35,000 ચો.કિ.મીના વિસ્તારમાં એફએમ રેડિયોનો વ્યાપ વધશે : વધુ બે કરોડ લોકો સુધી રેડિયો સેવા ઉપલબ્ધ બનશે
વડાપ્રધાન નરેન્દ્ર મોદીએ વીડિયો કોન્ફરન્સિંગ દ્વારા ભારતમાં રેડિયો કનેક્ટિવિટી વધારવા માટે 91 એફએમ ટ્રાન્સમિટર્સનું ઉદ્ઘાટન કર્યું. તેનાથી 18 રાજ્યો અને બે કેન્દ્રશાસિત પ્રદેશોના 84 જિલ્લાઓને ફાયદો થશે. આ સરહદી વિસ્તારો અને મહત્વાકાંક્ષી જિલ્લાઓમાં એફએમ રેડિયો કનેક્ટિવિટીને પ્રોત્સાહન આપશે.
આ દરમિયાન પીએમ મોદીએ કહ્યું કે આજે ઓલ ઈન્ડિયા રેડિયોની એફએમ સેવાનું આ વિસ્તરણ ઓલ ઈન્ડિયા એફએમ બનવાની દિશામાં એક મહત્વપૂર્ણ પગલું છે. ઓલ ઈન્ડિયા રેડિયોના 91 એફએમ ટ્રાન્સમિશનનું આ લોન્ચિંગ દેશના 85 જિલ્લાના 2 કરોડ લોકો માટે ભેટ સમાન છે.
વડા પ્રધાન કાર્યાલયએ એક નિવેદનમાં જણાવ્યું હતું કે સરકાર દેશમાં એફએમ કનેક્ટિવિટી વધારવા માટે પ્રતિબદ્ધ છે. દેશભરના 84 જિલ્લાઓમાં 91 નવા 100વોટ એફએમ ટ્રાન્સમીટર સ્થાપિત કરવામાં આવ્યા છે. ખાસ કરીને સરહદી વિસ્તારોમાં રેડિયો કનેક્ટિવિટી વધારવા માટે એફએમ ટ્રાન્સમીટરનું વિસ્તરણ કરવામાં આવ્યું છે.
રાજ્યો અને કેન્દ્રશાસિત પ્રદેશોમાં બિહાર, ઝારખંડ, ઓડિશા, પશ્ચિમ બંગાળ, આસામ, મેઘાલય, નાગાલેન્ડ, હરિયાણા, રાજસ્થાન, ઉત્તર પ્રદેશ, ઉત્તરાખંડ, આંધ્ર પ્રદેશ, કેરળ, તેલંગાણા, છત્તીસગઢ, ગુજરાત, મધ્ય પ્રદેશ, મહારાષ્ટ્ર, લદ્દાખ અને આંદામાન-નિકોબાર ટાપુઓનો સમાવેશ થાય છે.
પીએમઓએ કહ્યું કે ઓલ ઈન્ડિયા રેડિયોની એફએમ સેવાના આ વિસ્તરણ પછી લગભગ બે કરોડ લોકો સુધી રેડિયો સેવાઓ ઉપલબ્ધ થશે, જેઓ અત્યાર સુધી તેનાથી વંચિત છે. તેમજ લગભગ 35,000 ચોરસ કિલોમીટરના વિસ્તારમાં એફએમ રેડિયો કવરેજનો વિસ્તાર કરવામાં આવશે.
