સાવરકરે જેલમુક્તિ માટે અંગ્રેજોને માફી પત્ર લખ્યો અને રૂ.60નું પેન્શન પણ લેતા હતા, રાહુલના નિવેદનથી ઠેર ઠેર વિરોધ : સાવરકરના પૌત્રએ પણ ફરિયાદ નોંધાવી
વીર સાવરકરે જેલમુક્તિ માટે અંગ્રેજોને માફી પત્ર લખ્યો અને તેઓ રૂ.60નું પેન્શન પણ લેતા હતા. આવા નિવેદનથી રાહુલ ગાંધી બરાબરના ફસાયા છે. તેઓ વિરુદ્ધ વીર સાવરકરના પૌત્ર બાદ શિંદે જૂથે પણ ફરિયાદ નોંધાવી છે.
મહારાષ્ટ્રમાં ભારત જોડો યાત્રા દરમિયાન વીર સાવરકર વિશે વિવાદિત નિવેદન આપવા બદલ કોંગ્રેસ નેતા રાહુલ ગાંધીનો ભારે વિરોધ થઈ રહ્યો છે. આ જ કારણ છે કે હવે રાહુલ ગાંધીના નિવેદન બાદ તેમની મુસીબતમાં પણ વધારો થયો છે, કારણ કે શિંદે જૂથના વંદના સુહાસ ડોંગરેએ સાવરકર પર ટિપ્પણી કરવા બદલ રાહુલ ગાંધી વિરુદ્ધ પોલીસ ફરિયાદ નોંધાવી છે. શિંદે જૂથના નેતા વંદનાની ફરિયાદના આધારે, પોલીસે કલમ 500 અને 501 આઈપીસી હેઠળ નોન-કોગ્નિઝેબલ ગુનાનો કેસ નોંધ્યો છે.
પોલીસ ફરિયાદમાં શિંદે જૂથના નેતા વંદનાએ કહ્યું કે રાહુલ ગાંધીએ સ્વતંત્રતા સેનાનીની બદનક્ષી કરી છે અને સ્થાનિક લોકોની ભાવનાઓને ઠેસ પહોંચાડી છે. એટલું જ નહીં સાવરકરના પૌત્રે રાહુલ ગાંધી વિરુદ્ધ પોલીસ ફરિયાદ પણ નોંધાવી છે.
વાસ્તવમાં ગુરુવારે ભારત જોડો યાત્રા દરમિયાન રાહુલ ગાંધીએ કહ્યું હતું કે વીર સાવરકરે સ્વતંત્રતા સંગ્રામ દરમિયાન જેલની સજામાંથી મુક્તિ મેળવવા અંગ્રેજોને માફી પત્ર લખ્યો હતો. આ સાથે વીર સાવરકરે અંગ્રેજો પાસેથી 60 રૂપિયાનું પેન્શન પણ લીધું હતું. રાહુલ ગાંધીના આ નિવેદન બાદ રાજ્યમાં રાહુલ ગાંધી વિરુદ્ધ વાતાવરણ ગરમાયું છે. વીર સાવરકરના પૌત્ર રણજિત સાવરકરે કહ્યું કે રાહુલ ગાંધીના આ નિવેદનથી વીર સાવરકરની બદનામી થઈ છે અને તેઓ દાદર પોલીસ સ્ટેશન જશે અને રાહુલ ગાંધી વિરુદ્ધ કેસ નોંધાવશે.
ઉદ્ધવ ઠાકરેએ કહ્યું કે તેઓ રાહુલ ગાંધીના આ નિવેદનનું સમર્થન કરતા નથી. વીર સાવરકર કટ્ટર હિન્દુત્વવાદી નેતા હતા. આઝાદીમાં વીર સાવરકરના યોગદાનને અવગણી શકાય નહીં.
