત્યા કરવામાં આવી હતી. અકસ્માત અને લડાઈ વચ્ચે ગોળીબારમાં 1,352 લોકો માર્યા ગયા હતા.
વર્ષ 2020માં ગોળીબારની હત્યાના કેસમાં 43 ટકાનો વધારો થયો છે. ત્યારબાદ કુલ 19 હજાર 384 લોકોની હત્યા કરવામાં આવી હતી. સીડીસીના રિપોર્ટ અનુસાર અમેરિકામાં દરરોજ 53 લોકોને ગોળી મારીને મારી નાખવામાં આવે છે. આ જ રિપોર્ટમાં એવું પણ કહેવામાં આવ્યું છે કે અમેરિકામાં હત્યાઓમાં 79 ટકા લોકો ગોળીઓથી માર્યા જાય છે.
