આ તો ઠગનો પણ બાપ નીકળ્યો!!
પીએમઓ ઓફિસનો અધિકારી હોવાનું જણાવી ઝેડ પ્લસ સિક્યોરિટી સાથે ફાઈવ સ્ટાર હોટેલમાં રોકાણ કર્યું, ઉરીની કમાન પોસ્ટથી એલઓસી અને શ્રીનગરના લાલ ચોક સુધી પોલીસ પ્રોટેકશનમાં ફર્યો, બાદમાં ભાંડો ફૂટ્યો કે આ તો ગુજરાતનો ઠગ છે!!
ઠગ તો અનેક આવ્યા, પણ ગુજરતના આ ઠગની કારીગરીએ સૌને ચોંકાવી દીધા છે. એક ગુજરાતી યુવકે અસલીને ટક્કર મારે તેવા સેક્રેટરી બની પોતે પીએમઓ કાર્યાલયમાં હોવાનું જણાવીને જમ્મુ કશ્મીરમાં “સરકારી” પ્રવાસ કર્યો. જેમાં તેણે આખા જમ્મુ કાશ્મીરના સરકારી તંત્રને પોતાના ઠાઠ માઠમાં વ્યસ્ત રાખ્યું હતું.
પીએમઓમાં એડિશનલ સેક્રેટરી તરીકે કાર્યરત હોવાનું જણાવી જમ્મુ-કાશ્મીરમાં પોલીસ પ્રોટેક્શન લઈને ફરતા ગુજરાતના નકલી અધિકારીની ધરપકડ કરી લેવામાં આવી હતી. આ આરોપીની ઓળખ કિરણ પટેલ તરીકે થઈ હતી. મામલો એમ છે કે આરોપી કિરણ પટેલે જમ્મુ-કાશ્મીરમાં પોતે પીએમઓ એટલે કે વડાપ્રધાનના કાર્યાલયથી આવ્યો હોવાનું કહીને સરકારી કર્મચારીઓને છેતર્યા હતા. એટલું જ નહીં અધિકારીઓ સાથે મીટિંગ પણ કરી હતી. હાલમાં તેની શ્રીનગર પોલીસ દ્વારા કલમ 419, 420, 468 અને 471 હેઠળ ધરપકડ કરી લેવામાં આવી છે.
માહિતી અનુસાર કિરણ પટેલ નામના આ ઠગ વ્યક્તિએ પોલીસ પ્રોટેક્શન પણ લઈ લીધું હતું અને તેને ફાઈવ સ્ટાર હોટલના રૂમની બહાર પણ પોલીસ ઊભી રખાઈ હતી. કડક સુરક્ષા બંદોબસ્ત સાથે તેણે શ્રીનગરના લાલચોકની તથા ગુલમર્ગની પણ મુલાકાત લીધી હતી. જમ્મુ-કાશ્મીર સીઆઈડીના ઈનપુટના આધારે શ્રીનગર પોલીસને કિરણ પટેલ નકલી અધિકારી હોવાની જાણ થઈ અને તેમણે હોટલમાંથી જ તેની ધરપકડ કરી લીધી હતી. આટલી મોટી બેદરકારી સામે આવતા હવે હાઈ-લેવલની તપાસના આદેશ આપી દેવામાં આવ્યા છે. ખાસ બાબત એ છે કે કિરણ પટેલ અગાઉ અમદાવાદમાં છેતરપિંડીના આક્ષેપો થઈ ચૂક્યા છે.
સૂત્રોએ જણાવ્યું કે, કિરણ પટેલ ગયા વર્ષે ઓક્ટોબરથી કાશ્મીર ખીણની મુલાકાતે હતો. તેની ધરપકડ કરવામાં આવે તે પહેલા તેણે ઉરીની કમાન પોસ્ટથી, એલઓસીની નજીક, શ્રીનગરના લાલ ચોક સુધી પોલીસ પ્રોટેક્શનમાં ફરી આવ્યો હતો. શ્રીનગરના નિશાત પોલીસ સ્ટેશનમાં નોંધાયેલી એફઆઈઆર મુજબ, તેણે સરકારી મેજબાનીની મજા માણી, તેને પર્સનલ સિક્યુરિટી ઓફિસર (પીએસઓ) અને લક્ઝરી હોટેલમાં રૂમમાં અપાયો હતો. હવે તેની સામે આઈપીસીની વિવિધ કલમો હેઠળ ગુનો નોંધી લેવાયો છે.
પુલવામાના ડેપ્યુટી કમિશનર બશીર ઉલ હક અને પોલીસ અધિક્ષક ઝુલ્ફીકાર આઝાદની જમ્મુ અને કાશ્મીર પોલીસ દ્વારા પૂછપરછ કરવામાં આવી હતી કે કથિત વ્યકિતને સમયસર કેવી રીતે પકડવામાં આવ્યો ન હતો. સૂત્રો મુજબ ગુજરાત પોલીસની એક ટીમ પણ તપાસમાં જોડાઈ હતી. જમ્મુ અને કાશ્મીર પોલીસ આ ઘટના અંગે મૌન છે. પરંતુ સૂત્રોએ જણાવ્યું હતું કે કેન્દ્રીય એજન્સીઓને તેની જાણ થાય તે પહેલા સીઆઈડી શાખાએ જ આ ભેજાબાજને શોધી કાઢ્યો હતો.
ઠગે ત્યાં અધિકારીઓ સાથે બેઠકો પણ કરી
પીએમઓ કાર્યાલયના અધિકારી હોવાની ઓળખ આપી કળા કરી જનાર કિરણ પટેલે જમ્મુ કાશ્મીરમાં પ્રવાસ ખેડયો તે દરમિયાન ત્યાંના તંત્રને તેઓએ ઉભા પગે રાખ્યુ હતું. આ ઉપરાંત તેને ત્યાં સરકારી અધિકારીઓ સાથે બેઠકો પણ યોજી હોવાનું જાણવા મળી રહ્યું છે.
