- ચાંદીના વાયદા પ્રતિ કિલોગ્રામ રૂ.96,493ની વિક્રમી ઊંચી સપાટીએ, સ્થાનિક ભાવ રૂ.94 હજારને સ્પર્શયો
સોનાની સાથે ચાંદીમાં પણ વણથંભી તેજી જોવા મળી રહી છે.ચાંદીએ છેલ્લા થોડા સમયમાં વળતરમાં સોનાને પણ પાછળ છોડી દીધુ છે. તો બીજી તરફ ચાંદીના ભાવ ફ્યુચર ટ્રેડિંગમાં રૂ.1 લાખથી માત્ર 4 ડગલાં જ દૂર રહ્યા છે.
સોનાના ભાવ સ્થિર રહેતાં બુધવારે અમદાવાદ બજારમાં ચાંદીના ભાવ કિલોદીઠ રૂ.94,000ની વિક્રમી સપાટીએ પહોંચ્યા હતા. ભૌગોલિક રાજકીય ઘટનાઓ અને ઔદ્યોગિક અને છૂટક બજારોમાં ઊંચી માંગને કારણે ચાંદીના ભાવ નવી ઊંચાઈએ પહોંચી રહ્યા છે. વળતરની દ્રષ્ટિએ, ચાંદીએ આ વર્ષે સોનાને પાછળ રાખી દીધું છે, જે વર્ષ-ટુ-ડેટ લગભગ 18% વધુ છે. જોકે સ્થાનિક બજારમાં સોનાનો ભાવ 74,750 રૂપિયા પ્રતિ 10 ગ્રામ પર સ્થિર રહ્યો હતો. ઈન્ડિયા બુલિયન એન્ડ જ્વેલર્સ એસોસિએશન ના ડિરેક્ટર હરેશ આચાર્યએ જણાવ્યું હતું કે, ચાલુ ભૌગોલિક રાજકીય તણાવ અને આર્થિક અનિશ્ચિતતા, યુએસ ફેડરલ રિઝર્વ દ્વારા વ્યાજ દરમાં ઘટાડો થવાની આશંકા, ચીનના બજારમાં માંગમાં વધારો અને ઔદ્યોગિક માંગમાં વધારો થવાને કારણે ભાવમાં વધારો થયો છે.
આચાર્યએ વધુમાં જણાવ્યું હતું કે ઔદ્યોગિક ક્ષેત્રમાં ખાસ કરીને ઈલેક્ટ્રોનિક્સ, સોલાર પેનલ્સ, ઈવી અને ટેલિકોમ સેક્ટરમાં એપ્લિકેશન માટે ચાંદીની માંગ વધી રહી છે, જે દર્શાવે છે કે માંગ હજુ વધુ વધશે. ચાંદીની આયાતમાં પણ વધારો થયો છે – ગુજરાતમાં જાન્યુઆરીથી એપ્રિલ સુધીમાં ચાંદીની આયાત 1,238.75 મેટ્રિક ટન રહી હતી. આ નાણાકીય વર્ષ 2024 માં 1,561.84 એમટીની વાર્ષિક આયાતના 79.3% છે.
ઉદ્યોગ જગતના લોકોના મતે ભારત અને ચીન બંનેમાંથી ખરીદીમાં વધારો થવાથી ચાંદીના ભાવમાં વધુ વધારો થઈ શકે છે. સ્થાનિક ચાંદીના વાયદા બુધવારે પ્રતિ કિલોગ્રામ રૂ. 96,493 (1,158.01 ડોલર)ની વિક્રમી ઊંચી સપાટીએ પહોંચ્યા હતા, જે આજની તારીખમાં લગભગ 28% વધુ છે. આ વર્ષની લગભગ અડધી આયાત યુનાઈટેડ આરબ અમીરાતમાંથી આવી છે, મોટે ભાગે ગાંધીનગરના ગિફ્ટ સિટી સ્થિત ઈન્ડિયા ઈન્ટરનેશનલ બુલિયન એક્સચેન્જમાંથી તેના સોદા થયા છે. જેમાં ઓછી આયાત ડ્યુટીનો લાભ અપાયો છે.
