Share Market Today: શેરબજારમાં આજે શરૂઆતી કારોબારમાં ઉછાળો જોવા મળ્યો હતો. સેન્સેક્સ 40 પોઈન્ટના વધારા સાથે ખુલ્યો હતો જ્યારે નિફ્ટી 16 પોઈન્ટના વધારા સાથે ખુલ્યો હતો.
ભારતીય શેર બજારની શરૂઆત આજે (23 ઓગસ્ટ 2024) ઉછાળા સાથે થઈ. શરૂઆતના વેપારમાં BSE સેન્સેક્સ 40.82 પોઈન્ટ વધીને 81,094.01 પોઈન્ટ પર પહોંચ્યો હતો. જ્યારે NSE નિફ્ટી 16.90 પોઈન્ટ વધીને 24,828.40 પોઈન્ટ પર ટ્રેડ થઈ રહ્યો હતો. જોકે થોડા સમય બાદ બંને ઈન્ડેક્સમાં ઘટાડો જોવા મળ્યો હતો.
મુખ્ય શેરબજારના સૂચકાંકો સેન્સેક્સ અને નિફ્ટીએ શુક્રવારે સકારાત્મક નોંધ પર ટ્રેડિંગ શરૂ કર્યું હતું, પરંતુ વૈશ્વિક બજારોમાં નરમ વલણ અને IT શેરોમાં વેચવાલી વચ્ચે પાછળથી ઘટાડો થયો હતો.
Sensex પર લિસ્ટેડ કઈ કંપનીઓને નફો અને નુકસાન છે?
સેન્સેક્સ લિસ્ટેડ કંપનીઓમાં ઇન્ફોસિસ, ટાઇટન, ટાટા સ્ટીલ, અલ્ટ્રાટેક સિમેન્ટ, આઇટીસી, ટાટા કન્સલ્ટન્સી સર્વિસિસ, ટેક મહિન્દ્રા અને એશિયન પેઇન્ટ્સના શેરમાં ઘટાડો થયો હતો. બીજી તરફ ટાટા મોટર્સ, રિલાયન્સ ઈન્ડસ્ટ્રીઝ, સન ફાર્માસ્યુટિકલ્સ, મહિન્દ્રા એન્ડ મહિન્દ્રા, બજાજ ફિનસર્વ અને આઈસીઆઈસીઆઈ બેંકના શેર ઉછળ્યા હતા.
એશિયન બજારોમાં ચીનનો શાંઘાઈ કમ્પોઝિટ અને જાપાનનો નિક્કી-225 નફામાં હતો જ્યારે દક્ષિણ કોરિયાનો કોસ્પી અને હોંગકોંગનો હેંગસેંગ નુકસાનમાં હતો. ગુરુવારે યુએસ બજારો સકારાત્મક નોંધ પર બંધ થયા હતા.
વૈશ્વિક ઓઇલ બેન્ચમાર્ક બ્રેન્ટ ક્રૂડ ફ્યુચર્સ 0.06 ટકા વધીને US$77.27 પ્રતિ બેરલ પર ટ્રેડ કરી રહ્યાં છે. શેરબજારના ડેટા અનુસાર, વિદેશી સંસ્થાકીય રોકાણકારો (FII) ગુરુવારે મૂડીબજારમાં ખરીદદાર રહ્યા હતા અને તેમણે રૂ. 1,371.79 કરોડના શેરની ખરીદી કરી હતી. જ્યારે સ્થાનિક સંસ્થાકીય રોકાણકારો (DII)એ રૂ. 2,971.80 કરોડના શેર ખરીદ્યા હતા.
