- સંગઠન મહામંત્રી રત્નાકરજી અને સાંસદ-મહામંત્રી વિનોદભાઇ ચાવડા 15 જિલ્લાના પ્રમુખ અને પ્રભારીઓને સંગઠનલક્ષી માર્ગદર્શન આપશે
રાજ્યના અલગ-અલગ 35 જિલ્લા અને મહાનગરોમાં ભાજપ દ્વારા પ્રમુખના નામની ઘોષણા કરી દેવાયા બાદ હવે સંગઠન રચનાની કામગીરી હાથ પર લેવામાં આવનાર છે. તમામ જિલ્લા અને મહાનગરોમાં નવી સંગઠન ટીમ બનાવવાનો ધમધમાટ પણ શરૂ કરી દેવામાં આવ્યો છે. આગામી બુધવારે બપોરે રાજકોટ શહેર ભાજપ કાર્યાલય કમલમ્ ખાતે સૌરાષ્ટ્ર ઝોનની સંગઠન બેઠક મળશે. જેમાં નવ નિયુક્ત પ્રમુખોની સંગઠનલક્ષી માર્ગદર્શન આપવામાં આવશે.
આવતા વર્ષના આરંભે રાજ્યની 6 મહાનગરપાલિકા ઉપરાંત નવરચિત 9 મહાનગરપાલિકા સાથે 31 જિલ્લા પંચાયતની ચુંટણી યોજાવાની છે. જેને ધ્યાનમાં રાખી ભાજપ દ્વારા સંગઠનને વધુ મજબૂત બનાવવા પર ધ્યાન કેન્દ્રીત કરવામાં આવી રહ્યું છે. ટૂંક સમયમાં નવા પ્રદેશ અધ્યક્ષના નામની ઘોષણા થઇ જશે. આગામી બુધવારે રાજકોટમાં ભાજપની સૌરાષ્ટ્ર ઝોનની બેઠક મળશે. જેમાં અલગ-અલગ 15 જિલ્લાના નવ નિયુક્ત પ્રમુખ અને પક્ષના પ્રભારીઓ ઉપરાંત અપેક્ષિતો ઉપસ્થિત રહેશે. આ બેઠકમાં પ્રદેશ ભાજપના સંગઠન મહામંત્રી રત્નાકરજી અને કચ્છના સાંસદ વિનોદભાઇ ચાવડા તમામ નવ નિયુક્ત પ્રમુખોને સંગઠનલક્ષી માર્ગદર્શન આપશે. નવી ટીમ બનાવવા માટે જ્ઞાતિ-જાતિના સમિકરણોને ધ્યાનમાં રાખી નિર્ણય લેવા સહિતની મહત્વપૂર્ણ માહિતી આપવામાં આવશે. સાથોસાથ વિવિધ મોરચાની રચના અંગે પણ પ્રાથમિક ચર્ચા-વિચારણાં કરવામાં આવે તેવી શક્યતા રહેલી છે.
શહેર ભાજપ મહામંત્રી પદ માટે એક ડઝનથી વધુ દાવેદારો
- યુવા મોરચાના પ્રમુખ કિશન ટીલવાને પ્રમોશન મળે તેવી શક્યતા: ઝાલા અને મોલિયાને રિપીટ કરાશે કે આખી ટીમ જ નવી હશે? કાર્યકરોમાં ચર્ચા
રાજકોટ શહેર ભાજપ પ્રમુખ તરીકે માધવ દવેની વરણી કરવામાં આવી છે. હવે ભાજપના કાર્યકરો નવી શહેર ભાજપની ટીમની કાગડોળે રાહ જોઇ રહ્યા છે. પ્રમુખ પદ બાદ મહત્વના હોદ્ા ગણાતા મહામંત્રી પદ માટે એકાદ ડઝનથી વધુ દાવેદારો મેદાનમાં હોવાનું માનવામાં આવી રહ્યું છે. કેટલાંક નેતાઓએ સંગઠનમાં મહત્વપૂર્ણ સ્થાન મેળવવા માટે અત્યારથી જ લોબિંગ શરૂ કરી દીધું હોવાનું જાણવા મળી રહ્યું છે. માધવ દવે પોતાની ટીમમાં અનુભવી સાથે યુવા ચહેરાઓનો સમાવેશ કરે તેવી સંભાવના જણાઇ રહી છે. પ્રથમવાર મહિલાને મહામંત્રીનું પદ મળી શકે તેવી શક્યતા પણ હાલ નકારી શકાતી નથી. મંત્રી પદ માટે યુવા ભાજપના વર્તમાન પ્રમુખ કિશન ટીલવા સૌથી વધુ પ્રબળ દાવેદાર માનવામાં આવી રહ્યા છે. વિશ્ર્વસનીય સૂત્રો તો એવું પણ કહી રહ્યા છે કે મહામંત્રી પદે વિરેન્દ્રસિંહ ઝાલા અને અશ્ર્વિનભાઇ મોલિયાને રિપીટ કરવામાં આવશે. ટીમ મુકેશ દોશીમાં માધવ દવે મોટા ફેરફાર કરવાના મૂડમાં ન હોય તેવું લાગી રહ્યું છે. આ ઉપરાંત મહામંત્રી પદ માટે મહેશ રાઠોડ, હરેશ કાનાણી, વિજય પાડલીયા સહિતના અનેક નામો ચર્ચામાં છે. સંગઠનની ટીમ તૈયાર થયા બાદ પ્રદેશમાંથી સૂચના મળ્યા પછી વિવિધ મોરચાના પ્રમુખ અને મહામંત્રીના નામ જાહેર કરવામાં આવશે.
