- સંસદનું સત્ર એક દિવસ લંબાવાયું: મોદી મંત્ર-1નો માસ્ટર સ્ટ્રોક
- 2004થી 2014 સુધી યુપીએ સરકારના સમયમાં અને 2014થી 2024 સુધી એનડીએ સરકારના સમયમાં અર્થવ્યવસ્થાની સ્થિતિ કેવી રહી તે અંગે શ્વેતપત્ર કરાશે જાહેર
મોદી મંત્ર-1 અર્થવ્યવસ્થાને વેગ આપવા મુદ્દે હવે સરકાર માસ્ટર સ્ટ્રોક લગાવવાની છે. કારણકે સરકારે સંસદનું સત્ર એક દિવસ લંબાવીને છેલ્લા દિવસે એટલે કે શનિવારે 10 વર્ષના લેખા-જોખા જાહેર કરવાનું નક્કી કર્યું છે. આમ ચૂંટણી પહેલા સરકારે 10 વર્ષની સિદ્ધિ પ્રજા સમક્ષ મુકવા માટે તૈયારીઓ કરી રહી છે.
સંસદનું ચાલુ બજેટ સત્ર એક દિવસ માટે લંબાવવામાં આવ્યું છે. બજેટ સત્ર 31 જાન્યુઆરીથી શરૂ થયું હતું અને 9 ફેબ્રુઆરીએ પૂરું થવાનું હતું, પરંતુ હવે તે 10 ફેબ્રુઆરી સુધી ચાલશે. સંસદીય કાર્ય મંત્રી પ્રહલાદ જોશીએ આ અંગે માહિતી આપી હતી. સૂત્રોનું માનીએ તો કેન્દ્ર સરકાર અગાઉની કોંગ્રેસની આગેવાની હેઠળની સંયુક્ત પ્રગતિશીલ ગઠબંધન સરકારના 10 વર્ષના આર્થિક ગેરવહીવટ પર ’વ્હાઈટ પેપર’ લાવવા જઈ રહી છે. એટલા માટે બજેટ સત્ર એક દિવસ લંબાવવામાં આવ્યું છે. આ ’વ્હાઈટ પેપર’ દ્વારા મોદી સરકાર પોતાની અને યુપીએ સરકાર દરમિયાન દેશની આર્થિક સ્થિતિનો તુલનાત્મક અભ્યાસ રજૂ કરી શકે છે.
નાણામંત્રી નિર્મલા સીતારમણે પણ તેમના વચગાળાના બજેટ ભાષણ દરમિયાન આ અંગેની જાહેરાત કરી હતી. તેમણે કહ્યું હતું કે સરકાર એક શ્વેતપત્ર રજૂ કરશે, જેમાં યુપીએના દાયકા અને એનડીએના દાયકાને આવરી લેવામાં આવશે. યુપીએ શાસનની નાણાકીય ગેરવહીવટ અને એનડીએ શાસનની નાણાકીય સમજદારી દર્શાવવા માટે તુલનાત્મક વિશ્લેષણ કરવામાં આવશે. હવે નાણાપ્રધાન નિર્મલા સીતારમણ કોંગ્રેસની આગેવાની હેઠળની યુપીએ સત્તા છોડ્યા પછી દેશની નબળી આર્થિક સ્થિતિને ઉજાગર કરવા માટે બંને ગૃહોમાં ’વ્હાઈટ પેપર’ રજૂ કરશે અને જણાવશે કે વર્તમાન સરકારે ભારતની નબળી અર્થવ્યવસ્થાને કેવી રીતે પાટા પર લાવી છે.
નાણામંત્રીએ 1 ફેબ્રુઆરીએ પોતાના ભાષણમાં કહ્યું હતું કે, ’તે વર્ષોની કટોકટી દૂર થઈ ગઈ છે અને અમે અર્થવ્યવસ્થાને પાટા પર લાવી દીધી છે. તે વર્ષોના ગેરવહીવટમાંથી બોધપાઠ લેવા માટે 2014 સુધીમાં આપણે ક્યાં હતા અને અત્યારે ક્યાં છીએ તે જોવું યોગ્ય રહેશે. આ માટે સરકાર ગૃહમાં શ્વેતપત્ર રજૂ કરશે. આગામી એપ્રિલ-મે મહિનામાં યોજાનારી લોકસભાની ચૂંટણી માટે દેશ તૈયાર છે. આવી સ્થિતિમાં ’વ્હાઈટ પેપર’ સત્તાધારી ભાજપને પણ કોંગ્રેસ પર પ્રહાર કરવાની તક આપશે. સંસદ સામાન્ય રીતે સપ્તાહના અંતે કામ કરતી નથી, પરંતુ ભૂતકાળમાં એવા કિસ્સાઓ બન્યા છે જ્યારે ગૃહ શનિવારે મળતું હોય. આ વખતે પણ આવું જ થવાનું છે.
