- હવે આ મહિલા મિસ યુનિવર્સ આર્જેન્ટિના પેજન્ટમાં ભાગ લેશે, તેમાં જો જીતી જશે તો મિસ યુનિવર્સની સ્પર્ધક બની જશે
આર્જેન્ટીનાની 60 વર્ષીય અલેજાન્દ્રા મેરિસા રોડ્રિગ્ઝે મિસ યુનિવર્સ બ્યુનોસ એરેસ 2024નો તાજ જીત્યો છે. 60 વર્ષની ઉંમરે તેમણે ઈતિહાસ રચ્યો છે. આટલી ઉંમરે આવો પ્રતિષ્ઠિત સન્માન મેળવનાર તે પ્રથમ મહિલા છે. તેણીની જીત મિસ યુનિવર્સ ઓર્ગેનાઈઝેશને સ્પર્ધકો માટેની વય મર્યાદા દૂર કર્યાના બરાબર એક વર્ષ પછી આવી છે. હવે 18 વર્ષથી ઉપરની કોઈપણ મહિલા સૌંદર્ય સ્પર્ધામાં ભાગ લઈ શકશે. અગાઉ 18 થી 28 વર્ષની મહિલાઓ જ સ્પર્ધામાં ભાગ લઈ શકતી હતી.
આ સ્પર્ધા જીત્યા પછી, તેણે કહ્યું, “આ સૌંદર્ય સ્પર્ધા જીત્યા પછી હું ખૂબ જ ઉત્સાહિત છું, કારણ કે અમે એક નવો તબક્કો શરૂ કરી રહ્યા છીએ જેમાં મહિલાઓ માત્ર શારીરિક રીતે સુંદર નથી, પરંતુ તેમના મૂલ્યોને પણ એક અલગ સ્તર પર લઈ જશે.”
અલેજાન્દ્રા મેરિસા રોડ્રિગ્ઝ આર્જેન્ટીનાના બ્યુનોસ આયર્સ પ્રાંતની રાજધાની લા પ્લાટાની છે. તેઓ વકીલ અને પત્રકાર છે. તે આ વર્ષે મિસ યુનિવર્સ બ્યુનોસ એરેસ 2024ની વિજેતા બની છે. હવે રોડ્રિગ્ઝ મે મહિનામાં મિસ યુનિવર્સ આર્જેન્ટિના પેજન્ટમાં બ્યુનોસ એરેસનું પ્રતિનિધિત્વ કરવાની તૈયારી કરી રહી છે. જો તેણી જીતે છે, તો તે 28 સપ્ટેમ્બર, 2024 ના રોજ મેક્સિકોમાં મિસ યુનિવર્સ વર્લ્ડ કોમ્પિટિશનમાં આર્જેન્ટિનાના ધ્વજ સાથે સ્પર્ધા કરશે. એલેજાન્ડ્રા મેરિસા રોડ્રિગ્ઝ સોશિયલ મીડિયા પર ખૂબ જ એક્ટિવ રહે છે અને ઘણી વાર પોતાના જીવન સાથે જોડાયેલી વાતો શેર કરે છે. આ સિવાય તે ઈન્સ્ટાગ્રામ પર પણ પોતાની સિદ્ધિઓ શેર કરતી રહે છે. આવો પ્રતિષ્ઠિત સૌંદર્ય પુરસ્કાર મેળવનારી તે આ ઉંમરની પ્રથમ મહિલા બની છે. તેણીની સુંદરતાએ જજો અને પ્રેક્ષકો બંનેને મોહિત કર્યા હતા. ઉલ્લેખનીય છે કે અત્યાર સુધી નાની વયની યુવતીઓ પોતાની સુંદરતાથી અનેક ઇવેન્ટ જીતતી હતી પણ આ મહિલાએ વૃદ્ધાવસ્થામાં પણ યુવતીઓને હરાવીને મોટો ખિતાબ મેળવ્યો છે.
