એક યુવાનનું અંતરિયાળ મૃત્યુ જ્યારે અન્ય બે ને ઇજા: પંચકોષી બી. ડિવિઝન પોલીસ કાફલો દોડતો થયો
જામનગર તા ૧૦ જામનગર નજીક ચેલા ચંગા રોડ પર આજે સવારે એક ડમ્પર અને ત્રિપલ સવારી બાઈક વચ્ચે ધડાકા ભેર અકસ્માત સર્જાયો હતો. જે અકસ્માતમાં એક યુવાનનું અંતરિયાળ મૃત્યુ નીપજ્યું છે, જ્યારે અન્ય બે યુવાનો ઘાયલ થયા છે.
આ બનાવની વિગત એવી છે કે પોરબંદર જિલ્લાના આદિત્યાણાના વતની અને હાલ જામનગર પંથકમાં આવીને રહેતા અરસીભાઇ હરભમભાઈ કેશવાલા (ઉંમર વર્ષ ૨૨) તેમજ તેની સાથેના અભય કેશવાલા (૨૨) તેમજ અરહાન મેર (ઉંમર વર્ષ ૨૧) કે જેઓ ત્રણેય
બાઈકમાં બેસીને આજે સવારે ચેલા ચંગાર રોડ પરથી પસાર થઈ રહ્યા હતા.
જે દરમિયાન પૂરપાટ ઝડપે આવી રહેલા એક ડમ્પર ના ચાલકે બાઈકને હડફેટમાં લઈ લેતાં ગોજારો અકસ્માત સર્જાયો હતો. જે અકસ્માતમાં ત્રણેય યુવાનોને નાની મોટી ઈજા થઈ હતી, અને ૧૦૮ નંબરની એમ્બ્યુલન્સ મારફતે સારવાર માટે જામનગરની જી.જી. હોસ્પિટલમાં ખસેડવામાં આવી રહ્યા હતા, જે દરમિયાન અરશીભાઈ કેશવાલા નું ગંભીર ઇજા થવાથી મૃત્યુ નીપજયું છે. જ્યારે અન્ય બે યુવાનો સારવાર હેઠળ છે.
સમગ્ર બનાવની જાણ થતાં પંચકોશી બી. ડિવિઝનના પોલીસ હેડ કોન્સ્ટેબલ શૈલુભા જાડેજા ઘટના સ્થળે તેમજ જી.જી. હોસ્પિટલે દોડી ગયા છે, અને વધુ તપાસ હાથ ધરી છે.
જામનગર: સાગર સંઘાણી