ક્રિકેટ જગતમાં સૌથી ઓછા રનનો ઈતિહાસ ભારતમાં રચાઈ ગયો છે. દેશમાં એક મહિલા ક્રિકેટ ટીમ માત્ર ૨ રનમાં ઓલ આઉટ થઇ જતા ચકચાર મચી જવા પામી છે. ભારતમાં બીસીસીઆઈની મહિલા અંડર-19 ટૂર્નામેન્ટમાં આવું પ્રદર્શન જોવા મળ્યું છે. કેરળ અને નાગાલેન્ડની અંડર-19 મહિલા સુપર લીગ મુકાબલામાં આવું પ્રદર્શન જોવા મળ્યું. નાગાલેન્ડની મહિલા ટીમ કેરળ સામે માત્ર 2 રનમાં ઓલ આઉટ થઇ ગઈ હતી. જેમાં પણ 10 બેટ્સમેન ખાતુ ખોલાવી શક્યા નહતા જ્યારે સ્કોરમાં 1 રન વધારાના રૂપમાં આવ્યો હતો. ઓપનિંગ બેટ્સમેન મેનકા જ 1 રન બનાવી શકી હતી. તેને 18 બોલમાં 1 રન બનાવ્યો હતો. કેરળની કેપ્ટન મિન્નુ મણી સૌથી સફળ બોલર રહી હતી. તેને 4 ઓવરમાં 4 મેઇડન ઓવર નાખતા 4 વિકેટ ઝડપી હતી. જ્યારે સૌરભ્ય પીએ 2 અને સેન્ડ્રા સુરેન અને બિબી સેબેસ્ટિને 1-1 વિકેટ ઝડપી હતી. કેરળ 3 રનના પડકારનો પીછો કરતા માત્ર 1 બોલમાં જીત મેળવી હતી. દીપિકા કૈતુરાએ પ્રથમ બોલ વાઇડ ફેંક્યો હતો. તેના દ્વારા ફેંકવામાં આવેલ આગળના બોલ પર અંશુએ ફોર ફટકારી હતી અને કેરલ મેચ જીતી ગયું.
