એનસીપીએ અનેકવાર પાટલી બદલી, શરદ પવારે પોતાના નિર્ણયોથી જ પાર્ટી ચલાવી, પાર્ટીમાં પાયાના પથ્થર એવા નેતાઓની અવગણના કરી તે સહિતના અનેક કારણોસર નારાજગી ઉભરીને બહાર આવી
મહારાષ્ટ્રમાં એનસીપીના ઉભા ફાડીયા થવાની ઘટનાએ રાજકારણમાં હડકંપ મચાવી દીધો છે. ત્યારે શા માટે એનસીપીમાં આવું થયું તે પ્રશ્ન અત્યારે ઠેર ઠેર ચર્ચાઈ રહ્યો છે. આ ઘટનાથી બીજા પક્ષોએ પણ શીખ લેવાનું શરૂ કરી દીધું છે.
રવિવારે મહારાષ્ટ્રના રાજકારણમાં મોટો બદલાવ જોવા મળ્યો હતો. એનસીપી પાર્ટી અધ્યક્ષ શરદ પવાર અને એનસીપી નેતા અજિત પવાર વચ્ચે ઘણા સમયથી મતભેદ જોવા મળી રહ્યા છે. બંને વચ્ચેનો મતભેદ એટલો વધી ગયો કે અજિત પવાર એનસીપી પાર્ટીથી અલગ થઈને એનડીએમાં જોડાઈ ગયા. વાસ્તવમાં અજિત પવાર ગયા મહિનાથી શરદ પવારના નિર્ણયથી નારાજ હતા. તેઓ ઘણા નેતાઓ સાથે એનડીએ માં જોડાયા હતા.
રવિવાર, 2 જુલાઈના રોજ અજિત પવારે રાજભવનમાં મહારાષ્ટ્રના નાયબ મુખ્યમંત્રી તરીકે શપથ લીધા. ગયા મહિને એનસીપી સુપ્રીમો શરદ પવારે પાર્ટીના તમામ નિર્ણયો લેવાનો અધિકાર તેમની પુત્રી સુપ્રિયા સુલેને આપ્યો હતો. વાસ્તવમાં શરદ પવારે પાર્ટી અધ્યક્ષ પદેથી રાજીનામું આપી દીધું હતું પરંતુ કાર્યકર્તાઓની માંગ પર તેને પાછું લઈ લીધું હતું. થોડા દિવસો પછી, તેમણે તેમની પુત્રી અને સાંસદ સુપ્રિયા સુલે અને નજીકના પ્રફુલ પટેલને પાર્ટીના રાષ્ટ્રીય કાર્યકારી અધ્યક્ષ તરીકે નિયુક્ત કર્યા. શરદ પવારના આ નિર્ણયથી અજિત પવાર નારાજ હતા.
શરદ પવારના આ નિર્ણય બાદ પાર્ટીમાં ખળભળાટ જોવા મળ્યો હતો. શરદ પવારે તેમની પુત્રીને કાર્યકારી પ્રમુખ બનાવી. પરંતુ અજિત પવારને મહારાષ્ટ્રની જ જવાબદારી સોંપવામાં આવી, જેના કારણે અજિત પવારની નારાજગી વધી. ત્યારથી તેમના ભાજપમાં જોડાવાની વાતો ચાલી રહી હતી.
છેલ્લા મહિનાથી અજિત પવાર એનડીએમાં સામેલ થવાની વાતો ચાલી રહી હતી. એવું પણ અનુમાન કરવામાં આવી રહ્યું હતું કે તેમની સાથે ઘણા કાર્યકરો એનસીપીમાંથી રાજીનામું આપી શકે છે.
એનસીપીના ઉભા ફાડીયા થવાની આ ઘટના પાછળ અનેક કારણો જવાબદાર છે. જેમાં એનસીપીએ અનેકવાર પાટલી બદલી, શરદ પવારે પોતાના નિર્ણયોથી જ પાર્ટી ચલાવી, પાર્ટીમાં પાયાના પથ્થર એવા નેતાઓની અવગણના કરી તે સહિતના અનેક કારણોસર નારાજગી ઉભરીને બહાર આવી અને પક્ષના ફાડીયા થયા છે.
અજિત પવાર જૂથના બે ધારાસભ્યોની ફરી શરદ પવાર જૂથમાં વાપસી
મહારાષ્ટ્રમાં મોટી રાજકીય ઉથલપાથલ બાદ હવે યુ-ટર્નની પ્રક્રિયા પણ શરૂ થઈ ગઈ છે. અજિત પવાર સાથે બળવો કરનાર બે ધારાસભ્યો ઘરે પરત ફર્યા છે. અજિત પવારના સમર્થક ધારાસભ્ય દિલીપ મોહિતે પાટીલે સોમવારે (3 જુલાઈ) દાવો કર્યો હતો કે અજિત પવારે ગઈકાલે ધારાસભ્યોને જાણ કર્યા વિના તેમની સહીઓ લીધી હતી. અમે તેના પગલા સાથે સહમત નથી.
દિલીપ મોહિતે પાટિલ રવિવારે (2 જુલાઈ)ના રોજ શપથ ગ્રહણ સમારોહમાં હાજર હતા. આ સિવાય એનસીપી ધારાસભ્ય મકરંદ પાટીલ પણ બળવાના બીજા દિવસે એનસીપી ચીફ શરદ પવાર સાથે દેખાયા હતા. મકરંદ પાટીલ રવિવારે શપથ ગ્રહણ સમારોહમાં સામેલ થયા હતા અને સોમવારે શરદ પવારની કારમાં બેઠેલા જોવા મળ્યા હતા.
