- સૌથી વધુ ભાજપે રૂ.39 કરોડ ખર્ચ્યા, કેન્દ્રના સેન્ટ્રલ કોમ્યુનિકેશન બ્યુરોએ રૂ.32.3 કરોડ ખર્ચ્યા: 2024ની ચૂંટણીમાં ડિજિટલ જાહેરાતોનો વ્યાપ વધ્યો
જાહેર ખબરોમાં અત્યારે ડિજિટલની બોલબાલા વધી છે. ફક્ત ત્રણ જ મહિનામાં ગૂગલની દુકાને ચૂંટણી જાહેરાતનો 117 કરોડનો વેપલો કર્યો છે. જેમાં સૌથી વધુ ભાજપે રૂ.39 કરોડ ખર્ચ્યા છે. જ્યારે કેન્દ્રના સેન્ટ્રલ કોમ્યુનિકેશન બ્યુરોએ રૂ. 32.3 કરોડ ખર્ચ્યા છે.આમ 2024ની ચૂંટણીમાં ડિજિટલ જાહેરાતોનો વ્યાપ વધ્યો છે.
ભારતીય જનતા પાર્ટીએ કેન્દ્રમાં સત્તા પર આવવાની હેટ્રિક હાંસલ કરવા માટે તમામ તાકાત લગાવી દીધી છે. માત્ર જમીન પર જ નહીં, તેણે ડિજિટલ સ્પેસનું પણ ભગવાકરણ કર્યું છે. ગૂગલ પર ચાલી રહેલી જાહેરાતોમાં ભાજપ ટોચ પર છે. રિપોર્ટ અનુસાર, તમામ રાજકીય પક્ષો અને તેમની સાથે જોડાયેલા સંગઠનોએ 1 જાન્યુઆરીથી અત્યાર સુધી એકલા ગૂગલ પર 117 કરોડ રૂપિયા ખર્ચ્યા છે. તે જ સમયે, ભાજપે 1 જાન્યુઆરીથી 10 એપ્રિલ સુધી ગૂગલ પર જાહેરાતોના સંદર્ભમાં 39 કરોડ રૂપિયા અથવા કુલ રકમનો એક તૃતીયાંશ ખર્ચ કર્યો છે. તેના પછી સેન્ટ્રલ કોમ્યુનિકેશન બ્યુરો છે, જે જાહેરાત માટે સરકારની નોડલ એજન્સી છે. આ સમયગાળા દરમિયાન તેણે 32.3 કરોડ રૂપિયાનો ખર્ચ કર્યો હતો.
ટેક મેજરના ડેટા દર્શાવે છે કે ભાજપે 1 જાન્યુઆરીથી 10 એપ્રિલના સમયગાળા દરમિયાન ગૂગલ પર કુલ 76,800 જાહેરાતો ચલાવી હતી. જે જાહેરાત પર તેણે સૌથી વધુ રકમ ખર્ચી તે કેન્દ્રની જન ધન યોજનાનો પ્રચાર કરતી જાહેરાત હતી. આ જાહેરાત 10 ફેબ્રુઆરીથી 29 માર્ચ સુધી 49 દિવસ સુધી ચાલી હતી. પક્ષ દ્વારા બીજો સૌથી મોટો ખર્ચ કેન્દ્રની મુદ્રા લોન યોજનાનો પ્રચાર કરતી તમિલ ભાષાની વિડિયો જાહેરાત પર કરવામાં આવ્યો હતો.
ચૂંટણી પહેલા ભાજપ પોતાની ઇમેજને ચમકાવવા માટે મોટો ખર્ચ કરી રહી છે. દેશની સૌથી મોટી પાર્ટી હોવાને કારણે, તે ગુગલ જાહેરાત ખર્ચમાં ટોચ પર હોવાનું અપેક્ષિત છે. પરંતુ, ઘણા લોકો એવું પણ વિચારે છે કે 2024ની લોકસભા ચૂંટણી ભાજપ માટે ’ઈન્ડિયા શાઈનિંગ’ સાબિત થઈ શકે છે. વર્ષ 2004માં, પાર્ટીએ ’ઈન્ડિયા શાઈનિંગ’ નામનું વિશ્વસનીય ચૂંટણી અભિયાન ચલાવ્યું. જેમાં અટલ બિહારી વાજપેયી સરકારની ઉપલબ્ધિઓ દર્શાવવામાં આવી હતી. પરંતુ, પાર્ટી ચૂંટણી હારી ગઈ.
