મનમાં ધ્યેય નકકી કરી લેશો તો ગમે તેવા પડકારોને પહોંચી શકશો: સૌરભસીંઘ
વીરાંગના સ્કવોડની મહિલાઓને બિરદાવતા કચ્છ પશ્ર્ચિમ જિલ્લા પોલીસ વડા
મનમાં ર્ધ્યય નકકી કરી લેશો તો આવનારા પડકારોને પહોંચી વળશો તેમ પશ્ર્ચિમ કચ્છ જિલ્લા પોલીસ વડા સૌરભસીંઘે ગુજરાત પોલીસ દળમાં ભરતીની તૈયારી કરનાર દિકરીઓને માર્ગદર્શન માટે યોજાયેલા મિશન ખાખી કાર્યક્રમમાં જણાવ્યું હતું.
પશ્ચિમ કચ્છ જિલ્લા પોલસ અધિક્ષક અને જિલ્લા મહિલા અને બાળ અધિકારીની કચેરીના સંયુકત ઉપક્રમે ભુજ પોલીસ તાલીમ ભવન ખાતે ‘મિશન ખાખી’ કાર્યક્રમ યોજાયો હતો.
પોલીસ અધિક્ષક સૌરભસિંઘની અધ્યક્ષતા હેઠળ યોજાએલા આ કાર્યક્રમમાં ગુજરાત પોલીસ દળ દ્વારા પોલીસ સબ ઈન્સપેકટર, ઈન્ટેલીજસ ઓફિસર અને મદદનીશ સબ ઈન્સ્પેકટર (હથિયાર, બિન હથિયારધારી) ની કુલ 431 મહિલાઓની ભરતી થનાર છે. કચ્છ જિલ્લાની દિકરીઓ માટે બેટી બચાવો, બેઢી પઢાઓ સેલ અન્વયે 50 ઉપરાંત દિકરીઓએ ઉપસ્થિત રહી માર્ગદર્શન મેળવ્યું હતું તેમજ કચ્છ મહિલા કચેરીના ફેસબુક લાઈવ પર અન્ય ભરતી માટે અરજી કરનાર દિકરીઓએ પણ મિશન ખાખી કાર્યક્રમમાં ભાગ લીધો હતો.
આ તકે પોલીસ અધિક્ષક સૌરભસિંઘે જણાવ્યું હતું કે, કોઇપણ જગ્યાની ભરતી માટે અરજી કરીએ ત્યારે તેનું લક્ષ્ય અને મહત્વ તેમજ ઉપયોગિતા જાણવી અગત્યનું પરિબળ છે. સમાજમાં પ્રજા સાથે સુરક્ષા સેતુ બનાવી શકીએ. પ્રજા અને જાહેર મિલકતની રક્ષા, કાયદાનો અમલ કરાવવો એ પોલીસની કામગીરી છે. કોઇપણ ઘટના કે ગુના પીડિત પોલીસ પાસે આવે તો તેને ન્યાયનો વિશ્વાસ આપવા પોલીસ ખાતું છે. પોલીસે ઘટના કે ગુનામાં પીડિતનો વિશ્વાસ સંપાદન કરવો જરૂરી છે એમ શ્રી સિંઘે જણાવ્યું હતું.પડકારો અને કાયદાઓની જવાબદારી વાળી આ સેવામાં શારીરિક સાથે માનસિક ક્ષમતા પણ મહત્વપૂર્ણ છે. મનમાં ધ્યેય નકકી કરી લેશો તો આવનારા પડકારોને પણ પહોંચી વળાશે.મહિલાઓની સુરક્ષા માટે આજથી ભુજ શહેરમાં કાર્યરત થતી વીરાંગના સ્પેશીયલ સ્કવોડની આઠ જાંબાજ મહિલાઓને પણ તેમણે આ તકે બિરદાવી હતી.જિલ્લા મહિલા અને બાળ કચેરીના અધિકારી અવનીબેન રાવલે આ તકે જણાવ્યું હતું કે, ગુજરાત પોલીસમાં ભરતી થવા માટે તૈયારી કરનાર મહિલાઓ માટે મિશન ખાખી કાર્યક્રમ મદદરૂપ થશે. મિશન ખાખીમાં અપાતું માર્ગદર્શન અને પરીક્ષાલક્ષી તૈયારી તેમના ઉજ્જવળ ભવિષ્યની તાલીમની સોનેરી તક છે જેમાં કચ્છની મહિલાઓએ ઉત્સાહ દેખાડયો છે.કચ્છના ડેપ્યુટી એસ.પી. બી.એમ.દેસાઇએ પ્રેરણાલક્ષી માર્ગદર્શન આપતા જણાવ્યું હતું કે, સમાજમાં યુનિફોર્મનો આગવો પ્રભાવ છે. દરેકને એનું માન હોવું જોઇએ. હિમ્મત રાખો અને લક્ષ્ય પર ધ્યાન કેન્દ્રિત કરો. સંપૂર્ણ પ્રયત્નોથી લક્ષ્ય સિધ્ધ અચૂક મળે છે.આ તકે આર.એસ.આઇ. એસ.એમ.ચૌહાણે ભરતીમાં શારીરિક કસોટી અંગે તલસ્પર્શી માર્ગદર્શન આપ્યું હતું. પોલીસ સબ ઈન્સ્પેકટરની લેખિત કસોટી માટે માંડવીના પી.એસ.આઇ. મયુરભાઇ પટેલે માર્ગદર્શન આપતા જણાવ્યું હતું કે, ખાખી ધારણ કરવી જ છે એ માઇન્ડ સેટ તૈયાર હશે તો અચૂક ખાખી પહેરી શકશો. મહેનત કરો.જયારે મદદનીશ સબ ઈન્સ્પેકટરની લેખિત કસોટી અંગે માર્ગદર્શન આપતા મદદનીશ સબ ઈન્સ્પેટકર શિવદીપસિંહ જાડેજાએ જણાવ્યું હતું કે, વારંવાર અભ્યાસ અને રીવીઝન પરીક્ષામાં મહત્વનું પરિબળ છે.આ તકે એસ.પી. સૌરભસિંઘે ભુજ શહેરમાં આજથી કાર્યરત થતી વીરાંગના સ્પેશીયલ સ્કવોડને લીલીઝંડી આપી પ્રસ્થાન કરાવ્યું હતું.આ તકે કોરોના વાયરસ કોવિડ-19ની ગાઇડલાઇન સાથે ગુજરાત પોલીસ દળમાં ભરતી તૈયારી કરનાર મહિલાઓ સાથે પશ્ર્ચિમ કચ્છ પોલીસના અને જિલ્લા મહિલા અને બાળ કચેરીના કર્મયોગીઓ તેમજ મીડિયાકર્મીઓ ઉપસ્થિત રહયા હતા.
