નયી ઉમંગે, નયી તરંગે, લિખેંગે નયી કહાની…હમ હિન્દુસ્તાની
સમાન નાગરિકત્વ ધારા, દિલ્હીમાં ઉપરાજયપાલની સતા વધારવા સહિતના અનેક બિલ ઉપર ઘમાસાણ મચવાના એંધાણ : વિપક્ષ પણ વ્યૂહરચના ઘડવામાં વ્યસ્ત
નવા સંસદ ભવનમાં નવા જોમ અને નવા ઉત્સાહ સાથે આગામી જુલાઈ માસના ત્રીજા અઠવાડિયાથી ચોમાસુ સત્ર શરૂ થવાનું છે. જેમાં સમાન નાગરિકત્વ ધારા, દિલ્હીમાં ઉપરાજયપાલની સતા વધારવા સહિતના અનેક બિલ ઉપર ઘમાસાણ મચવાના એંધાણ મળી રહ્યા છે. બીજી તરફ વિપક્ષ પણ વ્યૂહરચના ઘડવામાં વ્યસ્ત હોવાનું જાણવા મળી રહ્યું છે.
સંસદના આગામી ચોમાસુ સત્રને લઈને સંસદીય બાબતોની કેબિનેટ સમિતિની આજે બેઠક યોજાશે. જેમાં સત્રની તારીખો અંગે ચર્ચા થશે. મળતી માહિતી મુજબ સંસદનું ચોમાસુ સત્ર 17 જુલાઈથી 20 ઓગસ્ટ સુધી ચાલી શકે છે. બંને ગૃહોની કાર્યવાહી નવા સંસદભવનમાં જ થશે. સૂત્રોના જણાવ્યા અનુસાર કેન્દ્રીય મંત્રી રાજનાથ સિંહના નેતૃત્વમાં સંસદીય બાબતોની કેબિનેટ સમિતિ સંસદના ચોમાસુ સત્રની તારીખોને અંતિમ રૂપ આપશે. સૂત્રોએ જણાવ્યું હતું કે કેબિનેટ સમક્ષ પ્રસ્તાવિત તારીખો અનુસાર ચોમાસુ સત્ર 17 જુલાઈ અથવા 20 જુલાઈથી શરૂ થઈ શકે છે.
રિપોર્ટ્સ અનુસાર, આ વખતે મોનસૂન સત્રમાં લેફ્ટનન્ટ ગવર્નરને વધુ વહીવટી સત્તા આપતા કેન્દ્ર સરકારના વટહુકમને બદલવાના બિલને લઈને દિલ્હીમાં હોબાળો થઈ શકે છે. આમ આદમી પાર્ટીના સંયોજક અને દિલ્હીના મુખ્યમંત્રી અરવિંદ કેજરીવાલ બિલ વિરુદ્ધ સમર્થન મેળવવા વિપક્ષી નેતાઓને મળી રહ્યા છે. જો કે કોંગ્રેસે આ બિલ પર હજુ સુધી પોતાનું વલણ સ્પષ્ટ કર્યું નથી.
કેન્દ્રનો વટહુકમ સુપ્રીમ કોર્ટના 11 મે, 2023ના ચુકાદાને રદ કરે છે જે દિલ્હી સરકારને સેવાઓ પર વધુ કાયદાકીય અને વહીવટી નિયંત્રણ આપે છે. ઉપરાંત, તે લેફ્ટનન્ટ ગવર્નરને આવી બાબતોમાં નિર્ણય લેવાની સત્તા આપે છે.
લોકસભામાં બિલ સરળતાથી પસાર થઈ જશે કારણ કે ભાજપના નેતૃત્વ હેઠળના એનડીએ પાસે નીચલા ગૃહમાં સ્પષ્ટ બહુમતી છે. રાજ્યસભામાં બિલ પાસ કરાવવામાં પડકાર ઉભો થઈ શકે છે. કારણ કે વર્તમાન ગૃહનું સંખ્યાબળ સાત ખાલી બેઠકો સાથે 238 છે, જે ઉપલા ગૃહમાં બહુમતીનો આંકડો ઘટાડીને 120 સુધી પહોંચાડે છે. તેથી ભાજપના નેતૃત્વવાળી સરકારને રાજ્યસભામાં કેટલાક વિરોધનો સામનો કરવો પડી શકે છે.
નામાંકિત સભ્યોના સમર્થન સાથે ભાજપના નેતૃત્વ હેઠળના એનડીએ પાસે ઉપલા ગૃહમાં 111નું સંખ્યાબળ છે, જ્યારે વાયએસઆરસીપી, બીજેડી, બીએસપી, ટીડીપી અને જનતા દળ (સેક્યુલર) જેવા પક્ષોને બાદ કરતાં વિપક્ષની કુલ સંખ્યા 106 છે. આ પાંચેય પક્ષો મળીને 21 સભ્યો ધરાવે છે. આ પક્ષોએ હજુ આપને સમર્થન જાહેર કર્યું નથી.
