એક્સાઇઝ નીતિ કૌભાંડને લઈને સીબીઆઈએ કેજરીવાલની પૂછતાછ પૂર્ણ કરી : ભાજપ ઉપર કેજરીવાલના આકરા પ્રહાર
દિલ્હીના મુખ્યમંત્રી અરવિંદ કેજરીવાલની સેન્ટ્રલ બ્યુરો ઓફ ઈન્વેસ્ટિગેશન દ્વારા રવિવારે એક્સાઈઝ પોલિસીના સંબંધમાં લગભગ 9 કલાક સુધી પૂછપરછ કરવામાં આવી હતી. આ દરમિયાન તેમને 56 પ્રશ્નો પૂછવામાં આવ્યા હતા.
સીબીઆઈ હેડક્વાર્ટરમાંથી બહાર આવતાં જ કેજરીવાલે કેન્દ્ર સરકાર પર પ્રહાર કરતા કહ્યું કે તેઓ અમને ખતમ કરવા માંગે છે. તપાસ એજન્સી પર ભાજપના ઈશારે કામ કરવાનો આરોપ લગાવતા આમ આદમી પાર્ટીએ દિલ્હી અને પંજાબમાં વિરોધ પ્રદર્શન કર્યા. દિલ્હી પોલીસે આપના અનેક નેતાઓ અને કાર્યકરોની અટકાયત કરી છે. બીજી તરફ દારૂ કૌભાંડના વિરોધમાં ભાજપે રાજઘાટ સામે ધરણા કર્યા હતા. કેજરીવાલે કહ્યું કે સીબીઆઈને દિલ્હીની એક્સાઈઝ પોલિસીમાં આપ સરકાર વિરુદ્ધ કંઈ મળ્યું નથી.
કેજરીવાલ સવારે 11 વાગે પૂછપરછ માટે સીબીઆઈ હેડક્વાર્ટર પહોંચ્યા હતા. તપાસ એજન્સીના અધિકારીઓ કેજરીવાલને મુખ્યાલયના પહેલા માળે લઈ ગયા. સીબીઆઈના વરિષ્ઠ અધિકારીઓ પણ ઘટનાક્રમ પર નજર રાખવા માટે રવિવારે હેડક્વાર્ટરમાં હાજર હતા. જોકે, અધિકારીઓએ જણાવ્યું હતું કે વીઆઇપીના દેખાવ દરમિયાન આ સામાન્ય પ્રક્રિયા છે.
સૂત્રોએ જણાવ્યું કે પૂછપરછ દરમિયાન કેજરીવાલને લંચ બ્રેકની ઓફર કરવામાં આવી હતી. જોકે, તેણે સીબીઆઈ હેડક્વાર્ટરની બહાર ન જવાનો નિર્ણય કર્યો હતો. સીબીઆઈ દ્વારા દિલ્હીના સીએમની પૂછપરછ મોડી સાંજ સુધી ચાલુ રહી હતી. સીબીઆઈ સમક્ષ હાજર થતા પહેલા કેજરીવાલે રાજઘાટ પર જઈને મહાત્મા ગાંધીની સમાધિ પર જઈને શ્રદ્ધાંજલિ પણ આપી હતી. સીબીઆઈએ લગભગ 8 કલાકની પૂછપરછ બાદ 26 ફેબ્રુઆરીએ આ કેસમાં દિલ્હીના પૂર્વ ઉપમુખ્યમંત્રી મનીષ સિસોદિયાની ધરપકડ કરી હતી.
અટકાવ્યા બાદ ધરણા પર બેઠેલા આપ નેતાને કસ્ટડીમાં લેવામાં આવ્યા હતા. સીબીઆઈ હેડક્વાર્ટરમાં જતા સમયે કેજરીવાલની સાથે પંજાબના મુખ્યમંત્રી ભગવંત માન, રાજ્યસભાના સાંસદો સંજય સિંહ, રાઘવ ચઢ્ઢા, કેબિનેટ મંત્રીઓ કૈલાશ ગેહલોત, આતિશી, સૌરભ ભારદ્વાજ, ઈમરાન હુસૈન પણ હતા. જોકે, પોલીસે તમામ નેતાઓને લોધી રોડ સ્થિત સીબીઆઈ હેડક્વાર્ટરથી પહેલા જ અટકાવી દીધા હતા. આ પછી પાર્ટીના તમામ નેતાઓ ત્યાં ધરણા પર બેસી ગયા અને પીએમ નરેન્દ્ર મોદી અને બીજેપી વિરુદ્ધ નારા લગાવ્યા.
