ટંકારા નજીક કમ્ફર્ટ હોટલમાં અલગ અલગ રૂમ રાખી કોઈન ઉપર ચાલતું જુગારધામ ઝડપાયું

• ટંકારા પોલીસે હોટલના પાર્કિંગમાં કારમાં જુગારની ક્લબનું નેટવર્ક ચલાવતા બે ઇસમોને ઝડપી લીધા,બે કાર સહિત 63.15 લાખનો મુદ્દામાલ જપ્ત

ટંકારા પોલીસ ટીમે પૂર્વ બાતમીને આધારે મોરબી ટંકારા હાઇવે ઉપર આવેલ હોટલમાં કોઈન ઉપર ચાલતા જુગારધામ ઉપર દરોડો પાડી અલગ જુગાર રમવા માણસોને લાવનાર તથા ફોર્ચ્યુનર કારમાં રોકડ રકમ સાચવનાર 2 ઈસમો સહિત કુલ 9 શખ્સોને ઝડપી લેવામાં આવ્યા છે, ટંકારા પોલીસે સ્થળ ઉપરથી બે કાર 50 લાખ, 12 લાખ રોકડા જુગરીઓને 8 નંગ મોબાઇલ 1.15 લાખ સહિત 63.15 લાખનો મુદ્દામાલ જપ્ત કરી સમગ્ર મોરબી પંથકમાં ખળભળાટ મચાવી દીધો છે.

પ્રાપ્ત માહિત મુજબ ટંકારા પોલીસ સ્ટેશનના પીઆઈ વાય.કે.ગોહિલ સહિત પોલીસ ટીમ નાઈટ રાઉન્ડ કોમ્બીંગ હોય તે દરમ્યાન પોલીસ ઈન્સપેક્ટર વાય.કે.ગોહિલને ખાનગીરાહે બાતમી મળેલ કે, મોરબી ટંકારા હાઈ-વે પર આવેલ કમ્પફર્ટ હોટલમા અલગ અલગ નામથી રૂમ ભાડેથી રાખી અમુક વ્યક્તિઓ રોકડ રૂપિયા હોટલ બહાર ગાડીમાં રાખી હોટલના રૂમમાં અલગ અલગ કલર તથા તેના પર અલગ અલગ આંકડા લખેલ પ્લાસ્ટીકના કોઈન વડે તીનપત્તીનો જુગાર રમી રહ્યા છે. જે બાતમી આધારે કમ્પફર્ટ હોટેલમાં દરોડો પાડતા હોટલના પાર્કીંગમાંથી બાતમી મુજબની કાર મળી આવેલ અને તેમા 2 ઈસમો બેસેલ જોવામા આવેલ જેઓને યુક્તિ પ્રયુક્તિથી પુછપરછ ગાડીમાંથી રોકડા 12 લાખ રૂપિયા કાઢી આપેલ હતા બાદ હોટલના રૂમમાં  રેઈડ કરતા પ્લાસ્ટીકના કોઈન વડે તીનપત્તિનો જુગાર રમતા ઈસમોને પકડી પાડ્યા હતા.

ટંકારા પોલીસે સ્થળ ઉપરથી 12 લાખ રોકડા, કાર કિ.રૂ. 25લાખ તથા બીજી કારમાં  કિ.રૂ.25લાખ, 9 આરોપીઓના 8 નંગ મોબાઇલ કિ.રૂ.1.15 લાખ સહિત કુલ રૂ.63.15 લાખનો મુદ્દામાલ કબ્જે કર્યો હતો.   હાલ તમામ આરોપીઓ સામે જુગારધારા હેઠળ ગુનો નોંધી કાયદેસરની કાર્યવાહી કરવામા આવી છે.