વિમાની સેવાના ભાડા પર 15 ટકા વધારે ખર્ચ કરવો પડશે. કારણકે એરલાઈન્સ કંપનીઓ 10-15 ટકા ભાડુ વધારવા માટેનો વિચાર કરી રહી છે. હકીકતમાં ઓગસ્ટ મહિનાથી એવિએશન ટર્બાઈન ફ્યુઅલના ભાવમાં વધારો થઈ રહ્યો છે. ઓઈલ માર્કેટિંગ કંપનીઓએ એટીએફની કીમત 6 ટકા વધારવાનો નિર્ણય કર્યો છે. ડૉલરના મુકાબલે રૂપિયો સસ્તો થઈ રહ્યો હોવાના કારણે પ્લેનમાં વપરાતું ઈંધણ મોંઘુ થઈ રહ્યું છે.
તાજેતરમાં આવેલી વૃદ્ધી બાદ દિલ્હી માર્કેટમાં એટીએફ 3,025 પ્રતિ કિલો લીટર મોંઘુ થઈ ગયું છે અને આની કીમત 50,020 રૂપિયાથી વધીને 53,045 પ્રતિ કિલોલીટર થઈ ગઈ છે. એક જ મહિનામાં સતત ત્રીજીવાર ભાવ વધારો થયો છે. ગત મહિને એટીએફનો ભાવ પણ 4 ટકા વઘી ગયો છે.
જો કે એરલાઈન્સ કંપનીઓ ઓન રેકોર્ડ કશું જ કહી નથી રહી, પરંતુ એટીએફના ભાવો સતત વધવાના કારણે અને રૂપિયાનો ભાવ ઓછો થઈ રહ્યો હોવાની બેવડી અસરને પહોંચી વળવા માટે ભાડુ વધારવા સિવાય અન્ય કોઈ યોગ્ય વિકલ્પ એરલાઈન્સ કંપનીઓ પાસે નથી. ભાડુ ન વધારવાનો અર્થ એ થાય કે વર્તમાન એરલાઈન્સ કંપનીઓને પણ કિંગફિશર એરલાઈન્સ જેવી પરિસ્થિતીઓનો સામનો કરવો પડી શકે. એરલાઈન્સ સાથે જોડાયેલા સત્તાવાર સુત્રોના જણાવ્યા અનુસાર અમે લોકો ભાડુ વધારવા પર જલ્દી કોઈ નિર્ણય લઈશું, ફ્લાઈટને મેન્ટેઈન રાખવાનો ખર્ચ વધી ગયો છે જેથી અમારે આ રકમ યાત્રી પાસેથી જ વસુલવી પડશે.