દેણું કરીને ઘી પીવાય ?
બાહ્ય દેણું કોરોના પહેલાની રાહતભરી સ્થિતિમાં આવી ગયું
દેણું કરીને ઘી પીવાય ? આ પ્રશ્નનો સીધો જ જવાબ છે કે હા, પણ જો ઘી પીને પછી આ દેણું ભરપાઈ કરવા માટે સક્ષમ બની શકાય હોય તો જ. ભારત પણ અત્યારે આવું જ કરી રહ્યું છે. ભારતમાં એફડીઆઈ રોકાણ વધ્યું છે. ઉપરાંત અર્થતંત્રની સ્થિતિ પણ સારી છે. પરિણામે બાહ્ય દેવું 4 વર્ષ પહેલાંની રાહતભરી સ્થિતિમાં આવી ગયું છે. રાજ્યસભામાં મારા પ્રતિનિધિ, એક લેખિત જવાબમાં, નાણા રાજ્ય મંત્રી પંકજ ચૌધરીએ જણાવ્યું હતું કે નાણાકીય વર્ષ 2021 ના કોવિડ વર્ષમાં જીડીપીના 58.3% સુધી પહોંચ્યો હતો. નાણાકીય વર્ષ 2024માં આ આંકડો 55.4% એટલે કે રૂ. 164.44 લાખ કરોડ સુધી પહોંચવાનો અંદાજ છે. નાણાકીય વર્ષ 2021 માં જીડીપીની ટકાવારી તરીકે કેન્દ્ર સરકારના ઋણમાં વધારો મુખ્યત્વે કોવિડ-19 વૈશ્વિક
રોગચાળાને કારણે હતો. જો કે, રાજકોષીય એકત્રીકરણની નીતિ પ્રત્યે સરકારની મજબૂત પ્રતિબદ્ધતા સાથે, કેન્દ્ર સરકારનું દેવું ઘણી હદ સુધી ઘટ્યું છે. મહત્વપૂર્ણ છે કે, કેન્દ્ર સરકાર નાણાકીય વર્ષ 2024માં તેની રાજકોષીય ખાધને જીડીપીના 5.8% પર અંકુશમાં રાખવાની અપેક્ષા રાખે છે, આવકની વસૂલાત પ્રારંભિક અંદાજ કરતાં વધી જવાનો અંદાજ છે. નાણા પ્રધાન નિર્મલા સીતારમણે ગયા અઠવાડિયે કહ્યું હતું અમે અગાઉ આપેલા રાજકોષીય એકત્રીકરણ રોડમેપને વળગી રહ્યા છીએ એટલું જ નહીં, પરંતુ તેને વધુ સારું પણ બનાવી રહ્યા છીએ. તે એક સરળ, સીધો સંદેશ છે કે દરેક રેટિંગ એજન્સી ધ્યાનમાં રાખવું જોઈએ.
ઉર્જા ક્ષેત્રે રૂ. 5.5 લાખ કરોડનું રોકાણ લાવવા મોદીનો માસ્ટર પ્લાન
વડા પ્રધાન નરેન્દ્ર મોદીએ મંગળવારે જણાવ્યું હતું કે આગામી પાંચથી છ વર્ષમાં ભારતમાં ઉર્જા ક્ષેત્રમાં 67 બિલિયન યુએસ ડોલર એટલે કે 5.5 લાખ કરોડનું રોકાણ થશે અને વૈશ્વિક રોકાણકારોને ભારતની વૃદ્ધિની ગાથામાં ભાગ લેવા આમંત્રણ આપ્યું હતું.મોદી અહીં ઈન્ડિયા એનર્જી વીકમાં બોલતા હતા. બીજી આવૃત્તિનું ઉદ્ઘાટન કરતાં તેમણે કહ્યું કે ભારતીય અર્થવ્યવસ્થા 7.5 ટકાથી વધુના દરે વિકાસ કરી રહી છે અને દેશ ટૂંક સમયમાં વિશ્વની ત્રીજી સૌથી મોટી અર્થવ્યવસ્થા બની જશે. પીએમ મોદીએ વૈશ્વિક રોકાણકારોને ભારતના ઉર્જા ક્ષેત્રના વિકાસમાં ભાગ લેવા આમંત્રણ આપતાં કહ્યું કે દેશને તેની રિફાઇનિંગ ક્ષમતા 254 એમએમપીટીએ (વાર્ષિક મિલિયન મેટ્રિક ટન) થી વધારીને 2030 સુધીમાં 450 એમએમપીટીએ કરવાની આશા છે.
