- શાહિદ કપૂરની ’ફર્ઝી’ વેબસિરીઝને ટક્કર મારે તેવી ઘટના
- 247 નકલી ચલણી નોટો પકડી આંતરરાજ્ય કૌભાંડનો પર્દાફાશ કરતી સોલા પોલીસ
બોલીવુડ અભિનેતા શાહિદ કપૂરની વેબસિરીઝ ’ફર્ઝી’ને ટક્કર મારે તેવી ઘટના અમદાવાદથી સામે આવી છે. કલર પ્રિન્ટરમાં રૂપિયા 500ના દરની ચલણી નોટો છાપીને વટાવવા માટે મધ્યપ્રદેશથી અમદાવાદ આવેલ 6 આરોપીઓની સોલા પોલીસે ધરપકડ કરી છે. આરોપી પાસેથી પોલીસે 247 નકલી નોટો કબજે કરી છે. દિલ્હીમાં રૂપિયા 100ના દરની નોટો વટાવવામાં સફળ થતાં આરોપીઓએ રૂપિયા 500ની નોટો છાપી હતી.
સોલા પોલીસે ચાણક્યપુરી શાક માર્કેટમાંથી રૂપિયા 500ના દરની બનાવટી ચલણી નોટો સાથે 6 આરોપીઓની ધરપકડ કરી છે. પોલીસે મધ્યપ્રદેશના ભિંડ જિલ્લાના વતની ઉમેશ ઉર્ફે અનુરાગ જાટવ, દીપક ઉર્ફે બાદશાહ, વિકાસ જાટવ, ઉમેશ જાટવ, ધર્મેન્દ્ર જાટવ, ઋષિકેશ જાટવ નામના છ આરોપીઓને ઝડપી લીધા છે.
બનાવની જો વિગતવાર વાત કરીએ તો, આરોપીઓ રૂપિયા 500ની નોટને સ્કેન કર્યા બાદ કલર પ્રિન્ટરમાં પ્રિન્ટ કરતા હતા. બાદમાં તેના પર ગ્રીન પટ્ટી પણ લગાવી દેતા હતા. મધ્યપ્રદેશથી તેઓ માત્ર નોટો વટાવવા માટે અહીં આવ્યા હતા. અમદાવાદ સિટીમાં રાત્રીના સમયે ભીડભાડ વાળા વિસ્તારમાં નોટો વટાવવાનું નક્કી કર્યું હતું. જોકે પોલીસને બાતમી મળતા પોલીસે તેઓને ઝડપી લીધા છે.
આ સમગ્ર નેટવર્કનો માસ્ટર માઈન્ડ ઉત્તરપ્રદેશનો યોગેશ છે. જે હાલમાં આ કેસમાં વોન્ટેડ છે. દીપકે ઉમેશ ઉર્ફે અનુરાગને તેના સાળા અભિષેકના સાઢુ યોગેશ સાથે મુલાકાત કરાવી હતી. ઉમેશ ઉર્ફે અનુરાગ, વિકાસ અને અન્ય એક આરોપી સાથે મળીને યોગેશના સહકારથી અગાઉ રૂપિયા 100 દરની ચલણી નોટો છાપી હતી. ત્યારબાદ 25 જેટલી નોટો વિકાસ અને ઉમેશે દિલ્હી ખાતે જઈને વટાવી હતી. જ્યારે બાકીની 35 નોટો વિકાસ, દીપક, ઉમેશ ઉર્ફ અનુરાગ અને ઉમેશ રાજકુમારે તેમના જ વતનમાં વટાવી દીધી હતી. 100ની બનાવટી નોટો વટાવવામાં સફળ રહેતા 500ની નોટ પ્રિન્ટ કરી ગ્રીન પટ્ટી લગાવી
રૂપિયા 100ની બનાવટી નોટો વટાવવામાં તેઓ સફળ થતાં બાદમાં તેમણે રૂપિયા 500ની નોટને છાપવા માટેનો પ્લાન કર્યો હતો. ત્યારબાદ ઉમેશ ઉર્ફે અનુરાગ અને વિકાસ બંનેએ મળીને વિકાસના કાકા જયવીર પાસેથી કલર ઝેરોક્ષ કાઢવાની હોવાનું કહીને કલર પ્રિન્ટર લઈ આવ્યા હતા. જેમાં રૂપિયા 500ના દરની બનાવટી ચલણી નોટો પ્રિન્ટ કરીને કટીંગ કરી તેમાં ગ્રીન પટ્ટી લગાવી હતી.
અલગ- અલગ લારીઓ પર ફર્ઝી નોટ વટાવી લેવાની ફિરાકમાં હતા
આ આરોપીઓ શાકમાર્કેટ જેવા ભીડવાળા વિસ્તારોમાં એક-એક ચલણી નોટો વટાવવાની ફિરાકમાં હતા. જોકે હવે સમગ્ર મામલે પોલીસે ઘટનાની ગંભીરતાને ધ્યાનમાં રાખીને આરોપીઓએ અત્યાર સુધીમાં આ સિવાય અન્ય કોઈ જગ્યાએ બનાવટી ચલણી નોટો વટાવી છે કે કેમ અને કેટલા પ્રમાણમાં નોટો પ્રિન્ટ કરી છે તે અંગે વધુ તપાસ હાથ ધરી છે.