કોરોના કાચિંડાની જેમ રંગ બદલી રહ્યો છે…
14 માસ બાદ ટેસ્ટ પોઝિટીવીટી રેટ 5%થી ઉપર પહોંચ્યો
દેશમાં ફરી એકવાર કોરોનાએ વેગ પકડવાનું શરૂ કર્યું છે. દેશભરમાં છેલ્લા 7 દિવસના આંકડા ભયાનક છે. 9 થી 15 એપ્રિલ સુધીમાં દેશભરમાં કોરોનાના 61,500 થી વધુ નવા કેસ નોંધાયા છે. જે તેના સાત દિવસ પહેલા (34,011 કેસ) કરતા 81 ટકા વધુ છે.
દેશની રાજધાની દિલ્હીમાં કોરોનાની ઝડપ ભયાનક છે. દિલ્હી થોડા દિવસોમાં કોવિડ -19 ના વર્તમાન ઉછાળાના મુખ્ય હોટસ્પોટ તરીકે ઉભરી આવ્યું છે. છેલ્લા સાત દિવસમાં દિલ્હીમાં કોરોનાથી સંબંધિત 24 લોકોના મોતના અહેવાલ છે જે દેશમાં સૌથી વધુ છે. તે જ સમયે નવા કેસોમાં બીજા સ્થાને દિલ્હીમાં 7,664 નવા કેસ નોંધાયા છે. આ સિવાય હવે રાજધાનીને અડીને આવેલા રાજ્યોમાં પણ કોરોના ફેલાવા લાગ્યો છે.
આ સમયગાળા દરમિયાન (એપ્રિલ 9 થી 15) પડોશી હરિયાણામાં 4,554 નવા કેસ નોંધાયા છે, જે દેશમાં ચોથા ક્રમે છે. ત્યારબાદ ઉત્તર પ્રદેશ 3,332 કેસ સાથે સાથે પાંચમા સ્થાને છે. કેસોમાં ચાર ગણા વધારા સાથે રાજસ્થાનમાં 14 મૃત્યુ નોંધાયા છે.
કુલ મળીને 9 થી 15 એપ્રિલ સુધીમાં સમગ્ર દેશમાં કોરોનાના 61,500 થી વધુ નવા કેસ નોંધાયા છે. જે તેના સાત દિવસ પહેલા (34,011 કેસ) કરતા 81 ટકા વધુ છે. તેમજ ગત વર્ષે ઓગસ્ટ બાદ સાત દિવસમાં સૌથી વધુ છે. આ સાત દિવસોમાં મૃત્યુઆંક 113 મૃત્યુ સાથે 100-આંકને વટાવી ગયો છે, જે અગાઉના સમયગાળામાં 67 મૃત્યુ કરતાં 70 ટકાનો વધારો છે.
નોંધનીય છે કે સાત-દિવસીય ટેસ્ટ પોઝિટીવીટી રેટ (ટીપીઆર) 14 મહિનામાં પ્રથમ વખત 5 ટકાને વટાવી ગયો છે. દરમિયાન છેલ્લા સાત દિવસમાં 2,000થી વધુ નવા કેસ નોંધનારા રાજ્યોની સંખ્યા પાછલા અઠવાડિયામાં ચારથી વધીને 10 થઈ ગઈ છે. કેરળ 9 થી 15 એપ્રિલ સુધીમાં 8,623 નવા કેસ સાથે દેશમાં પ્રથમ ક્રમે છે. જ્યારે દિલ્હીએ મહારાષ્ટ્ર (6,048) ને 7,664 નવા કેસ સાથે બીજા સ્થાને ધકેલી દીધા છે.
છેલ્લા સાત દિવસમાં રાજધાની દિલ્હીમાં કેસ બમણાથી વધીને 3,626 થઈ ગયા છે. ચોથા ક્રમે રહેલા હરિયાણામાં કેસોમાં 2.4 ગણો વધારો 1,915 થી 4,554 થયો છે. જ્યારે યુપીમાં આ સંખ્યા લગભગ ત્રણ ગણી વધી છે. છેલ્લા સાત દિવસમાં 2,000 થી વધુ નવા કેસ નોંધાયેલા અન્ય રાજ્યોમાં તમિલનાડુ (3,052), કર્ણાટક (2,253), ગુજરાત (2,341), હિમાચલ પ્રદેશ (2,163) અને રાજસ્થાન (2,016) છે.
