ગુજરાતના ઔદ્યોગિક વિકાસની ઐતિહાસિક ક્ષણ: ટેક્ષ્ટાઈલ ક્ષેત્રમાં નવી ક્રાંતિના મંડાણ
મુખ્યમંત્રી ભૂપેન્દ્ર પટેલ અને કેન્દ્રીય ઉદ્યોગમંત્રી પિયુષ ગોયલની ઉપસ્થિતિમાં એમ.ઓ.યુ. પર હસ્તાક્ષર
વડાપ્રધાન નરેન્દ્ર મોદીના ડ્રીમ પ્રોજેક્ટ ‘પી.એમ. મિત્ર (મેગા ઈન્ટીગ્રેટેડ ટેક્ષ્ટાઈલ રિજીયન એન્ડ એપેરલ) પાર્ક’ દેશના સાત રાજ્યોમાં સ્થપાશે, જેના ભાગરૂપે ગુજરાતના નવસારીના વાંસીબોરસી ખાતે 1141 એકરમાં પી.એમ. મિત્ર પાર્કના નિર્માણ માટે સુરત ખાતે રાજ્ય અને કેન્દ્ર સરકાર વચ્ચે એમ.ઓ.યુ. થયા છે. મુખ્યમંત્રી ભૂપેન્દ્ર પટેલ અને કેન્દ્રીય ઉદ્યોગમંત્રી પિયુષ ગોયલની ઉપસ્થિતિમાં વીર નર્મદ યુનિવર્સિટીના ક્ધવેન્શન હોલ ખાતે આયોજિત એમ.ઓ.યુ. સમારોહમાં એમ.ઓ.યુ. પર હસ્તાક્ષર કર્યા હતા. વાંસીબોરસીમાં સાકાર થનાર આ પાર્કમાં એક જ સ્થળે, એક જ છત્ર નીચે સ્પિનિંગ, વિવીંગ, પ્રોસેસિંગ/ડાઈંગ અને પ્રિન્ટિંગથી લઈને ગાર્મેન્ટ મેન્યુફેક્ચરિંગ સુધીની ઈન્ટિગ્રેટેડ ટેક્ષ્ટાઈલ વેલ્યુ ચેઈન ઉભી થશે. વિશ્વ કક્ષાનું ‘પ્લગ એન્ડ પ્લે’ ઈન્ફ્રાસ્ટ્રક્ચર ઉપલબ્ધ થશે. અહીં ટ્રેનિંગ, રિસર્ચ અને ઈનોવેશનનો ત્રિવેણી સંગમ સર્જાશે. આ પાર્ક ટેક્ષ્ટાઈલ સેક્ટરની તંદુરસ્ત હરિફાઈને ઉત્તેજન આપી નિકાસને વેગ આપશે.
આ પ્રસંગે મુખ્યમંત્રીએ વધુમાં જણાવ્યું હતું કે, વડાપ્રધાન નરેન્દ્રભાઈ મોદીએ ભારતને ગ્લોબલ ટેક્ષટાઈલ હબ બનાવવાનો સંકલ્પ કર્યો છે. દુનિયાના સૌથી જૂના ઉદ્યોગો પૈકીનો એક કાપડ ઉદ્યોગને વર્તમાન સમય અનુરૂપ અને આવનારા સમય સાથે તાલમેલ સાધવા આધુનિકીકરણનો માર્ગ અખત્યાર કર્યો છે.
‘સૌના સાથ, સૌના વિકાસ, સૌના વિશ્વાસ અને સૌના પ્રયાસ’ના મંત્રથી કેન્દ્ર અને રાજ્ય સરકારો વિકાસ પથ પર આગળ વધી હોલિસ્ટીક ડેવલપમેન્ટ માટે સજ્જ બન્યા છે જેનો આનંદ વ્યક્ત કરતા તેમણે ઉમેર્યું કે, નવસારી જિલ્લાના જલાલપોર તાલુકાના વાંસી બોરસી ખાતે 1141 એકરમાં સાકાર થનાર મેગા ઈન્ટીગ્રેટેડ એપરલ પાર્ક દક્ષિણ ગુજરાત સહિત સમગ્ર રાજ્યમાં રોજગારીની નવી તકોનું સર્જન કરવાની સાથે ગુજરાતના ટેક્ષ્ટાઈલ ઉદ્યોગને વેગવંતો બનાવશે. વિકાસની તેજ ગતિથી પીએમ મિત્ર પાર્ક ‘આત્મનિર્ભર ભારત માટે આત્મનિર્ભર ગુજરાત’નું નવું સીમાચિહ્ન સર કરશે એવો વિશ્વાસ તેમણે વ્યક્ત કર્યો હતો.
