- બાળકો અને યુવાનોમાં ગેમના વ્યસનને નાથવા સરકાર ચીનની જેમ નિયમો લાવશે, ગેમ રમવા ઉપર સમયમર્યાદા લાદવાની સાથે ખર્ચ પણ વધારવામાં આવે તેવી શકયતા
આજકાલ બાળકોથી લઈને વડીલો સુધી દરેક ગેમિંગની લતનો શિકાર બની ગયા છે. કેટલાક લોકોએ ગેમિંગમાં પણ પોતાની કારકિર્દી બનાવી છે. જ્યારે, કેટલાક બાળકો તેમનો અભ્યાસ છોડીને આખો દિવસ રમતો રમવાનું પસંદ કરે છે. ઓનલાઈન ગેમિંગ પ્લેટફોર્મને લઈને યુઝર્સમાં વધી રહેલો ક્રેઝ ચિંતાનો વિષય છે. રમતોનું વ્યસન કોઈપણ વ્યક્તિને માનસિક રીતે અસર કરી શકે છે. તે જ સમયે, હવે આ પ્રકારના વ્યસન સામે ભારત સરકાર એક્શનમાં આવી છે.
ઓનલાઈન ગેમર્સ માટે ભારતમાં ચીન જેવા નિયમો લાગુ થઈ શકે છે. અહેવાલ મુજબ, સૂત્રોએ માહિતી આપી છે કે ઓનલાઈન ગેમિંગની લતમાંથી મુક્તિ મેળવવા માટે સરકાર ચીનની જેમ નિયમો લાગુ કરી શકે છે. હાલમાં જ ઈલેક્ટ્રોનિક્સ અને ઈન્ફોર્મેશન ટેક્નોલોજી મંત્રાલયની એક બેઠક યોજાઈ હતી અને આ દરમિયાન રિયલ મની અને ઓનલાઈન ગેમ્સ પર સમય અને ખર્ચ મર્યાદા સંબંધિત નિયમો લાગુ કરી શકાય છે. ગેમિંગ પર સમય અને ખર્ચ મર્યાદા જેવા નિયમો ચીનમાં અપનાવવામાં આવ્યા છે, જેના વિશે હવે ભારત સરકાર પણ વિચારી રહી છે. તમને જણાવી દઈએ કે ચીનના આ નિયમ આઇટી નિયમો 2021ના અલગ-અલગ પાસાઓ પર પણ ચર્ચા કરવામાં આવી હતી.
અહેવાલ મુજબ, અધિકારીઓ આ રમતને અનુમતિપાત્ર અથવા બિન-પરવાનગી તરીકે પ્રમાણિત કરવા માટે સ્વ-નિયમનકારી સંસ્થા પર આધાર રાખવાને બદલે વધુ સમય મર્યાદા નક્કી કરવાની યોજના બનાવી રહ્યા છે. રિપોર્ટ અનુસાર, જ્યારે ચીનમાં નવેમ્બર 2019માં જાહેર રજા હતી, ત્યારે 18 વર્ષથી ઓછી ઉંમરના ગેમર્સ પર દરરોજ 90 મિનિટ અથવા 3 કલાકથી વધુ સમય સુધી ગેમ રમવા પર પ્રતિબંધ હતો. આ નિયમને વધુ કડક બનાવતા સરકારે ઓગસ્ટ 2021માં 18 વર્ષથી ઓછી ઉંમરના લોકો માટે રમવાનો સમય ઘટાડીને માત્ર 1 કલાક કર્યો હતો. 2021 ના નિયમો અનુસાર, 18 વર્ષથી ઓછી ઉંમરના લોકો શુક્રવાર, સાપ્તાહિક રજાઓ અને જાહેર રજાઓના દિવસે માત્ર 1 કલાક માટે જ ગેમ રમી શકે છે.
જો આ ચાઈનીઝ ગેમિંગ નિયમ ભારતમાં લાગુ કરવામાં આવે તો ગેમર્સનો સમય અને ખર્ચ બંને બચી શકે છે. ગેમિંગની લત પણ મટાડી શકાય છે. આ નિયમને અનુસરવા અને અપનાવવા માટે, ગેમિંગ કંપનીઓ પાસે ખાસ મશીન અથવા ટેક્નિકલ સપોર્ટ હોવો જરૂરી છે. ગેમર્સના સમયને નિયંત્રિત કરવા માટે ગેમિંગ કંપનીઓ પાસે ક્ધટ્રોલિંગ ડિવાઇસ હોવું જરૂરી છે.