ન હોય… બુસ્ટર ડોઝ ફાયદાની બદલે નુકસાની સર્જી શકે છે!!
કોરોના કેસોમાં તાજેતરના વધારાને ધ્યાનમાં રાખીને ઘણા નિષ્ણાતો લોકોને મહત્તમ સાવચેતી રાખવા અને બૂસ્ટર ડોઝ લેવાની સલાહ આપી રહ્યા છે તે જ સમયે એમ્સના ડૉક્ટર ડૉ. સંજય રાયનું માનવું છે કે આ સમયે, રસીના બૂસ્ટર ડોઝની નકારાત્મક અસર થઈ શકે છે. દિલ્હીની એઇમ્સ હોસ્પિટલમાં કોમ્યુનિટી મેડિસિનનાં પ્રોફેસર ડૉ. સંજય રાય માને છે કે આ સમયે રસીનો બૂસ્ટર ડોઝ સારા કરતાં વધુ નુકસાન કરી શકે છે.
ડૉ. સંજયે કહ્યું, ‘કોવિડના પ્રારંભિક તબક્કામાં જ્યારે લોકો મોટી સંખ્યામાં સંક્રમિત નહોતા, લોકોમાં હર્ડ ઈમ્યુનિટી ન હતી, ત્યારે તેમને રસીની જરૂર હતી પરંતુ હવે દેશમાં લગભગ દરેક લોકો એકવાર સંક્રમિત થઇ ચુક્યા છે જેના લીધે કુદરતી રોગપ્રતિકારક શક્તિ વિકસિત થઈ છે. જે કોઈપણ વાયરસ સામે રક્ષણ આપવામાં રસી કરતાં વધુ અસરકારક છે.
ઉપરાંત અમે રસી સાથે કોઈપણ નવા વેબને રોકી શકતા નથી. તે ફક્ત મૃત્યુ અને ગંભીરતા ઘટાડે છે. ચેપને રોકવા માટે વધુ સ્ટેરોઇડ્સ આપવાથી તમને સારા કરતાં વધુ નુકસાન થઈ શકે છે તેવું ડોક્ટરનું કહેવું છે. હાલમાં કોરોના અને ઈન્ફલ્યુએન્ઝા બંને લોકોને ચેપ લગાવી રહ્યા છે. ઈન્ફલ્યુએન્ઝા એ એક વાયરલ ચેપ છે જે દર વર્ષે આવે છે અને લોકોને મોસમમાં ચેપ લગાડે છે. બૂસ્ટર ડોઝ કેટલો અસરકારક છે તે અંગે કોઈ સંશોધન બહાર આવ્યું નથી. માત્ર શક્યતાઓના આધારે, અમે કહી શકીએ નહીં કે આ સમયે બૂસ્ટર ડોઝ લોકો માટે ફાયદાકારક રહેશે.
ગુજરાતમાં કોરોના વાયરસના 283 નવા કેસ નોંધાયા : 3 દર્દીના મોત, ચાર દર્દી વેન્ટિલેટર પર
ગુજરાતમાં કોરોનાના કેસના આંકડા સતત વધી રહ્યા છે. ત્યારે આજે કોરોના વાયરસના નવા કેસ નોંધાયા છે. ઉલ્લેખનીય છે કે, બે દિવસમાં જ છ લોકોએ જીવ ગુમાવ્યો છે. 16મી એપ્રિલે ગુજરાતમાં કોરોના વાયરસના નવા 283 કેસ નોંધાયા છે. જેમાં અમદાવાદમાં સૌથી વધુ 130 કેસ નોંધાયા છે. જ્યારે 217 દર્દીઓને રજા આપવામાં આવી છે. ઉલ્લેખનીય છે કે, ત્રણ દર્દીના મોત નીપજ્યા છે. મહત્ત્વનું છે કે, ગઈકાલે પણ કોરોના વાયરસના કારણે ત્રણ દર્દીના મોત નીપજ્યા હતા. કોરોનાના વધતા કેસને ધ્યાને રાખી ગુજરાતીઓએ ફરીથી સાવધાન રહેવાની જરૂર છે અને જો કોઈપણ લક્ષણ દેખાય તો તાત્કાલિક તેની સારવાર કરાવવી જોઈએ