જો કે, ગૂગલ એડ પરનો જંગી ખર્ચ એ પણ દર્શાવે છે કે ભાજપ ત્રીજી વખત સત્તામાં આવવા માટે કોઈ કસર છોડી રહી નથી. તેનું કારણ એ છે કે તેનો જાહેરાત ખર્ચ પાયાના સ્તરે મજબૂત વ્યૂહરચના દ્વારા ચલાવવામાં આવે છે. વાસ્તવમાં ભાજપના પ્રચારથી ઘણા લોકોને લાગે છે કે ભાજપ જંગી જીત હાંસલ કરવા જઈ રહી છે. તેની હેટ્રિક સુનિશ્ચિત કરવાના ભાજપના પ્રયાસો દર્શાવે છે કે પક્ષ તેના કેડર અને મતદારોને બતાવવા માંગે છે કે તેઓએ આત્મસંતુષ્ટ ન થવું જોઈએ. તેમણે પોતાની તમામ તાકાત ચૂંટણીમાં લગાવવી જોઈએ. તેથી જ તેમણે તેમની કેડર માટે ’આ વખતે 400 પાર કરવાનો’ ઉચ્ચ લક્ષ્ય રાખ્યો છે.
સમય બદલાતા જાહેરાત ક્ષેત્રે પણ પરિવર્તનની હવા લાગી
સમય બદલાતા જાહેરાત ક્ષેત્રને પણ પરિવર્તનની હવા લાગી છે. અગાઉ જાહેરાત ક્ષેત્રે પ્રિન્ટ મીડિયા પ્રથમ પસંદગી હતી. જો કે તે સમયમાં જાહેરાતના માધ્યમો પણ મર્યાદિત હતા. ત્યારબાદ ઇલેક્ટ્રોનિક મીડિયાનો સમય આવ્યો, તેમાં પણ જાહેરાતનો વ્યાપ વધુ હતું. પણ હવે આ બન્ને માધ્યમોને પાછળ છોડી ડિજિટલ મીડિયાએ કાઠું કાઢ્યું છે.
ટારગેટ ઓડિયન્સ
સુધી પહોંચવા ડિજિટલ મીડિયા અત્યારે સૌથી સબળ માધ્યમ
હાલ જાહેરાત ક્ષેત્ર માટે ડિજિટલ મીડિયા સૌથી લોકપ્રિય માધ્યમ બન્યું છે. તેની પાછળનું કારણ એ છે કે તેમાં ટાર્ગેટ ઓડિયન્સ સુધી ચોક્કસ રીતે પહોંચી શકાય છે. ગૂગલ એડ માટે ચોક્કસ વિસ્તાર, ચોક્કસ ઉંમર, ચોક્કસ જાતિ સહિતના વિકલ્પો આપે છે. જેથી જે ટાર્ગેટ ઓડિયન્સ છે તેના સુધી જ જાહેરાત પહોંચે છે.
ભારતે હવે ખુદ કી દુકાન ખોલવાની જરૂર
ગૂગલ જેવી કંપનીઓ મસમોટો ધંધો કરી અબજો રૂપિયા ઉસેડી રહી છે. ત્યારે હવે ભારતે ડિજિટલ ક્ષેત્રે આત્મનિર્ભર બનવા માટે ખુદ કી દુકાન ખોલવાની જરૂર છે. બીજી તરફ ગૂગલ સહિતની કંપનીઓ વિદેશી હોવાથી સંચાલન બધું તેના હાથમાં રાખે છે. જે જોખમી છે. જેથી હવે ભારતે પણ ડિજિટલ ક્ષેત્રે વધુ ખેડાણ કરવાની જરૂર છે.