મુખ્યમંત્રીએ જણાવ્યું કે, ગુજરાત કાપડ ઉત્પાદન અને વ્યાપારના મહત્વપૂર્ણ કેન્દ્ર રહ્યું છે, અને દુનિયાભરમાં ‘પૂર્વનું માન્ચેસ્ટર’, ‘ટેક્ષટાઈલ સ્ટેટ ઑફ ઈન્ડિયા’ અને ‘ભારતનું ડેનિમ કેપિટલ’ તરીકેની આગવી નામના ધરાવે છે. ગુજરાતની કાપડ ઉદ્યોગની સિદ્ધિઓ વર્ણવતા તેમણે જણાવ્યું કે ગુજરાત દેશની ટેક્ષટાઈલ ઈન્ડસ્ટ્રીઝની કુલ નિકાસમાં બીજું સ્થાન ધરાવે છે. દેશભરના ડેનિમ કાપડનું 60 થી 70 ટકા ઉત્પાદન એકલું ગુજરાત કરે છે, જે સમગ્ર દેશમાં પ્રથમ અને વિશ્વમાં ત્રીજા સ્થાને છે. ઉપરાંત, કપાસનું 37 ટકા ઉત્પાદન ગુજરાત કરે છે, દેશમાંથી થતી નિકાસમાં 60 ટકા ફાળો આપે છે. દેશના કુલ મેન મેડ કોટન ફાઈબર ઉત્પાદનમાં ગુજરાતનો ફાળો પ ટકા છે, જ્યારે સિન્થેટીક ફાઈબરના ઉત્પાદનના કિસ્સામાં સૌથી મોટો ફાળા આપતા રાજ્ય તરીકે વુવન ફાઈબર ઉત્પાદનમાં 30 ટકા ફાળા સાથે અગ્રસ્થાને છે.
જંબુસરમાં બલ્ક ડ્રગ પાર્ક, રાજકોટમાં મેડિકલ ડિવાઈસ પાર્ક, ભાવનગરમાં વ્હીકલ સ્ક્રેપેજ રિસાયકલિંગ પાર્ક, મોરબીમાં સિરામીક પાર્ક અને બનાસકાંઠામાં એગ્રો ફૂડ પાર્ક સહિત અનેક નવા ઔદ્યોગિક પાર્ક આગામી સમયમાં ગુજરાતની વિકાસગાથાને વધુ ઉજ્જવળ બનાવશે એમ મુખ્યમંત્રીએ રાજ્યની વિકાસલક્ષી નીતિ વર્ણવતા કહ્યું હતું.
તેમણે કહ્યું કે, પી.એમ. મિત્ર પાર્ક ’મેક ઈન ઈન્ડિયા’ અને ’મેક ફોર ધ વર્લ્ડ’નું વિઝન સાકાર કરશે. ટેક્ષ્ટાઈલ પાર્ક માટે નવસારી જિલ્લાનું વાંસીબોરસી સર્વાધિક અનૂકુળ હોવાથી પસંદ કર્યું છે, અહીં 1141 એકરમાં સાકાર થનાર પાર્ક દક્ષિણ ગુજરાત સહિત રાજ્યના વિકાસની નવી રાહ કંડારશે એમ જણાવી મુખ્યમંત્રીશ્રીએ પીએમ મિત્ર પાર્કની સ્થાપના માટે ગુજરાતની પસંદગી કરવા બદલ વડાપ્રધાન અને કેન્દ્રીય ઉદ્યોગ મંત્રી પ્રત્યે આભારની લાગણી વ્યક્ત કરી હતી. આ પ્રસંગે કેન્દ્રીય વાણિજ્ય અને ઉદ્યોગમંત્રી પિયુષ ગોયલે જણાવ્યું કે, પી.એમ. મિત્ર પાર્ક એક આગવું ઔદ્યોગિક મોડેલ બનશે, જ્યાં કેન્દ્ર અને રાજ્ય સરકારો કાપડ ઉદ્યોગમાં રોકાણ વધારવા, નવીનતાને પ્રોત્સાહન આપવા, રોજગારીની તકો ઊભી કરવા, ભારતને કાપડ ઉત્પાદન અને નિકાસ માટે વૈશ્વિક હબ બનાવવા માટે સાથે મળીને કામ કરશે. ઉદ્યોગ પ્રોત્સાહન નીતિ હેઠળ આપવામાં આવતા તમામ લાભો પાર્કમાં ઉપલબ્ધ કરાવવામાં આવશે.
