આઇપીએલ 2024 શરૂ થવામાં હવે થોડો જ સમય બાકી છે અને આ પહેલા ટાટા ગ્રૂપે ફરી એકવાર લીગના ટાઇટલ સ્પોન્સરશિપના અધિકારો સફળતાપૂર્વક જાળવી રાખ્યા છે. ટાટા ગ્રુપે વર્ષ 2028 સુધી ટાઇટલ સ્પોન્સરશિપ મેળવી છે. ટાટા ગ્રૂપ આ સમયગાળા દરમિયાન દર વર્ષે બીસીસીઆઈ રૂ. 500 કરોડ ચૂકવશે. ટાટા ગ્રુપ આગામી પાંચ વર્ષ માટે ટાઈટલ સ્પોન્સર તરીકે બીસીસીઆઈને રૂ. 2500 કરોડ ચૂકવશે. આઇપીએલ ટાઈટલ સ્પોન્સરશિપ મેળવવાની રેસમાં આદિત્ય બિરલા ગ્રુપ પણ હતું, જેણે 2500 કરોડ રૂપિયાની બોલી લગાવી હતી. જોકે, અંતે ટાટા ગ્રુપે આ દાવ એક ખાસ શરતથી જીતી લીધો હતો.
ટાટા ગ્રુપ ટાઈટલ સ્પોન્સર તરીકે બીસીસીઆઈને રૂ. 2500 કરોડ ચૂકવશે
જ્યારે બીસીસીઆઈએ ટાઈટલ સ્પોન્સર માટે અરજીઓ આમંત્રિત કરી હતી, ત્યારે તેમાં દર્શાવેલ શરતો હેઠળ, ટાટા ગ્રૂપ જો હરાજીમાં સૌથી વધુ બોલી લગાવનાર કંપની સાથે મેચ કરવા ઈચ્છે તો તેને ટાઈટલ સ્પોન્સર અધિકારો મેળવવાનો અધિકાર હતો. બીસીસીઆઈ દ્વારા ગયા મહિને જારી કરાયેલા ટેન્ડરમાં આનો ઉલ્લેખ કરવામાં આવ્યો હતો.
આ જોગવાઈ હેઠળ ટાટા ગ્રૂપે આદિત્ય બિરલા ગ્રૂપ દ્વારા કરવામાં આવેલી રૂ. 2500 કરોડની બિડ જેટલી રકમ ચૂકવવાનું નક્કી કર્યું અને ટાઇટલ સ્પોન્સર હકો પ્રાપ્ત કર્યા. ભારતીય ક્રિકેટ કંટ્રોલ બોર્ડએ શુક્રવારે આ નિર્ણય લીધો છે. તમને જણાવી દઈએ કે, ટાટાએ વર્ષ 2022માં વિવોએ ટાઈટલ સ્પોન્સરશિપ ડીલમાંથી ખસી ગયા બાદ આઈપીએલના ટાઈટલ સ્પોન્સરશિપ રાઈટ્સ મેળવી લીધા હતા. ચાઈનીઝ સ્માર્ટફોન ઉત્પાદકે વિવિધ કારણોસર આ ડીલમાંથી ખસી જવાની માંગ કરી હતી.
વિવોએ 2018 સીઝનથી ટાઇટલ સ્પોન્સરશિપ અધિકારો મેળવ્યા હતા. આ ડીલ પાંચ વર્ષ માટે હતી અને આ સમયગાળા દરમિયાન વીવોએ બીસીસીઆઈને 2199 કરોડ રૂપિયા ચૂકવવાના હતા. છેલ્લા વર્ષ માટે, સોદામાંથી પાછી ખેંચવા માટે રૂ. 512 કરોડ નક્કી કરવામાં આવ્યા હતા. જો કે, આ સોદો છ વર્ષ સુધી ચાલવાનો હતો કારણ કે કોવિડ રોગચાળા દરમિયાન તેને એક વર્ષ માટે રોકી દેવામાં આવ્યો હતો.
