- રિટર્ન ભરવાના માળખાને ફોર્મ્યુલા સાથે બદલવામાં આવશે અને ભાષા પણ સરળ બનાવાશે, ટેક્સ રિટર્ન ફાઈલ કરવા માટેના વધારાના ફોર્મની સંખ્યામાં ઘટાડો થશે
ભારતીય આવકવેરા પ્રણાલી વિશ્વની સૌથી જટિલ પદ્ધતિમાંની એક છે. વિવિધ પ્રકારના કર સ્તર, છૂટ અને કપાતનો દાવો કરી શકાય છે, જે કરદાતાઓ માટે તેમના પર કેટલો કર બાકી છે તે જાણવું મુશ્કેલ બનાવે છે જો કે હવે કરદાતાઓ માટે આગામી દિવસોમાં આવકવેરા રિટર્ન ફાઈલ કરવું ખૂબ જ સરળ બની શકે છે. કેન્દ્ર સરકાર આવકવેરા રિટર્ન ભરવાના નિયમોને ખૂબ જ સરળ બનાવવાની તૈયારી કરી રહી છે. સરકાર વધતા ટેક્સ વિવાદોથી ખૂબ જ ચિંતિત છે અને લગભગ 120 બિલિયન ડોલર જેટલી ટેક્સની બાબતો વિવાદ હેઠળ છે. સેન્ટ્રલ બોર્ડ ઓફ ડાયરેક્ટ ટેક્સિસે પણ આવકવેરા અધિનિયમ 1961ની સમીક્ષા કરવા માટે એક આંતરિક સમિતિની રચના કરી છે. સીબીડીટી કમિટી સૂચિત આવકવેરા અધિનિયમ 1961ની સમીક્ષા કરવા માટે સતત વિચારણા કરી રહી છે અને એવું માનવામાં આવે છે કે જાન્યુઆરી 2025ના મધ્ય સુધીમાં જાહેર પરામર્શ માટે ડ્રાફ્ટ રિપોર્ટ બહાર પાડવામાં આવી શકે છે. સરકાર 1 ફેબ્રુઆરી, 2025ના રોજ રજૂ થનારા બજેટમાં પ્રસ્તાવિત બિલ વિશે માહિતી જાહેર કરી શકે છે. રિપોર્ટ અનુસાર, આવકવેરા કાયદાની ભાષાને સરળ બનાવીને, ફોમ્ર્યુલા અને કોષ્ટકો સંબંધિત માહિતીને તર્કસંગત બનાવી શકાય છે અને તેમાં ટેક્સના દરો અને નીતિઓનો કોઈ ઉલ્લેખ રહેશે નહીં જો કે નાણા મંત્રાલયે આ સમાચાર અંગે મોકલેલા ઈમેલનો જવાબ આપ્યો નથી. કરદાતાઓ પર અમલદારશાહીનો બોજ ઘટાડવા કર કાયદાઓને આધુનિક બનાવી રહી છે તેમ છતાં ટેક્સ વિવાદો સંબંધિત કેસ બમણા વધીને રૂ. 10.5 લાખ કરોડ એટલે કે 123 અબજ ડોલર થઈ ગયા છે.
નાણા પ્રધાન નિર્મલા સીતારમણે, જુલાઈમાં નાણાકીય વર્ષ 2024-25 માટેનું બજેટ રજૂ કરતી વખતે, છ મહિનામાં આવકવેરા કાયદાની વ્યાપક સમીક્ષા કરવાની જાહેરાત કરી હતી અને તેને કરદાતા-મૈત્રીપૂર્ણ બનાવવાની ખાતરી આપી હતી. સંભવિત ફેરફારોમાં, આવક કમ્યુટેશન માળખાને ફોમ્ર્યુલા સાથે બદલવામાં આવશે. કર કાયદા હેઠળ નાણાકીય વર્ષ અને મૂલ્યાંકન વર્ષ કહેવાની પ્રથા બદલવામાં આવશે અને તેને કરવેરા વર્ષ તરીકે વ્યાખ્યાયિત કરવામાં આવશે. આ સિવાય ટેક્સ રિટર્ન ફાઈલ કરવા માટેના વધારાના ફોર્મની સંખ્યામાં ઘટાડો થશે. કરદાતાઓને ડિપાર્ટમેન્ટ દ્વારા મોકલવામાં આવેલી નોટિસની ભાષા સરળ અને નોન-ટેક્નિકલ બનાવવા જણાવ્યું હતું જેથી કરદાતાઓ તેને સરળતાથી સમજી શકે અને ટેક્સ ડિપાર્ટમેન્ટને જવાબ આપવા માટે તેમને વકીલો રાખવાની જરૂર ન પડે. નાણામંત્રીએ વધુમાં જણાવ્યુ હતું કે, આપણે આપણા કરદાતાઓ સાથે ખૂબ જ સરળ ભાષામાં વાત કરવી જોઈએ.