મંત્રીએ ગુજરાતના ચોમેર વિકાસની સરાહના કરતા કહ્યું કે, ગુજરાત લોજીસ્ટીક, નેશનલ સ્ટાર્ટ અપ ઈન્ડેક્સ, ગુંડ ગવર્નન્સ, ઈઝ ઓફ ડુઈંગ બિઝનેસ, નિકાસ જેવા ક્ષેત્રોમાં અવ્વલ છે અને માળખાગત સુવિધાઓમાં અભૂતપૂર્વ વિકાસ થયો છે.
પી.એમ. મિત્ર પાર્કથી નવસારી જિલ્લામાં વિશ્વ કક્ષાનું ‘પ્લગ એન્ડ પ્લે’ ઈન્ફ્રાસ્ટ્રક્ચર ઉપલબ્ધ થશે સર્ક્યુલર ઈકોનોમીને વેગ મળશે એમ તેમણે ઉમેર્યું હતું.
કેન્દ્રીય રેલવે અને ટેક્ષ્ટાઈલ રાજ્યમંત્રી દર્શનાબેન જરદોશે જણાવ્યું કે, ઙખ મિત્ર પાર્ક યોજનાનો ઉદ્દેશ્ય પ્રધાનમંત્રી નરેન્દ્ર મોદીના આત્મનિર્ભર ભારત નિર્માણના વિઝનને સાકાર કરવાનો અને વૈશ્વિક કાપડના નકશા પર ભારતને મજબૂત સ્થાન આપવાનો છે. ગુજરાતના ઉદ્યોગ મંત્રી બલવંતસિંહ રાજપૂતે જણાવ્યું હતું કે, તેમાં પણ સમગ્ર દેશમાં નિર્માણ પામનારા 7 પી.એમ. મિત્રા પાર્ક પૈકીનો એક પાર્ક ગુજરાતને મળ્યો જે આપણા સૌ માટે ગૌરવની બાબત છે. ભારત સમગ્ર વિશ્વમાં વિકાસની દિશામાં આગળ વધી રહ્યું છે તેમાં ગુજરાતનો પણ ખૂબ મોટો ફાળો રહ્યો છે. ગુજરાતમાં રોકાણ માટે વિશ્વના રોકાણકારો આગળ આવી રહ્યા છે. તેના કારણે ગુજરાતના ઉદ્યોગ ક્ષેત્રે અનેક સફળતાઓ સાંપડી છે.
દેશની વસ્તીમાં પાંચ ટકા, અને ભૌગોલિક ક્ષેત્રફળમાં છ ટકા હિસ્સો ધરાવતું ગુજરાત દેશની જી.ડી.પી.માં 8.4 ટકાનું માતબર યોગદાન આપે છે એમ જણાવતા ગૃહ રાજ્યમંત્રી હર્ષ સંઘવીએ જણાવ્યું હતું. તેમણે વધુમાં કહ્યું કે, પી.એમ. મિત્ર પાર્કની પરિકલ્પનાથી વડાપ્રધાનએ માત્ર વર્તમાન વ્યાપારી સમૂહોની જ નહીં, પણ ભાવિ પેઢીના સોનેરી ભવિષ્યને સુનિશ્ચિત કર્યું છે.
સાંસદ સી.આર.પાટીલે જણાવ્યું કે, ઉદ્યોગકારો, વ્યાપારીઓ રજૂઆતો કે માંગણી કરે એ પહેલા જ તેમની માંગણીઓને પારખી લઈને માંગ્યા વિના જ સુવિધાઓ આપવાની કાર્યપદ્ધતિ રાજ્ય સરકારે વિકસાવી છે. દર વર્ષે માત્ર ત્રણ ટકા જ પાણીમાં ભાવ વધારો થાય એવો ઉદ્યોગકારોને અત્યંત રાહત આપતો નિર્ણય એ તેનું પ્રત્યક્ષ ઉદાહરણ છે. ઉદ્યોગકારોની આ પાર્કમાં રોકાણ માટેનો ઉત્સાહ અને માંગ જોતા 1141 એકર જમીન ઓછી પડશે જેથી હજુ વધુ જમીનની તીવ્ર આવશ્યકતા રહેશે એમ તેમણે ઉમેર્યું હતું. કાર્યક્રમમાં અગ્રણી ટેક્ષ્ટાઈલ ઉદ્યોગકાર પુનિત લાલભાઈ(અરવિંદ મિલ) અને બાલકૃષ્ણ ગોએન્કા(વેલસ્પન ગ્રુપ) એ પી.એમ. મિત્ર પાર્ક અંગે ખુશી વ્યક્ત કરી પ્રોત્સાહક પ્રતિભાવો આપ્યા હતા. આ સમારોહમાં મોટી સંખ્યામાં ઉપસ્થિત ઉદ્યોગપતિઓએ રોકાણ માટે ઉત્સાહ રૂચિ દર્શાવી હતી.
