ફલાવર શોમાં ખાદી માટે ખાસ સ્ટોલ ઉભો કરાશે: મેયર
ગત વર્ષે યોજાયેલા ફલાવર શોને મળેલા અભૂતપૂર્વ સમર્થન બાદ કોર્પોરેશન દ્વારા રેસકોર્સ સંકુલ ખાતે આગામી ૧ થી ૪ ફેબ્રુઆરી દરમિયાન ફલાવર શોનું આયોજન કરવામાં આવ્યું છે.ફલાવર શોની જાહેરાત કરતો તથા પર્યાવરણ જનજાગૃતિ ફેલાવતો ટેબ્લો આગામી ચાર દિવસ સુધી શહેરના મુખ્ય માર્ગો પર ફરશે. ફલાવર શોમાં મુખ્યત્વે ખાદીને પ્રમોટ કરવામાં આવશે તેમ આજે પત્રકારો સાથે વાતચીત દરમિયાન મેયર ડો.જૈમનભાઈ ઉપાધ્યાયે જણાવ્યું હતું.
તેઓએ વધુમાં ઉમેર્યું હતું કે, ૧ થી ૪ ફેબ્રુઆરી દરમિયાન યોજાનારા ફલાવર શોને સફળતા સાંપડે અને શહેરીજનો બહોળી સંખ્યામાં ફલાવર શોમાં ઉમટી પડે તે માટે આજ સાંજથી ફલાવર શોનો એક ટેબ્લો શહેરના રેસકોર્સ રીંગ રોડ સહિતના મુખ્ય રાજમાર્ગો પર ફરશે અને ફલાવર શોની જાહેરાત સાથે સાથે પર્યાવરણ જાગૃતિમાં પણ સંદેશો ફેલાવશે. આ વખતે ફલાવર શોમાં ખાદીને પણ પ્રમોટ કરવામાં આવશે. જેનાથી ખાદીનું વેચાણ અને ઉધોગ વધે અને ભંડોળ દેશમાં રહે તથા લાખો લોકોને રોજગારી મળે આ માટે ફલાવર શોમાં ખાદીનો એક ખાસ સ્ટોલ ઉભો કરવામાં આવશે.
