વર્ષ 2021-22માં તમામ રાજ્યોને રૂ. 2633 કરોડ નાણાકીય સહાય, તેમાંથી એકલા ગુજરાતને જ અધધધ 1242 કરોડની સહાય
ગુજરાતનો સૂર્ય પાવર મજબૂત કરવા કેન્દ્રનો ભરપૂર સહયોગ મળી રહ્યો છે. આ વાત એના પરથી સ્પષ્ટ થાય છે કે વર્ષ 2021-22માં તમામ રાજ્યોને રૂ. 2633 કરોડ નાણાકીય સહાય અપાઈ હતી. તેમાંથી એકલા ગુજરાતને જ અધધધ 1242 કરોડની સહાય અપાઈ છે.
તમામ રાજ્યોને સોલાર રૂફટોપ સ્કીમ અને સૌર ઉર્જા ઉત્પાદન અપનાવવા માટે કેન્દ્રીય ઉર્જા મંત્રાલય તરફથી નાણાકીય સહાયનો મોટો હિસ્સો આપવામાં આવે છે. સંસદમાં રજૂ કરાયેલા ડેટા અનુસાર, 2021-22માં અન્ય તમામ રાજ્યોને વિતરિત કરાયેલ કુલ રૂ. 2,633 કરોડમાંથી, ગુજરાતને મંત્રાલય તરફથી નાણાકીય સહાય તરીકે રૂ. 1,242.71 કરોડ મળ્યા હતા. આનો અર્થ એ થયો કે રાજ્યને 47% રકમ વિતરિત કરવામાં આવી છે. ગુજરાત એનર્જી ડેવલપમેન્ટ ઓથોરિટી ના ટોચના સૂત્રોના જણાવ્યા અનુસાર, રાજ્યમાં સોલાર પાવર પ્રોજેક્ટ્સના સ્કેલમાં નોંધપાત્ર વધારો થયો છે. રાજ્યએ પહેલાથી જ 7,806.8 મેગાવોટની સૌર ઊર્જા ઉત્પાદનની ક્ષમતા સ્થાપિત કરી છે.
રાજ્ય સરકારની રૂફટોપ સોલાર પોલિસી દ્વારા સૌર ઉર્જા અપનાવવાની વાત આવે ત્યારે ભારતના રાજ્યોમાં ગુજરાતે અગ્રણી ભૂમિકા ભજવી છે. રાજ્યમાં પહેલેથી જ 2021-22 સુધીમાં 2,163મેગાવોટની રૂફટોપ ક્ષમતા છે, જે સ્થાપિત સૌર ઊર્જા ઉત્પાદન ક્ષમતાનો લગભગ ત્રીજો ભાગ છે, એક સ્ત્રોતે જણાવ્યું હતું.
આ ઉપરાંત ગત નાણાકીય વર્ષમાં રાજ્યમાં લગભગ 2,000 મેગાવોટ વીજ ઉત્પાદન ક્ષમતાનો ઉમેરો થયો હતો. રાજ્યમાં સોલાર પાવર પ્રોજેક્ટ્સને પરિપ્રેક્ષ્યમાં મૂકતાં, પ્રણવ મહેતા, પ્રેસિડેન્ટ, નેશનલ સોલાર એન્ડ સસ્ટેનેબલ એનર્જી ફેડરેશન ઓફ ઈન્ડિયાએ જણાવ્યું હતું કે, ગુજરાત કુદરતી રીતે અને કાયદેસર રીતે કેન્દ્રીય નાણાકીય સહાય મેળવવામાં ટોચ પર છે, જેનો ગુજરાતના ક્લાયમેટ ચેન્જ વિભાગ અને એનએસઇએફઆઇએ જાગૃતિ ઊભી કરીને રૂફટોપ પ્રોજેક્ટને લોકપ્રિય બનાવવામાં મહત્વની ભૂમિકા ભજવી છે અને આના પરિણામે તેને વ્યાપકપણે અપનાવવામાં આવ્યા છે અને અમલીકરણ થયું છે.”
રાજ્યનું સોલાર પાવર ઉત્પાદન આગામી સમયમાં બમણાથી પણ વધવાની શકયતા
ગુજરાત સોલાર પાવર ઉત્પાદનમાં અત્યારે 6.2 ગીગા વોટની ક્ષમતા ધરાવે છે. ઔદ્યોગિક અને રહેણાંક મોરચે મજબૂત માંગને ધ્યાનમાં રાખીને, ગુજરાતમાં આગામી થોડા વર્ષોમાં રાજ્યમાં અંદાજિત 15 ગીગાવોટ સોલર ઉત્પાદન થવાની ધારણા છે. ઉલ્લેખનીય છે કે ગુજરાતભરમાં અત્યારે સોલાર પાવર વિશે ઘણી જાગૃતિ આવી છે. જેને કારણે સોલાર પાવરનું ઉત્પાદન મોટા પ્રમાણમાં વધી રહ્યું છે.
