બીસીસીઆઇએ બન્ને ઈજાગ્રસ્ત ક્રિકેટરોનું હેલ્થ અપડેટ જાહેર કર્યું
ટીમ ઈન્ડિયાના સ્ટાર ફાસ્ટ બોલર જસપ્રીત બુમરાહ અને શ્રેયસ અય્યર આ દિવસોમાં ભારતીય ટીમની બહાર છે. બંનેની ઈજાને લઈને શનિવારે બપોરે ભારતીય ક્રિકેટ કંટ્રોલ બોર્ડ દ્વારા એક મોટું અપડેટ શેર કરવામાં આવ્યું છે. બોર્ડે બંને ક્રિકેટરોની ફિટનેસ અંગે અપડેટ આપી અને તેમની સર્જરી અને રિહેબિલિટેશન સાથે જોડાયેલી માહિતી પણ આપી. નોંધપાત્ર વાત એ છે કે આ બંને ખેલાડીઓ આઇપીએલ 2023માંથી બહાર છે. હવે આગામી દિવસોમાં 7 જૂનથી ભારત અને ઓસ્ટ્રેલિયા વચ્ચે રમાનારી વર્લ્ડ ટેસ્ટ ચેમ્પિયનશિપ ફાઇનલમાં તેનું રમવું પણ શંકાસ્પદ માનવામાં આવે છે.
બીસીસીઆઈએ બુમરાહ અને ઐયરના મેડિકલ અપડેટ્સ આપતી પ્રેસ રિલીઝ કરી છે. જેમાં બોર્ડ દ્વારા કહેવામાં આવ્યું છે કે, જસપ્રીત બુમરાહની પીઠના નીચેના ભાગમાં સર્જરી ન્યુઝીલેન્ડમાં કરવામાં આવી છે અને તે સફળતાપૂર્વક પૂર્ણ પણ થઈ છે. આ પછી, તેમને લગભગ 6 અઠવાડિયાના આરામ પછી પરત ફરવાની સલાહ આપવામાં આવી હતી. હવે તેણે શુક્રવારથી બેંગલુરુમાં નેશનલ ક્રિકેટ એકેડમીમાં રિહેબ મેનેજમેન્ટ શરૂ કર્યું છે. ઉપરાંત, શ્રેયસ અય્યર વિશે, બોર્ડે કહ્યું કે તે આવતા અઠવાડિયે નીચલા પીઠની સર્જરી કરાવશે. તે પછી એનસીએમાં તેમનું પુનર્વસન શરૂ કરતા પહેલા બે અઠવાડિયા સુધી સર્જનની દેખરેખ હેઠળ રહેશે.
જસપ્રીત બુમરાહ છેલ્લે સપ્ટેમ્બર 2022માં ભારતીય ટીમ માટે રમતા જોવા મળ્યો હતો. આ પછી તે ટી20 વર્લ્ડ કપ 2022 ચૂકી ગયો. બાદમાં તે શ્રીલંકા અને ન્યુઝીલેન્ડ શ્રેણીમાં પણ રમ્યો ન હતો. બોર્ડર ગાવસ્કર ટ્રોફીમાં પણ ટીમ બુમરાહ વિના ઉતરી હતી અને તે આઇપીએલ 2023માંથી પણ બહાર થઈ ગયો હતો. હવે વર્લ્ડ ટેસ્ટ ચેમ્પિયનશિપની ફાઇનલમાં તેનું રમવું શંકાસ્પદ છે.
બીજી તરફ શ્રેયસ અય્યરની વાત કરીએ તો તે બોર્ડર ગાવસ્કર ટ્રોફીની છેલ્લી ટેસ્ટ દરમિયાન ઈજાગ્રસ્ત થયો હતો. આ પછી તેને વનડે શ્રેણીમાંથી પણ બહાર થવું પડ્યું હતું. ત્યારબાદ કેકેઆરના કેપ્ટનને સમગ્ર આઇપીએલ 2023 સીઝનમાંથી પણ બહાર કરી દેવામાં આવ્યો હતો. હવે જોવાનું એ રહેશે કે શું તે વર્લ્ડ ટેસ્ટ ચેમ્પિયનશિપની ફાઈનલ સુધી ટીમમાં વાપસી કરી શકશે કે કેમ?
