- બન્ને દેશોના વડાપ્રધાન વચ્ચે સરહદ સુરક્ષા, રેલ્વે, ઉર્જા અને કનેક્ટિવિટી સહિત અન્ય ઘણા મહત્વપૂર્ણ મુદ્દાઓ વાતચીત તેમજ કરારો થવાની શકયતા
ભારતની બે દિવસીય મુલાકાતે દિલ્હી પહોંચેલા બાંગ્લાદેશના વડાપ્રધાન શેખ હસીના આજે પીએમ નરેન્દ્ર મોદીને મળશે. 15 દિવસમાં બાંગ્લાદેશના વડાપ્રધાન શેખ હસીનાની ભારતની આ બીજી મુલાકાત છે. આજે પીએમ મોદી અને હસીના વચ્ચે સરહદ સુરક્ષા, રેલ્વે, ઉર્જા અને કનેક્ટિવિટી સહિત અન્ય ઘણા મહત્વપૂર્ણ મુદ્દાઓ પર વાતચીત થઈ શકે છે. ત્યારે આ બેઠક ભારતની સુરક્ષાના અભેદ કવચમાં મદદરૂપ થશે તેવું માનવામાં આવી રહ્યું છે.
તિસ્તાના પાણી વિતરણના માસ્ટર પ્લાન પર પણ બન્ને વડાપ્રધાન વચ્ચે ચર્ચા થઈ શકે છે. શેખ હસીના આજે રાષ્ટ્રપતિ દ્રૌપદી મુર્મુ અને ઉપરાષ્ટ્રપતિ જગદીપ ધનખરને પણ મળ્યા છે. ગઈકાલે દિલ્હીમાં તેઓ વિદેશ મંત્રી એસ. જયશંકરને મળ્યા હતા. બાંગ્લાદેશના વડાપ્રધાન શેખ હસીના સાથે પીએમ મોદીના સંબંધો ખૂબ જ સૌહાર્દપૂર્ણ રહ્યા છે. આ વખતે પણ શેખ હસીનાએ મોદીના શપથ ગ્રહણ સમારોહમાં હાજરી આપી હતી. તે જ સમયે, પીએમ મોદીએ ગયા વર્ષે જી20 કોન્ફરન્સ દરમિયાન બાંગ્લાદેશને અતિથિ તરીકે આમંત્રણ આપ્યું હતું, જે નવ દેશોમાંથી બાંગ્લાદેશ એકમાત્ર દક્ષિણ એશિયાઈદેશ હતો.
ભારતની નેબર ફર્સ્ટ નીતિ હેઠળ બાંગ્લાદેશ એક મહત્વપૂર્ણ ભાગીદાર છે.
15 દિવસમાં આ શેખ હસીનાની બીજી ભારત મુલાકાત છે. આના પરથી જ અંદાજ લગાવી શકાય છે કે બંને દેશો વચ્ચે મિત્રતા કેટલી મહત્વપૂર્ણ છે. ભારત માટે બાંગ્લાદેશ ખૂબ જ વ્યૂહાત્મક મહત્વ ધરાવે છે. જેના કારણે બાંગ્લાદેશમાં ચીનની રણનીતિ નિષ્ફળ થઈ શકે છે. આ પ્રવાસ બાદ શેખ હસીના ચીન જશે. આનાથી ઘણા અર્થો પણ લેવામાં આવી રહ્યા છે કારણ કે બાંગ્લાદેશ દક્ષિણ એશિયામાં ભારતનો મોટો વેપાર ભાગીદાર છે.
વચ્ચેની બેઠક દરમિયાન અનેક મહત્વપૂર્ણ કરારો પર ચર્ચા થઈ શકે છે. જેમાં તિસ્તા જળ સમજૂતી, સીમા પાર કનેક્ટિવિટી વધારવા પર ભાર, મ્યાનમારમાં સુરક્ષા સ્થિતિ પર ચર્ચા, આર્થિક અને વેપાર મુદ્દાઓ પર વાતચીત, વેપાર પર સર્વસંમતિ સુધી પહોંચવાના પ્રયાસો અને કનેક્ટિવિટી વધારવાનો સમાવેશ થાય છે.