વડા પ્રધાને વધુમાં જણાવ્યું હતું કે ભારત ઉર્જા ક્ષેત્રે અભૂતપૂર્વ નાણાંનું રોકાણ કરી રહ્યું છે જે અગાઉ ક્યારેય થયું નથી. તેમણે એમ પણ કહ્યું કે દેશની પ્રાથમિક ઉર્જાની માંગ 2045 સુધીમાં બમણી થઈ જશે. મોદીએ કહ્યું કે ભારત ક્રૂડ ઓઈલ અને એલપીજીનો ત્રીજો સૌથી મોટો ગ્રાહક છે અને એલએનજીનો ચોથો સૌથી મોટો આયાતકાર છે. વૈશ્વિક સમસ્યાઓના સામનોમાં દેશની ઉર્જા વ્યવસ્થાપન વ્યૂહરચનાનો ઉલ્લેખ કરતા વડાપ્રધાને કહ્યું કે, છેલ્લા બે વર્ષમાં ભારતમાં પેટ્રોલ અને ડીઝલના ભાવમાં ઘટાડો થયો છે.
ભારતે કતાર સાથે રૂ.6.4 લાખ કરોડનો ગેસ આયાતનો કરાર લંબાવ્યો
ભારતે કતાર સાથેની એલએનજી આયાતને ઓછા ભાવે વર્ષ 2048 સુધી લંબાવવા માટે 78 બિલિયન ડોલર એટલે કે રૂ.6.4 લાખ કરોડની સમજૂતી પર હસ્તાક્ષર કર્યા છે. ભારતની સૌથી મોટી લિકવીફાઇડ નેચરલ ગેસ (એલએનજી) આયાતકાર કંપની પેટ્રોનેટ એલએનજી લિમિટેડએ એક નિવેદનમાં જણાવ્યું છે કે દર વર્ષે 75 લાખ ટન ગેસ ખરીદવા માટે કતારની કંપની કતાર એનર્જી સાથે સમજૂતી કરી છે. આ ગેસનો ઉપયોગ વીજળી ઉત્પન્ન કરવા, ખાતર બનાવવા અને સીએનજીમાં રૂપાંતર કરવા માટે કરવામાં આવશે.ઇન્ડિયા એનર્જી વિક (આઇઇડબ્લ્યુ) દરમિયાન આ સમજૂતી પર હસ્તાક્ષર કરવામાં આવ્યા હતાં. આ રિન્યુ કરવામાં આવેલ સમજૂતીમાં નક્કી થયેલો ભાવ વર્તમાન ભાવ કરતા ઓછો છે. જેના કારણે ભારતને મિલિયન બ્રિટિશ થર્મલ યુનિટ દીઠ 0.8 ડોલરની
બચત થશે. જેના કારણે ભારતના કુલ 6 બિલિયન ડોલર એટલે કે રૂ.50 હજાર કરોડ બચશે. પેટ્રોનેટ હાલમાં બે સમજૂતી હેઠળ કતાર પાસેથી વાર્ષિક 85 લાખ ટન એલએનજીની આયાત કરે છે. પ્રથમ 25 વર્ષની સમજૂતી 2028માં સમાપ્ત થઇ રહી છે. જેને વધુ 20 વર્ષ માટે લંબાવવામાં આવી છે. 10 લાખ ટન પ્રતિ વર્ષની બીજી સમજૂતી 2015માં થઇ હતી જેના પર અલગથી મંત્રણા ચાલી રહી છે. આજે થયેલી સમજૂતી અંગે બંને દેશો વચ્ચે છેલ્લા કેટલાક મહિનાઓથી મંત્રણા ચાલી રહી હતી. ઉલ્લેખનીય છે કે કતારના એનર્જી પ્રધાન અને કતાર એનર્જીના ઉચ્ચ અધિકારીઓ ઇન્ડિયા એનર્જી વિકમાં ભાગ લેવા માટે હાલમાં ભારતમાં છે. ભારત વિશ્વમાં ત્રીજો સૌથી મોટો ઉર્જા વપરાશકાર દેશ છે. ભારત સરકાર કુદરતી ગેસનો વપરાશ વધારવાનો સતત પ્રયત્નો કરી રહી છે.
