- વેસ્ટર્ન ડિસ્ટર્બન્સને કારણે બપોરે ગરમી અને રાત્રે ઠંડીનો ચમકારો યથાવત રહેશે : ફેબ્રુઆરીના અંતમાં પણ ઠંડીનો એક રાઉન્ડ આવશે
ગુજરાતના વાતાવરણમાં આજથી મોટો પલટો આવ્યો છે. એક મજબૂત વેસ્ટર્ન ડિસ્ટર્બન્સ ગુજરાતને ફરીથી ધમરોળશે. આ પ્રકારનું વાતાવરણ ઉત્તર ભારતમાં રહેવાનું છે. આ વેસ્ટર્ન ડિસ્ટર્બન્સને કારણે 21થી લઇને 26 ફેબ્રુઆરી વચ્ચે ઠંડીનો રાઉન્ડ જોવા મળી શકે છે. આ કડકડતી ઠંડી નહીં હોય સામાન્ય ઠંડી હશે. આમાં પણ મિક્સ ઋતુ તો જોવા મળશે જ. રાત્રિના સમયે ખૂબ ઠંડીનો અહેસાસ થશે. જ્યારે દિવસનું તાપમાન નોર્મલ કરતાં એક-બે ડિગ્રી વધુ રહેશે.
રાજ્યના વાતાવરણમાં આજથી પલટો આવશે તેવી આગાહી કરવામાં આવી છે. ચાર દિવસ ઠંડી વધવાની આગાહી કરવામાં આવી છે. વેસ્ટર્ન ડિસ્ટર્બન્સ સાયક્લોનિક સર્ક્યુલેશનમાં પરિવર્તિત થયું છે. લઘુત્તમ તાપમાનમાં ઘટાડો થતા ઠંડીનો અનુભવ થશે. લઘુત્તમ તાપમાનનો પારો 14 ડિગ્રી આસપાસ રહી શકે છે. વેસ્ટર્ન ડિસ્ટર્બન્સના કારણે છેલ્લા 3 દિવસથી ગરમીનો અનુભવ થતો હતો. પરંતુ હવે ફરી લોકોએ ઠંડી સહન કરવા માટે તૈયાર રહેવું પડશે.
હવામાન ખાતાની આગાહી મુજબ શુક્રવારથી વેસ્ટર્ન ડિસ્ટર્બન્સની અસર જવા મળશે. જેના લીધે પંજાબ, હરિયાણા, હિમાચલ પ્રદેશ, ચંડીગઢ, જમ્મુ અને કાશ્મીર તથા યુપી સહિત દિલ્હી એનસીઆરના વિસ્તારોમાં ભારે વરસાદની શક્યતા છે. જ્યારે પહાડી વિસ્તારોમાં બરફવર્ષાની શક્યતા છે. તાપમાનમાં નોંધપાત્ર ઘટાડો થવાની શક્યતા છે. હવામાન ખાતાએ બદલાતા હવામાનની સંભાવનાઓ ધ્યાનમાં લઈ સમગ્ર ઉત્તર ભારતમાં ઓરેન્જ એલર્ટ જાહેર કર્યું છે. આગાહી મુજબ ઉ.ભારતના કેટલાક વિસ્તારોમાં ભારે વરસાદ પડી શકે છે, અમુક વિસ્તારોમાં તોફાની પવન સાથે વરસાદ અને કરા પડી શકે છે. લઘુત્તમ અને મહત્તમ તાપમાન ઘટી શકે છે.
ફેબ્રુઆરીના અંતમાં ઉત્તર ભારતથી આવતા પવન લોકોને ઠુઠવશે. શિયાળાની વિદાય થાય એ વચ્ચે ઉત્તર ભારત પરથી એક મોટું વેસ્ટર્ન ડિસ્ટર્બન્સ પસાર થવાનું છે. આ વેસ્ટર્ન ડિસ્ટર્બન્સ 19થી 25 ફેબ્રુઆરી સુધીમાં પસાર થશે. જેના લીધે ઉત્તર ભારતના પહાડી વિસ્તારોમાં હિમ વર્ષા થઇ શકે છે. આ પ્રકારનું વાતાવરણ ઉત્તર ભારતમાં રહેવાનું છે. જોકે, આ મિશ્ર ઋતુ લોકોને બીમાર પાડી રહ્યું છે. લગભગ ગુજરાતના દરેક શહેરોમાં લોકો વાયરલ ઈન્ફેક્શન અને શરદીની તકલીફથી ઝઝૂમી રહ્યાં છે.
બનાસકાંઠામાં માવઠું, પાકને નુક્સાનીની ભીતિ
બનાસકાંઠા જિલ્લામાં કમોસમી વરસાદ ખાબક્યો છે. જેમાં થરાદ પંથકમાં મોડી રાત્રે વરસાદ આવ્યો હતો. ગ્રામ્ય વિસ્તોરમાં કમોસમી વરસાદ આવતા ખેડૂતોની ચિંતા વધી છે. લણણીના સમયે કમોસમી વરસાદ પડતા જીરૂ, રાયડો સહિતના પાકને નુકસાનની ભીતિ છે. બીજી તરફ વરસાદને કારણે ઠંડીમાં પણ વધારો થયાનું જાણવા મળી રહ્યું છે.
