- સિડનીમાં આજથી બન્ને દેશો વચ્ચે વાટાઘાટો શરૂ: ભારત-ઓસ્ટ્રેલિયા વચ્ચે એક વર્ષમાં 24 બિલિયન ડોલરનો વેપાર
- ભારત અને ઓસ્ટ્રેલિયા વચ્ચે મુક્ત વ્યાપાર સમજૂતી માટે આજથી સિડનીમાં વાતચીત શરૂ થઈ છે. આ વાતચીતમાં બંને પક્ષો વચ્ચે સમજૂતીને લગતા અનેક મુદ્દાઓ પર ચર્ચા થવાની છે. આ વાટાઘાટો આગામી 22 ઓગસ્ટ સુધી ચાલવાની છે.
વાણિજ્ય મંત્રાલયના અધિકારીએ જણાવ્યું હતું કે, બંને દેશોએ પહેલેથી જ વચગાળાના કરારનો અમલ કરી લીધો છે અને વ્યાપક આર્થિક સહકાર કરાર હેઠળ તેનો વ્યાપ વિસ્તારવા અંગે ચર્ચા કરી રહ્યા છે. ઇકોનોમિક કોઓપરેશન એન્ડ ટ્રેડ એગ્રીમેન્ટ પર આગામી વચગાળાનો કરાર ડિસેમ્બર 2022 માં અમલમાં આવ્યો. બંને દેશોના વાટાઘાટકારો 10મા રાઉન્ડની વાટાઘાટો શરૂ કરી રહ્યા છે. આ વાતચીત 22 ઓગસ્ટ સુધી થવાની છે. તેમણે કહ્યું, કરારના કુલ 19 ક્ષેત્રોમાંથી, અમે ચાર પર અમારી વાટાઘાટો પૂર્ણ કરી છે. કેટલીક અન્ય બાબતોમાં પણ અમારી વાતચીત નોંધપાત્ર રીતે આગળ વધી છે. અમે મંત્રણાના આ રાઉન્ડમાં 10 થી વધુ ક્ષેત્રો પર કરાર પર પહોંચવાની આશા રાખીએ છીએ.
ઇસીટીએ કાપડ, ચામડું, ફર્નિચર, જ્વેલરી અને મશીનરી સહિતના છ હજારથી વધુ ક્ષેત્રોમાં ભારતીય નિકાસકારોને ઑસ્ટ્રેલિયન બજારમાં ડ્યૂટી-ફ્રી ઍક્સેસ પ્રદાન કરે છે. ઓસ્ટ્રેલિયાએ તેની લગભગ 96.4 ટકા નિકાસ માટે ભારતને ઝીરો-ડ્યુટી એક્સેસ ઓફર કરી છે.
ભારત અને ઓસ્ટ્રેલિયાએ ફ્રી ટ્રેડ એગ્રીમેન્ટ હેઠળ વાટાઘાટો માટે અવકાશ, ખાણકામ અને રમતગમતમાં સહકાર સહિત 15 નવા ક્ષેત્રોનો પરસ્પર સમાવેશ કર્યો છે. પ્રથમ વખત, આ ક્ષેત્રો વેપાર કરારનો એક ભાગ હશે જેની ભારત વાટાઘાટો કરી રહ્યું છે.
ઓસેનિયા ક્ષેત્રમાં ઓસ્ટ્રેલિયા ભારતનું એક મહત્વપૂર્ણ વેપારી ભાગીદાર છે. 2023-24માં બંને દેશો વચ્ચે માલસામાનનો વેપાર 24 બિલિયન ડોલરની આસપાસ રહ્યો છે. પાછલા નાણાકીય વર્ષમાં, ઓસ્ટ્રેલિયામાં ભારતની નિકાસ 7.94 બિલિયન ડોલર હતી, જ્યારે આયાત 16.15 બિલિયન ડોલર હતી. 2021-22 થી, બંને દેશો વચ્ચે લગભગ 25 બિલિયન ડોલરનો વેપાર થયો છે.
