લગ્નની સિઝનમાં દર વર્ષે ચોર-ગઠીયા મહેમાનના સ્વાંગમાં ઘુસી વર-કન્યાના ચાંદલા અને ભેટ-સોગાદની કિંમતી મત્તા તફડાવી લેવાની ઘટના બનતી હોય છે. આવી જ એક ઘટના જામનગર રોડ પર આવેલા ઘંટેશ્વર પાર્કમાં સીંધી પરિવારના લગ્ન પ્રસંગમાં યોજાયેલા રિસેપ્શન દરમિયાન બની છે. કન્યાને આપવામાં આવેલા પહેરામણીની રોકડ અને સોનાના ઘરેણા સાથેનું રુા.12 લાખની મત્તાનું પર્સ આશરે 25 વર્ષનો ગઠીયો તફડાવી ભાગી ગયાની પોલીસમાં ફરિયાદ નોંધાઇ છે. લગ્નના શુટીંગમાં અને ઘંટેશ્વર પાર્કના સીસીટીવી કેમેરામાં ગઠીયાના ફુટેજ મળી આવતા પોલીસે માતબાર રકમની ચોરીનો ભેદ ઉકેલવા સઘન તપાસ હાથધરી છે.
લગ્નમાં બની ઠનીને આવેલા યુવકે માત્ર પાંચ જ મિનિટમાં રોકડ અને ઘરેણા ભરેલું પર્સ તફડાવી મંડપ સર્વિસના માણસ પાસે લિફ્ટ લઇ માધાપર ચોકડીએ પહોંચી ગયો
લગ્ન પ્રસંગના વીડિયો શુટીંગમાં અને ઘંટેશ્વર પાર્કના સીસીટીવી ફુટેજમાં ગઠીયાના ફુટેજ મળી આવ્યા
આ અંગેની પોલીસમાંથી પ્રાપ્ત વિગત મુજબ કાલાવડ રોડ પર રોયલ પાર્ક મેઇન રોડ પર રાજ પેલેસ એપાર્ટમેન્ટમાં રહેતા અને અમિન માર્ગ પર યુએસ નામની કટલેરીની દુકાન ધરાવતા ચંદુભાઇ છતારામ કોટવાણીના પુત્ર જયદીપ કોટવાણીના લગ્ન જંકશન પ્લોટ અને એસ્ટ્રોન ચોકમાં એ ટુ ઝેડ નામની પાનની દુકાન ધરાવતા અશોકભાઇ ધરમદાસ તારવાણીની પુત્રી સારિકા તારવાણી સાથે તા.30 નવેમ્બરના રોજ યોજાયા હતા અને લગ્ન પ્રસંગે જામનગર રોડ પર આવેલા ઘંટેશ્વર પાર્કમાં રિસેપ્શન અને લગ્ન વિધી કરવામાં આવી હતી.
જયદીપ કોટવાણીના લગ્નમાં મહેમાનના સ્વાંગમાં આવેલા આશરે 25 વર્ષના યુવક કન્યા સારિકા તારવાણીની આજુબાજુમાં ફરતો હતો તે દરમિયાન રાતે 11.31 કલાકે સારિકાને આપવામાં આવેલી પહેરામણીની રોકડ એક લાખ, અને 11 લાખના સોનાના ઘરેણા સાથેનું પર્સ સારિકાની અનવર બનેલી ખ્યાતીબેને માત્ર પાંચ જ મિનીટ રેઢુ મુક્યું તે દરમિયાન ગઠીયો ચોરી ગયાની યુનિર્વસિટી પોલીસમાં ફરિયાદ નોંધાઇ છે.
યુનિર્વસિટી પોલીસે જંકશન પ્લોટમાં રહેતા અને માકેર્ટીંગ યાર્ડમાં અમર એન્ટર પ્રાઇઝ નામની પેઢી ધરાવતા મોહનલાલ છતારામ કોટવાણીની ફરિયાદ પરથી પી.એસ.આઇ. આર.બી.ભરવાડ સહિતના સ્ટાફે ગુનો નોંધી લગ્ન દરમિયાન કરવામાં આવેલા વીડિયો રેકોર્ડંગ અને ઘંટેશ્વર પાર્કના સીસીટીવી ફુટેજની મદદથી તપાસ કરતા ગઠીયોએ રોકડ અને સોનાના ઘરેણા સાથેનું પર્સ બઠાવી ગેઇટ પર આવી મંડપ સર્વિસના માણસને માધાપર ચોકડી સુધી મુકવા આવવાની લિફટ માગતા તેને માધાપર ચોકડી સુધી મુકવા ગયાનું પોલીસ તપાસમાં બહાર આવ્યું છે.
