જામનગર સમાચાર
જામનગર સહિત રાજ્યની જેલોમાં રહેલા અને સજા પામેલા કેદીઓને જેલમાં માનસ સુધારણા પ્રવૃત્તિના ભાગરૂપે સજા પૂર્ણ કરી જેલમુક્ત થયાં બાદ તેઓ સમાજમાં પુનર્વસન પામી શકે, તેઓને જેલજીવન દરમ્યાન દૈનિક પ્રવૃત્તિ સાથે આર્થિક ઉપાર્જન પણ મળી રહે તેમજ તેઓના કૌશલ્યનો પણ વિકાસ થાય તેવા વિવિધ રચનાત્મક અને હકારાત્મક અભિગમ અન્વયે કેદીઓને તાલીમ સહ ઉત્પાદનના ધોરણે વિવિધ ઉદ્યોગલક્ષી કામગીરી સોંપી તૈયાર કરવામાં આવે છે.
આ કામગીરીના ભાગરૂપે કેદીઓને વર્ગીકૃત કરી બિનકુશળ, અર્ધકુશળ અને કુશળની યાદીમાં સમાવેશ કરવામાં આવેલ છે. જેમાં બિનકુશળ કેદીઓ માટે ૭૦ રૂપિયા., અર્ધકુશળ કેદીઓ માટે ૮૦ રૂપિયા.અને કુશળ કેદીઓ માટે ૧૦૦ રૂપિયા મુજબ માનદ વેતન ચૂકવવામાં આવતું હતું. જે રાજ્ય સરકારના માનવીય અભિગમ તથા અધિક પોલીસ મહાનિદેશકશ્રી ડૉ. કે. એલ. એન. રાવના અથાગ પ્રયત્નોથી સુધારો કરવામાં આવ્યો છે.
જેમાં સુધારો કરી બિનકુશળ કેદીઓ માટે ૧૧૦ રૂપિયા., અર્ધકુશળ કેદીઓ માટે ૧૪૦- રૂપિયા, અને કુશળ કેદીઓ માટે ૧૭૦ રૂપિયા. કરવામાં આવ્યા છે. જે બાબતે જામનગર જીલ્લા જેલ અધિક્ષકશ્રી એમ. એન. જાડેજા દ્વારા અત્રેની જેલમાં કામ કરતા કેદીઓને જાણ કરીને તેઓને કરાયેલા વેતન વધારા બાબતે વાકેફ કરવામાં આવ્યા છે, અને કેદીઓને મોં મીઠુ કરાવીને અભિનંદન પાઠવ્યા હતા.
સાગર સંઘાણી
