અમુલ દૂધના ભાવમાં પ્રતિ લીટરે બે રૂપિયાનો વધારો આજથી લાગુ

• દૂધના ભાવે પણ દઝાડ્યા
• અમૂલ ગોલ્ડમાં 64ને બદલે 66 રૂપિયા ચૂકવવા પડશે,જ્યારે 500 મિલીની થેલી માટે 33 રૂપિયા આપવા પડશે

લોકસભાની ચૂંટણીનું મતદાન પૂર્ણ થતાની સાથે જ મોંઘવારીનો બોજ લોકો પર પડવા લાગ્યો છે. મુખ્ય ડેરી બ્રાન્ડ અમૂલના દૂધના ભાવમાં આજથી વધારો થયો છે. હવે અમૂલ દૂધ માટે લોકોએ પ્રતિ લિટર 2 રૂપિયા સુધી વધુ ખર્ચ કરવો પડશે. અમૂલ ગોલ્ડમાં 64ને બદલે 66 રૂપિયા ચૂકવવા પડશે. જ્યારે 500 મિલીની થેલી માટે 33 રૂપિયા આપવા પડશે. અમૂલ તાજાના પ્રતિ લિટર 54 અને શક્તિના પ્રતિ લિટરે 60 રૂપિયા ચૂકવવા પડશે. ગુજરાત કો ઓપરેટિવ મિલ્ક માર્કેટિંગ ફેડરેશન દ્વારા રવિવારે અમૂલ દૂધના ભાવમાં વધારાની જાહેરાત કરી હતી. તેમણે કહ્યું કે અમૂલ દૂધના વિવિધ પ્રકારોના ભાવમાં પ્રતિ લિટર 2 રૂપિયાનો વધારો કરવામાં આવી રહ્યો છે. ફેડરેશને જણાવ્યું હતું કે તેણે દૂધના ભાવમાં વધારો કરવાનો નિર્ણય સમગ્ર કામગીરીની કિંમત અને દૂધ ઉત્પાદન ખર્ચમાં વધારાને કારણે લીધો છે.

આ વધારો આજથી અમલમાં આવ્યો છે. ગુજરાત કો ઓપરેટિવ મિલ્ક માર્કેટિંગ ફેડરેશન અમૂલ બ્રાન્ડ નામ હેઠળ દૂધ અને દહીં, ચીઝ, માખણ જેવા ઉત્પાદનોનું ઉત્પાદન અને વેચાણ કરે છે. એક વર્ષથી વધુ સમય બાદ અમૂલ દૂધના ભાવમાં આ વધારો થયો છે. આ વખતે દૂધના ભાવ એવા સમયે વધારવામાં આવ્યા છે જ્યારે થોડા દિવસ પહેલા જ લોકસભાના છેલ્લા તબક્કાનું મતદાન થયું હતું. પ્રતિ લિટર રૂ. 2નો વધારો એમઆરપીમાં 3-4%ની રેન્જમાં વધારો કરે છે, જે સરેરાશ ખાદ્ય ફુગાવો કરતાં ઘણો ઓછો છે. એ નોંધવું યોગ્ય છે કે ફેબ્રુઆરી 2023 થી, અમૂલે મુખ્ય બજારોમાં ફ્રેશ પાઉચ દૂધના ભાવમાં કોઈ વધારો કર્યો નથી.

દૂધ ઉત્પાદક સંઘો અને સહકારી મંડળીઓ ભાવ વધારાની માંગ કરી હતી

કંપનીઓ દૂધના ભાવ વધારવાનું કોઈ કારણ જણાવતી નથી. પરંતુ પરિવહન ખર્ચ, ઉનાળાની ઋતુમાં ઘાસચારાની અછત, ખર્ચ વગેરે જેવા કારણોને લીધે ભાવમાં વધારો થાય છે. એટલું જ નહીં અન્ય દૂધ કંપનીઓ પણ પોતાનો નફો મેળવવા માટે દૂધના ભાવમાં વધારો કરે છે. આ ઉપરાંત દૂધ ઉત્પાદક સંઘો અને સહકારી મંડળીઓ પણ કંપનીઓ પાસેથી ખેડૂતોને દૂધ માટે અપાતા ભાવમાં વધારો કરવાની માંગ કરી રહ્યા હતા.

અન્ય બ્રાન્ડ પણ ભાવ વધારી શકે છે

આ વધારા પછી, અમૂલ ભેંસ દૂધ, અમૂલ ગોલ્ડ મિલ્ક અને અમૂલ શક્તિ દૂધના અડધા લિટર પેકેટના ભાવ અનુક્રમે 36 રૂપિયા, 33 રૂપિયા અને 30 રૂપિયા થઈ ગયા છે.અમૂલ દ્વારા વધારા બાદ મધર ડેરી, સુધા સહિત અન્ય ડેરી બ્રાન્ડ પણ દૂધના ભાવમાં વધારો કરી શકે છે.