ભારણ વધતા હિમાલયની જમીન ધસી રહી છે!!
તજજ્ઞોની ટીમે સ્થળ પર જઈ તપાસ હાથ ધરી, સરકારને તપાસનો અહેવાલ આપ્યો
અબતક, નવી દિલ્હી : હિમાલય ઉપર ભારણ વધતા હવે ત્યાંની જમીન ધસી રહી છે. જોશીમઠ બાદ હવે બદ્રીનાથ હાઇવે ઉપર પણ તિરાડો પડી છે. તજજ્ઞોની ટીમે સ્થળ પર જઈ તપાસ હાથ ધરી છે અને સરકારને તપાસનો અહેવાલ પણ આપ્યો છે.
ઉત્તરાખંડના જોશીમઠ શહેરનું સંકટ બદ્રીનાથ હાઈવે સુધી પહોંચી ગયું છે. ચમોલી જિલ્લા મેજિસ્ટ્રેટ હિમાંશુ ખુરાનાએ જણાવ્યું કે બદ્રીનાથ હાઈવે પર તિરાડો પડી હોવાની જાણ થઈ છે. આ અંગે તજજ્ઞોની ટીમ સ્થળ પર મોકલવામાં આવી હતી. ટીમે તપાસ કરી તિરાડોનો અહેવાલ આપ્યો છે. આ પહેલા સોમવારે ડિઝાસ્ટર મેનેજમેન્ટ સેક્રેટરી ડૉ. રણજીત કુમાર સિંહાએ જોશીમઠમાં ચાલી રહેલા રાહત કાર્ય વિશે માહિતી આપી હતી.
ચમોલીના ડીએમ હિમાંશુ ખુરાનાએ જણાવ્યું કે સેન્ટ્રલ બિલ્ડીંગ રિસર્ચ ઈન્સ્ટિટ્યૂટની એક ટીમને સ્થળ પર તપાસ માટે મોકલવામાં આવી છે. તેમણે કહ્યું કે નિરીક્ષણ પર ટીમે કહ્યું કે અહીં તિરાડો જોવા મળી છે. ડીએમએ માહિતી આપી હતી કે ભારતીય હવામાન વિભાગ એ 24 અને 25 જાન્યુઆરીએ ભારે હિમવર્ષાની આગાહી કરી છે. આને ધ્યાનમાં રાખીને નોડલ અધિકારીઓને રાહત શિબિરોમાં ધાબળા, હીટર અને જનરેટર આપવા સૂચના આપવામાં આવી છે. તે જ સમયે, પબ્લિક વર્ક્સ ડિપાર્ટમેન્ટ અને બોર્ડર રોડ ઓર્ગેનાઈઝેશનને સતર્ક રહેવા અને હિમવર્ષાને કારણે થતા અવરોધોને દૂર કરવા માટે કહેવામાં આવ્યું છે.
વાસ્તવમાં જોશીમઠમાં સંકટને જોતા સ્થાનિક લોકોને સલામત સ્થળે ખસેડવામાં આવ્યા છે. કારણ કે ભૂસ્ખલનને કારણે ઘણાં મકાનો, હોટલ અને અન્ય જાહેર સંસ્થાઓમાં તિરાડો પડી ગઈ હતી. વડાપ્રધાન નરેન્દ્ર મોદીએ જોશીમઠની સ્થિતિ પર ચિંતા વ્યક્ત કરી હતી અને મુખ્ય પ્રધાન પુષ્કર સિંહ ધામી સાથે ટેલિફોનિક વાતચીત દરમિયાન રાહત અને બચાવ માટે રાજ્ય વહીવટીતંત્રને તમામ શક્ય મદદની ખાતરી આપી હતી.
જોશીમઠ અને ચમોલીના લોકોને આશ્રય આપવા વન, ટુ અને થ્રી બીએચકેના શેલટરોનું નિર્માણ શરૂ
આપત્તિ વ્યવસ્થાપન સચિવ ડૉ. રણજીત કુમાર સિંહાએ જણાવ્યું હતું કે જોશીમઠમાં 261 અસરગ્રસ્ત પરિવારોને વચગાળાની રાહત તરીકે 3.45 કરોડ રૂપિયાની રકમનું વિતરણ કરવામાં આવ્યું છે. એમ પણ કહ્યું કે જોશીમઠ નજીક સેન્ટ્રલ બિલ્ડીંગ રિસર્ચ ઇન્સ્ટિટ્યૂટ રૂરકી દ્વારા વન બીએચકે, ટુ બીએચકે અને થ્રી બીએચકે મોડેલ પ્રોટોટાઇપ પ્રિફેબ્રિકેટેડ શેલ્ટરનું નિર્માણ કાર્ય શરૂ કરવામાં આવ્યું છે.ચમોલીના ઢાંક ગામમાં વન બીએચકે, ટુ બીએચકે અને થ્રી બીએચકે મોડેલના પ્રોટોટાઈપ પ્રિફેબ્રિકેટેડ આશ્રયસ્થાનોના નિર્માણ માટે જમીન પસંદ કર્યા પછી, જમીનનું સ્તરીકરણ, વીજળી, પાણી, ગટર વગેરેની વ્યવસ્થા માટે કામ શરૂ થયું છે.
ટીહરીમાં પણ ઘરોમાં તિરાડો પડવા લાગી
ટિહરી જિલ્લાના નરેન્દ્રનગર પંથકના ઘણા ગામોમાં ઘરોમાં તિરાડો પણ દેખાઈ રહી છે. લોકો ગભરાટમાં છે. તેમનું કહેવું છે કે પ્રશાસને તેમની સમસ્યાઓ પર સમયસર ધ્યાન આપવું જોઈએ, નહીં તો અહીંની હાલત પણ જોશીમઠ જેવી થઈ જાય. ગામલોકોનું કહેવું છે કે ગામની નીચેથી પસાર થતી ઋષિકેશ-કર્ણપ્રયાગ રેલ્વે લાઇનમાં બ્લાસ્ટ થવાને કારણે ઘરોમાં તિરાડો પડી રહી છે. ટનલ પર થઈ રહેલા બ્લાસ્ટિંગને કારણે ઘરો ધ્રૂજી રહ્યાં છે.
