“તારા મા-બાપે તને કોઇ સંસ્કાર આપ્યા નથી” તેમ કહી સાસરિયાનો પરિણીતા પર ત્રાસ

કરિયાવર બાબતે દબાણ કરતા પતિ સહિતના છ સામે મહિલા પોલીસમાં નોંધાતો ગુનો

રાજકોટમાં અંબિકા ટાઉનશિપમાં છેલ્લા ત્રણ વર્ષથી માવતરે રહેતી પરિણીતાએ તેના પતિ સહિત છ સાસરીયા સામે ત્રાસ આપતા હોવાની ફરિયાદ નોંધાવી છે.જેમાં તેને તેના સાસરીયાઓ ” તારા મા-બાપે તને કોઇ સંસ્કાર આપ્યા નથી, તમે ગામડિયા છો” તેમ કહી કરિયાવર બાબતે માનસિક ત્રાસ આપતા હોવાનું પોલીસ ફરિયાદમાં જણાવ્યું હતું.

વિગતો મુજબ અંબિકા ટાઉનશિપમાં રહેતા નિધિબેને કાલાવડ રોડ પર ક્રિસ્ટલ મોલ પાછળ રહેતા પતિ સની દીપકભાઇ ગોવાણી, સાસુ જયશ્રીબેન, કાકાજી અતુલભાઇ વલ્લભભાઇ ગોવાણી, મામાજી ભૂપતભાઇ કાલરિયા, મામીજી ઇલાબેન, ફઇજી શોભનાબેન સામે મહિલા પોલીસ મથકમાં ફરિયાદ નોંધાવી છે.જેમાં તેને જણાવ્યું હતી કે,તેને બીબીએ સુધીનો અભ્યાસ કર્યો છે અને તેના લગ્ન 2017માં સની સાથે થયા છે. લગ્નના ચાર-પાંચ દિવસ બાદ જ પતિએ કરિયાવર બાબતે મેણાં મારી પિયરથી કરિયાવર લઇ આવવા દબાણ કરતા હતા અને “તારા મા-બાપે તને કોઇ સંસ્કાર આપ્યા નથી, તમે ગામડિયા છો ” કહી ઝઘડો કરતા હતા. સાસુ પણ મેણાં મારી પોતાના પર હાથ ઉઠાવી લેતા હતા. બાદમાં પતિને પોતાના વિરુદ્ધની વાત કરાવી બળજબરીથી સાસુ પાસે પતિ માફી મગાવડાવતા હતા. જ્યારે જ્યારે ઘરમાં પતિ, સાસુ સાથે ઝઘડા થતા ત્યારે કાકાજી સમજાવવાને બદલે તેમના પરિવારની તરફેણ કરી તારે જ બધું સહન કરવું પડશે, આવી રીતે જ ઘર સંસાર ચલાવવો પડશે.

દરમિયાન પોતે દીકરીને જન્મ આપતા પતિ, સાસુ સહિતનાઓએ વધુ ત્રાસ આપવાનું ચાલુ કર્યું હતું. પોતાને બળજબરીથી પિયર જવા માટે પણ દબાણ કરતા હતા. પરંતુ પોતે પિયર જતી નહિ ત્યારે પતિ અને સાસુ પોતાને તેમજ દીકરીને ઘરે એકલા મૂકીને બહાર જતા રહેતા હતા. પોતે ઘરનું સભ્ય ન હોય તેવો વ્યવહાર કરી ઝઘડો કરતા હતા.દરમિયાન સાડા ત્રણ મહિના પહેલા પતિ અને સાસુએ ફરી કરિયાવર સહિતના મુદ્દે પોતાની સાથે ઝઘડો કરી પોતાને તેમજ દીકરીને પહેરે કપડે ઘરમાંથી કાઢી મૂકતાં તેને અંતે ફરિયાદ નોંધાવી છે.