- ભારતીયોની માથાદીઠ આવક 75 વર્ષમાં 2730 ડોલર વધી, હવે આગામી પાંચ વર્ષમાં તેમાં 2000 ડોલરનો વધારો થશે: સરકારના પ્રયાસોને કારણે નાગરિકોના જીવન ધોરણમાં સૌથી ઝડપી સુધારો આવી રહ્યો છે
- ભારતમાં આગામી પાંચ વર્ષમાં લોકોની માથાદીઠ આવક લગભગ બમણી થશે. સરકાર દ્વારા હાથ ધરવામાં આવેલા સુધારાઓને કારણે નાગરિકોના જીવનધોરણમાં સૌથી ઝડપી સુધારો જોવા મળશે તેવું નાણાપ્રધાન નિર્મલા સીતારમણે જણાવ્યું હતું.
નાણામંત્રી નિર્મલા સીતારમણે કહ્યું છે કે આવનારા સમયમાં એક સામાન્ય ભારતીયના જીવનધોરણમાં મોટો સુધારો થવાનો છે. સરકારની આર્થિક નીતિઓ, ઝડપી આર્થિક વિકાસ દર, યુવા શક્તિની વધતી સંખ્યા, ટેક્નોલોજી પર ભાર અને અમુક અંશે વર્તમાન વૈશ્વિક પરિસ્થિતિ એ એવા પરિબળો છે જે સામાન્ય ભારતીયોના જીવનની ગુણવત્તામાં સુધારો કરશે.
ત્રીજા કૌટિલ્ય ઇકોનોમિક કોન્ક્લેવને સંબોધતા નાણામંત્રીએ એમ પણ કહ્યું હતું કે તેમની સરકાર આ વર્ષે રાજકોષીય ખાધને 4.9 ટકા સુધી ઘટાડવા માટે પ્રતિબદ્ધ છે અને તેની સાથે સરકારી ખર્ચની ગુણવત્તામાં સતત સુધારો કરવાના પ્રયાસો પણ કરવામાં આવશે જેથી દેશને નાણાકીય શિસ્ત સુધારી શકાય છે.નાણામંત્રીએ આઈએમએફના તાજેતરના અંદાજનો ઉલ્લેખ કર્યો હતો જેમાં કહેવામાં આવ્યું હતું કે ભારતીયોની માથાદીઠ આવક 75 વર્ષમાં 2730 ડોલર વધી છે પરંતુ આગામી પાંચ વર્ષમાં તેમાં બે હજાર ડોલરનો વધારો થશે.
આઝાદીની 100મી વર્ષગાંઠ સુધીમાં ભારતીયોને વિકસિત દેશ જેવું વાતાવરણ મળશે
સીતારમણે કહ્યું કે અમારી સરકાર થોડા વર્ષોમાં ભારતીયોની માથાદીઠ આવક બમણી કરવાની યોજના પર કામ કરી રહી છે. આ પ્રયાસ એવા સમયે કરવામાં આવી રહ્યો છે જ્યારે વૈશ્વિક સ્તરે ઘણી અસ્થિરતા છે અને વર્તમાન તણાવ વધુ વકરવાની સંભાવના છે. તેમણે વિશ્વાસ વ્યક્ત કર્યો કે ભારતીયોનું જીવનધોરણ ખૂબ જ ઝડપથી સુધરવાનું છે અને આ ભારતીયો માટે જીવન જીવવાનો ઐતિહાસિક સમયગાળો હશે.વર્ષ 2047માં જ્યારે ભારત તેની આઝાદીની 100મી વર્ષગાંઠ ઉજવશે ત્યારે ભારતીયોને એક વિકસિત દેશ જેવું વાતાવરણ મળશે.
આગામી બે દાયકા સુધી યુવાનોની સંખ્યા વધતી રહેશે, તેનો લાભ મળશે
સીતારમણે કહ્યું કે ભારતમાં આગામી બે દાયકા સુધી યુવાનોની સંખ્યામાં વધારો થશે, જ્યારે આ સમયગાળા દરમિયાન ઘણા વિકાસશીલ દેશોની વસ્તીમાં વૃદ્ધોની સંખ્યામાં વધારો થશે. તેનાથી ભારતમાં વપરાશ, ઉત્પાદકતા અને રોકાણમાં વધારો થશે. મધ્યમ વર્ગની ઝડપથી વધતી સંખ્યા વપરાશમાં વધારો કરશે. સંશોધનમાં ભારતની ક્ષમતા ઝડપથી વધી રહી છે. સેવા ક્ષેત્રે ભારતની સિદ્ધિ આનું પરિણામ છે.
ભારતનું નાણાકીય ક્ષેત્ર ખૂબ જ મજબૂત સ્થિતિમાં
નાણામંત્રીએ કહ્યું કે ભારતનું નાણાકીય ક્ષેત્ર ખૂબ જ મજબૂત સ્થિતિમાં છે જે નવી જરૂરિયાતો માટે નાણાકીય સંસાધનો પ્રદાન કરવા માટે તૈયાર છે. આ સાથે ભારતને વૈશ્વિક પરિસ્થિતિમાંથી પણ મદદ મળશે. ભારત વ્યૂહાત્મક ક્ષેત્રો માટે એક મજબૂત અને અદ્યતન સપ્લાય ચેઇન તરીકે પોતાને સ્થાપિત કરવા લાગ્યું છે.
